Read Saluan NEHEMIA 9 Bible Online

NEHEMIA 9 - Saluan bible

NEHEMIA 9

¹Itanggan kino uampulu'nyomo ka' opat bitu'onmo ai-aijo' mian da'isan nu aha Israel sinihukmo. Aha binapuasa'mo salaku tanda aha nompele-pele'mo i dosa' nu aha. Aha madi'mo naninggalo' tiba to mia-mian sangga'at anu isalipu'an mae. Salaku bau pontoan taalu' aha sinusa'mo, aha nompusokmo kalung ka' nongkakambuhakonmo abu' nu tano' aita' i ubak nu aha. Lapas aijo' aha tinuminjomo ka' nongakuimo dosa' nu aha iwi-iwi' tiba dosa' nu mompolee' nu aha.

³Kila-kila tinotolu' na jam na kinopinnyo na kitab Atulan nu Tumpu Allah nu aha binasa'akon hi aha, ka' tinotolu' na jam na kinopinnyo suele na aha nongakui dosa' nu aha iwi-iwi'. Lapas aijo' aha tinolodadupumo nonsombah Tumpu, Tumpu Allah nu aha.

⁴Ikiijo' daagi' ko mimban kau' katinjoan nu to mia-mian Lewi ka' tinuminjomo na i Yesua aijo', tiba i Bani, i Kadmiel, i Sebanya, i Buni, i Zerebya, i Bani tiba i Kenani. Aha binalado'amo daka-daka' hi Tumpu Allah nu aha.

⁵Aha nonsombahmo Tumpu Allah nu aha i sinaa aitu tinampu'unan nu aha to mia-mian nu aha Lewi aijo'mo: i Yesua, i Kadmiel, i Bani, i Hasabneya, i Serebya, i Hodia, i Sebanya, ka' i Petanya. Aha notataemo: “Tinjomo ka' puji' na Tumpu Allah-nto! Opuji' na Ia sampe toka sidu-sidutu'! Opuji' na sanggo-Nyo anu saja' opopodaka', sanggo anu opalias molingkudui iwi-iwi' na bau pompuji'.”

⁶Lapas aijo' mian da'isan nu aha Israel binalado'amo sumo uuka: “Belentomo na Tumpu, belentomo Sa'a-sa'angu'nyo na Tumpu Allah; pinotimbalimo nu Belento na mandala' iwi-iwi' aita' i langa, ka' suele ambai tiba tano' ka' iwi-iwi' na anu daagi' i unonyo, lantas pinotumuu'mo nu Belento ka' jinaganmo nu Belento. Iwi-iwi' na anu balakuasa aita i langit tolodadupu monsombah Belento; aha montuluti Belento ka' tina'alukmo.

⁷ Belentomo na Tumpu Allah, Tumpu Anu Sa'a-sa'angunyomo. Belento nompile'imo i Abram aijo' hi bansanyo. Lipu' Ur kiijo' i Babel pinala ian-Nyomo, kalana posi Belentomo na nolaya' mae ia. Lantas binee'anmo nu Belento na ia sanggo anu bau binau pombolosi: i Abraham, aijo'mo na saja' pinolaga ia mulai tempo'nyo aitu.

⁸ Tinokan nu Belento na ia tulu-tulutan hi Belento ka' mohongo-hongo. Lantas nombaumo na Belento tiba ia palajanjian anu otaha'imani hondo. Tano' nu Kana'an, Het tiba Amori, tano' Feris, Yebus tiba Girgasi. Iwi-iwi' aijo' Nu bee'mo hi aha salaku bau kajojoongan nu lee'nyo iwi-iwi'. Lapas aijo' ginanapanmo nu Belento na palajanjian aijo' hi ia. Kalana Belento adin ka' mule' totu-totu'u na kinyonyoa.

⁹ Tinoamo nu belento na kasansala'an nu mompolee' mami tempo'nyo naipuan mae anu ihikuhakonmo; ihongomo nu Belento na aha i humang kiijo' i Mesir ka' mule' kiijo' i ambai Teberau.

