Read Saluan NEHEMIA 6 Bible Online

NEHEMIA 6 - Saluan bible

NEHEMIA 6

¹I Sanbalat, i Tobia, i Gesyem ka' sampobali' mami sangga'at nohongomo mae kami noko lapasmo na mombau pagan mesen, ka' iwi-iwi' na bolo'nyo pinaha tampolanmo, ola tempo'nyo aitu kami ma'isa nompaha pokona tumbannyo i sabatan daka' nu kota'.

²Sahingga i Sanbalat tiba i Gesyem nompakatumo mae sulat bau polaga aku da mamba mogombu tiba aha i sala'sa'angu' na kampung ise' i Bangka'nyo nu Ono. Panyo sinumbu'kumo na aha kahanda'mo monsilakai aku.

³Kalana aitu pinakatungkumo na sulat bau pontaami sumo uuka hi aha, “Aku madi' timbali toka mae hi belemiu kalana hau-haunyo mombau kalaja anu penting hondo. Kalaja aijo' madi'mo jadi de ku pala'imo mamba singkabot tiba belemiu.”

⁴Sampe pinimpaton na aha nompakatu mae sulat anu pokakana bau polaga aku, ka' saja' suele ku taami pokakana sumo aijo'.

⁵Anu kino pinilimannyomo samian na suludadu i Sanbalat tinokamo mae nombee' mae sulat madi'mo pinai lupi',

⁶isi nu sulat aijo' sumo uuka: “I Gesyem nompototu'umo lele anu ma'isa talalo manasa anu lengkat mae hi bansa-bansa anu aitu mae mompaha ohani, anu nompoto'imo tukoonyo nu aha belento Utus ka' iwi-iwi' na mian nu Yahudi ko tanga'anmo mongewa, kalana aijo' Belento utus nombaumo pagan mesen nu kota'. Ia nompoto'i mule' tukoonyo Belento utus kahanda'mo timbali tomundo' nu Yehuda.

⁷Ka' nompoto'imo pa' aha sangkuka na nabi mohangkat ka' mombalakati Belento utus kiijo' i Yerusalem. Lele anu ma'isa talalo manasa aijo' tio-tionyomo toka hi tomundo'. Kalana aijo', tokamo mae da obisalakonmo na han aijo'.”

⁸Panyo aku nompakatumo sulat bau pinontaamingku sumo uuka: “Iwi-iwi' na anu tinaloakonmo nu Belento utus aijo' madi' totu'u ka' ola pinosituka nu Belento utus.”

⁹Aha nonsoba-sobamo nompopobuhuk kami da kami madi'mo mombau kalaja aitu. Aku binalado'amo, “O Tumpu Allah, pohosonakon mae na aku.”

¹⁰I tempo'mo aitu suele, na aku namba hi laigan i Samaya anak i Delaya ka' makumpu i Mehetabeel, kalana ia saja madi' ko tempo' na toka mae hi belengku. Ia nompoto'i hi belengku, “Imbo' da ua kita mamba maninsuluk i Laigan nu Tumpu. O gunsingtoje na tumbannyo iwi-iwi', kalana daagi' ko mian anu kahanda'mo mompatei beleyum. Kugantang pihimo uuka na beleyum opatei.”

¹¹Panyo tinaamanku, “Aku aiya misa' mian anu mongka'oho' mopalai. Salaku mian anu madi' ko pangkatnyo i Laigan nu Tumpu madi' timbali minsoop, boli-boli aku silaka. Madi', aku madi' mongka'oho'!”

¹²Salatan lewa'mo pinotutuganku na han aijo', sinumbu'kuje taalu' i Semaya nonsale'i aijo' misa' lengkat mae hi Tumpu Allah na nompotuka', ola lengkat mae ahi' hi Tobia ka' hi Sanbalat. Aha nontamboimo i Semaya da mompoto'i apaa na anu saidi' mae jadi hi belengku.

¹³Tanga'an nu aha, aijo'mo da aku mabuhuk lantas montulutimo pongka'oho' nu aha sahingga baladosa'mo. Tiba jalan anu sumo aijo' nuhumpakmo nu aha na jalan mombusiki sanggongku sahingga aku lewa'mo nu alu nu mian.

¹⁴Aku binalado'amo, “O Tumpu Allah, tutugiakon mae apaa na anu binaumo i Tobia ka' i Sanbalat aijo'. O hukumakon na aha! Sumo aijo' mule' suele i nabi anu osa-osanggohi Noaya ka' to nabi-nabi sangga'at anu kahanda'mo mompopobuhuk aku.”

¹⁵Nombau pagan mesen aijo' kinopinnyo i limampulu' ka' ohua' na sinaa, ka' jinadimo kakona i tanggan uampulu' ka' olima' bitu'on Elul.

¹⁶Tempo'nyo to sampo-sampobali' mami te to bansa-bansa anu mompaha ohani kiijo' nohongomo han aijo', aha nabuhukmo dumo saidi mae ma'ambangmo, kalana sinumbu'mo nu mian iwi-iwi' na kalaja aijo' binau kalana Tumpu Allah na nontulungi.

¹⁷Hau-haunyo aijo' to pola-polaya' nu aha Yahudi daagi' ahi' lewa' mokokiliman sulat tiba i Tobia.

¹⁸Manjoo' na mian nu aha Yahudi nosangalumo tiba i Tobia, kalana ia monian i Sekhanya anak i Arah. Pakalaus mule' i Yohanan, anak i Tobia, no'osoamo tiba anak boune i Mesulam anak i Berekhya.

¹⁹Maumo i Tobia satuli-tulisnyo sulat toka mae hi belengku mompopobuhuk aku, panyo to pola-polaya' nu aha Yahudi haha aijo' na saja' ahi' mompuji' sanggonyo, nu taloakon nu aha aitu i ahopku, iwi-iwi na palabuatan ma'ima' anu binaumo i Tobia. Ka' mule' iwi-iwi' na anu ku sisik, nupoto'i nu aha hi ia.