¹⁰ Kona hi tomundo' Mesir binaumo nu Belento na hahan anu opalias. Ka' suele kona hi mian anu kopangkat ka' mule' hi mian da'isan anu i lipu' nu aha, kalana osumbu' nu Belento mosia na mian anu palesayamo hi Belento, sisinakisamo nu aha. Lantas tinalasanggomo na sanggo nu Belento sampe sinaa uuka aiya.

¹¹ Kalana mombau jalan da timbali katuluan nu mian anu palesayamo hi Belento sahingga ambai biniha'mo nu Belento; tinapakonmo nu Belento na aha nontului lananyo nu ambai anu notiismo. To mia-mian anu nombondos i uno nu ambai anu maleeng hondo sumomo ahi' batu anu tinonu'mo aijo' i ambai anu okabuhuk hondo.

¹² Kundom binaumo pinohohungi nu belento aha de sinaamo. Ka' de pihimo na aha lumajang nu jingkaimo nu belento nu apu.

¹³ Lengkat mae i langit Belento nintatau'mo mae aita i Bungkutnyo nu Sinai, Lantas notataemo na Belento hi mian anu palesayamo hi Belento. Belento nombee'imo atulan, mosia na mongatun ka' mule' mosia na mompalentah, anu adin, adin ka' anu mingguna.

¹⁴Sinaa nu Sabat anu susi' tionyo ahi' nu lame'akon nu aha, ka' atulan nu Belento binee'mo nu Belento hi Musa lantas iaje na nompoto'i hi kami.

¹⁵ Salatan aha no ohopmo ka' kinadagi'anmo i anu okaan, roti lengkat mae i langit tinau'mo mae nu Belento. Ka' batu anu maboat hondo, mahoson ka' mokut aijo' pinompolubatanmo mae nu Belento, uee anu matombo' hondo da nongingkoti megot. Pinokaumo nu Belento na aha da jojoong i tano', anu jinanji'mo nu belento hi aha ka' binau akonmo sumpa'.

¹⁶ Panyo mompolee' mami nindaka-daka'mo ka' mule' pinanggagamo; iwi-iwi' na palentah nu Belento madi'mo pinajulian nu aha.

¹⁷ Aha madi'mo nohongo-hongo, iwi-iwi' na kanonongan nu Belento madi'mo pinajulian nu aha. Ka' iwi-iwi' na anu binaumo nu Belento oka-okabangangi madi'mo nu inau' nu aha. Kalana aha kinobubuunmo sahingga aha nompile'imo samian anu binau kapala, da momboa aha mamba i Mesir, ka' po ule'mo timbali posaihon. Panyo Belento Tumpu Allah sanang na kinyonyoa mongampuni, talalo hondo sabaan, manonong ka' mule' talalo hondo mongkalibosi. Kalibosan nu belento totu-totu'u madi' hondo ko gampanyo; Belento madi' nompojohok aha.

¹⁸ Aha nombaumo bapilogotan binau nu aha susumo sapi'. Lantas pinoto'imo nu aha, ‘Aiyamo na Tumpu Allah nu belemiu anu nomboamo mae belemiu lengkat i Mesir nonombotuanimo.’ O Tumpu Allah Belento ingalumo nu aha!

¹⁹ Panyo i padang anu mateges aijo' aha madi' ahi' pinala ian nu Belento, kalana Belento talalo ahi' mongkalibosi. Kundom anu tinumatampokmo ka' mule' apu madi'mo ingalinan nu Belento. Binaumo pompotiju'jalan nu aha sinaa ka' mule' pihi.

²⁰Kalana kuasa nu Belento anu ma'ima' hondo aijo' binaumo salaku pokinde' nu Belento hi aha. Aha nongkaanmo manna ka' nonginumo uee sampe sinukup hondo.

²¹Pinatompulu' na taun na kinopinnyo i padang anu ewa hondo saja' pinosukup nu Belento iwi-iwi' apaa na kapalaluan nu aha. Baju' nu aha madi' toho' nahu', tengke nu aha madi' naleso kabai binangkak.

²² Belento nombee'imo aha ka untungan nahampate, nongewa to kala-kalaja'an manjoo' hondo ka' mule' to bansa-bansa i tano' anu mompaha tempas tiba tano' nu aha. Hesbon lipu' nu Tomundo' Sihon, kinajojoonganmo nu aha; Basan lipu' nu Tomundo' Og kinajojoonganmo suele nu aha.

²³ Pinotimbalimo nu Belento na lee' nu aha, susumo mandala' haha aita' i langa na konjoo'nyo. Binee'anmo nu Belento na aha tano' da bau kajojoongan nu aha, tano' anu jinanji'mo nu Belento hi mompolee' nu aha.

²⁴ Lee' nu aha nompatundu'mo tano' Kana'an; Mian anu jojoong ikiijo' pinatundu'mo nu belento. Mian anu palesayamo hi Belento binee'anmo nu Belento kuasa da mombau maumo pa' apaa. Kona hi aha bansa Kana'an ka' mule' hi aha to tomu-tomundo' nu aha.

²⁵ Mian anu palesayamo hi Belento mongkuasaimo iwi-iwi' na benteng anu bau kahosonan nu aha, tano' anu ma omuk ka' mule' laigan anu manjoo' hondo na kakaya'annyo. Iwi-iwi' na bubung ka' bulakan nu uee ingalamo nu aha, ale' nu anggur, ka' mule' kau' zaitun ka' to bua-bua' nu kau' sangga'at. Aha nolompo'mo kalana nongkaanmo yayamo na anu nu kahanda'i nu kinyonyoa nu aha. Iwi-iwi' apaa na anu ma'ima' bibinee'mo nu Belento tina'upmo nu aha.

²⁶ Panyo mian anu palesayamo hi Belento notomuhukmo ka' madi'mo nontuluti Belento, madi'mo nombau apaa na anu kokoonyo nu atulan ka' mule' apaa na anu ingatunmo nu Belento, nompateimo to nabi-nabi anu nonompokinde'imo aha, ka' anu nompalentahmo aha, po ule' palesaya hi Belento, Tumpu Allah nu aha. O Tumpu de Belento po ule' mule' nu alu nu aha,

²⁷sahingga binee'mo nu Belento na aha hi sampobali' nu aha, anu talalo hondo buhingison na balakuasa ka' monsansala aha. Panyo i uno nu kasusa'an anu taha-tahahumo hondo, aha nomoitamo tulung hi belento da otulungi. Kiita' mae i suluga ihongomo mae nu Belento; kalana talalo ahi' molibos, sahingga tinaamanmo mae nu Belento. Sinaimo mae nu Belento na polaya' ka' mule' talenga', anu nompobebasmo aha da madi'mo ko sampobali' mompoposia.

²⁸Panyo salatan lipu' nu aha madi'mo ko anu nompoposia, aha po ule' mule' ahi' binaladosa'. Sahingga po ule' mule' ahi' binee' nu Belento na aha, hi sampobali' nu aha anu nononsansalamo aha. Panyo salatan aha nangalati'mo ka' mule' nompele-pele'mo hondo, aha nomoitamo tulung hi Belento da oposalamat. Sahingga kiita' mae i suluga' ihongomo nu Belento ka' saja'mo tinulungan mae nu Belento. Kalana Belento tinolopaya'mo hi aha ka' mule' talalomo ahi' nolibos.

²⁹ Pinokinde'anmo nu Belento na aha da pangajalan nu belento otapali ahi', panyo aha madi'nontalima atulan nu Belento kalana kinyonyoa nu aha takabun. Padahan de atulan nu Belento obau ahi' na bau-baunyo, tantu mohumpak ka'ima'an na kantumuu'an. Aha panggaga hondo ka' mule' ulawon na kinyonyoa nu aha, madi' mongka'oho' mohongo ka' madi' tulu-tulutan.

³⁰ Taun toka sataun sabaan na Belento mompokinde'i aha; Roh nu Belento mompoto'i aha to nabi-nabi da mompoto'iakon hi aha mian, Panyo mian anu palesayamo hi Belento mongonsongimo bihing nu aha, lantas binee'mo nu Belento na lipu' iwi-iwi' hi to bansa-bansa.

³¹Panyo kalana kalibosan nu Belento talalo ahi' daka', madi' ahi' pinojohok nu Belento kabai pinatean nu Belento na aha. Memang Belentomo na Tumpu Allah anu madi' ko gampanyo; Belento talalo ahi' mongkanonongi, saja' mongkalibosi!

³² O Tumpu Allah, Tumpu Allah mami anu mahoson hondo! Tumpu Allah anu daka' na kakuasa'annyo ka' opalias! Otoongi totu-totu'u nu Belento iwi-iwi' apaa na anu jinanji'mo nu Belento; iwi-iwi' na anu jinanji'Mo nu Belento ginanapanmo ka' binaumo nu Belento. Salatanmo pe'e to tomu-tomundo' nu aha Asyur nonsansalamo kami. Sampe uuka aiya nanjoo'mo hondo na kasansala'an anu ingoa'anmo mami. To tomu-tomundo' mami, imam, nabi tiba to tu'a-tu'anyo mami, ka' suele mompolee'mami ka' mule' aha mian da'isan nongoa'imo kasansala'an iwi-iwi'. Boli okolilimi na kasansala'an haha aijo'! Boli madi'mo o'inau' i uno nu pikilan nu Belento!

³³Kaputusan nu Belento adin, Belento nohukumo kami anu binaladosa'mo; Belento sabole-bole ahi' monginau' kami, maumo kami saja'mo nongoa'i kasansala'an.

³⁴Mompolee' mami, tomundo', imam ka' mule' to tu'a-tu'anyo, nolanggaimo atulan nu Belento ka' madi'mo nontapali. Iwi-iwi' na palentah tiba pokinde' anu binee'mo nu Belento, madi'mo pinajuliannyo ka' madi'mo mule' lewa' pinotombihing.

³⁵Binee'anmo nu Belento to tomu-tomundo' anu nompalentahmo mian anu palesayamo hi Belento, salatan aha jinojoongmo i tano' anu ewa hondo ka' ma'omuk anu bibinee'mo nu Belento. Panyo aha madi' nongkakabasakon kantumuu'an nu aha anu ma'i-ma'idek aijo'. Madi' mongka'oho' tulut totu-totu'u hi Belento ka' mule' madi' monsombah Belento.

³⁶Sahingga uuka aiya kami tinimbalimo posaihon, i tano' anu binee'mo nu Belento salaku pusaka' mami. Tano' aiya ma'omuk manjoo' hondo na hasinnyo, anu sabenannyo ahi' okaanmo mami.

³⁷Iwi-iwi' na hasinnyo anu ohumpak i tano' aiya, tionyo ahi' obee'mo hi to tomu-tomundo' nu lipu' To mia-mian anu balakuasa haha aijo' anu i hangkatmo nu Belento da mompalentah mian anu palesayamo hi Belento. Salaku hukuman nu dosa' anu binaumo mami hi Belento. Aha nompalentahmo mae yayamo pa' apaa na anu nu kahanda'i nu kinyonyoa nu aha, mompalentah butong mami ka' mule' mongkuasai potuu'on mami. Kalana aijo' kami nongoa'imo kasansala'an, saja'mo sinakisa ka' mule' saja'mo tinokan nu kasusa'an!”

³⁸Kalana hahan anu jinadimo aijo', kami mian da'isan aha Israel nombaumo palajanjian totu-totu'u ka' mule' palajanjian aijo' tinulismo ka' sinapmo nu aha to pola-polaya' mami, to mia-mian nu aha Lewi ka' samian na imam mami.