Read Saluan ESTER 4 Bible Online

ESTER 4 - Saluan bible

ESTER 4

¹Salatan i Mordekhai nohongomo apaa na anu jinadimo, bineaknyomo na baju'nyo ka' nompusok hude kalung salaku tanda sinusa'mo hondo na kinyonyoanyo. Kinakambuhakonnyomo na abu' aita' i ubaknyo lantas ilumajangmo i kota' ka' lewa'mo i humang daka-daka' ka' tinongkolibosonmo.

²I ahop nu sabatan daka' nu laigan i tomundo ia tinolotinjomo, kalana mian anu mompusok baju' kalung madi' timbali minsoop.

³Ka' suele i songko-songko na propinsi, to mia-mian nu Yahudi sinusa'mo ka' lewa'mo i humang salatan ihongomo nu aha na anu binebakonmo i tomundo. Aha binapuasa'mo lewa'mo i humang ka' notusa'mo, ka' mule' manjoo'na aha nompusokmo hude kalung ka' lewa'mo nale' i abu'.

⁴Salatan to lalangkoyang tiba to mia-mian anu binee'an kalaja samata-mata mompalakai i Ester Bengkele' nu tomundo nompoto'imo hi ia apaa na anu binaumo i Mordekhai, i Ester sinusa'mo hondo. Pinakatunyomo na baju' hi Mordekhai da bau pombolosi baju' kalung anu pinusoknyomo, panyo i Mordekhai madi'mo nongala baju' aijo'.

⁵Lantas i Ester nolagamo i Hatah, sala'samian anu binee'anmo kalaja i tomundo da samata-mata mompalakai i Ester. Sinainyo na i Hatah mompokilawa hi Mordekhai apaa na anu jinadimo sahingga ia nombaumo sumo aijo'.

⁶Jadi nambamo na i Hatah hi Mordekhai kiijo' i kota' i ahop nu sabatan daka' i laigan nu tomundo.

⁷I Mordekhai nonsisikmo hi ia apaa na anu jinadimo ka' sangkuka na konjoo'nyo nu doi salaka anu jinanji'mo i Haman anu ositon i kas nu tomundo salatan iwi-iwi' na mian nu Yahudi opoko pateimo.

⁸Ka' mule' i Mordekhai nombee'mo hi Hatah sulat i tomundo anu tinulis ka' binebakonmo lengkat mae i Susan anu po'ule'mo tinulis, isinyo te palentah mompatei mian nu Yahudi. Ia nonsaimo i Hatah da sulat aijo' obee' hi Ester, ka' otutuhakon apaa na anu jinadimo tempo' uuka hi ia, ka' mule' momoita da i Ester mangadap hi tomundo mamba mongkakaase da okalibosiakon mae na bansanyo.

⁹Lantas nambamo na i Hatah hi Ester ka' pinoto'inyomo na potuunon mae i Mordekhai hi ia.

¹⁰Panyo i Ester po'ule' mule' nonsai ia namba hi Mordekhai ka' nompotuun sumo uuka,

¹¹“Batu-batu mian pa' mo'ane kabai boune kalu madi' olaga mangadap hi tomundo, lantas sainto-tolo mangadapmo, saba' i popasan nu laigan i tomundo, mohumpakmo hukuman opatei. Aijo' na atulannyo, ka' iwi-iwi' na mian lengkat pe'e hi mian anu lewa' mompokinde'i i tomundo toka-toka hi mian da'isan anu kiijo' mae i to propinsi-propinsi, nonsumbu'mo han aijo'. Ola sa'angu' na jalan na madi' mohumpak hukuman aijo' anu i uno nu atulan aijo', aijo'mo de bisuannyo i tomundo mompotajumo tokonnyo mosoni' mokiijo' hi mian aijo'. De aijo' na jadi yo ia tumuu'. Panyo sambitu'onmo uuka aiya aku madi'mo toho' ilaga i tomundo.”

¹²Lantas pinoto'imo i Hatah hi Mordekhai na potuunon i Ester aijo'.

¹³Jadi i Mordekhai nompotuunmo pokinde' sumo uuka hi Ester, “Boli taha'iman na beleyum ugaat madi' opoposia, pa' ola ahi' mian nu Yahudi sangga'at, kalana beleyum jojoong i laigan nu tomundo!

¹⁴Mian nu Yahudi tionyo ahi ko anu montulungi maumo pa' oposia sahingga madi' osilakai. Panyo de beleyum ola momohokot i han anu susumo aiya, beleyum saidi' mae silaka ka' mule' utus mae nu tuuma nu beleyum madi'mo daagi' ko tuusanannyo. Ihe na monsumbu' i hahan susumo aiya sahingga beleyum pinile'anmo binau bengkele' nu tomundo!”

¹⁵Sahingga pinolelemo i Ester hi Mordekhai sumo uuka,

¹⁶“Posihuk na mian nu Yahudi iwi-iwi' anu itina' i Susan mondo'akon mae aku. Bolimo mongkaan ka' monginum, kopinnyo tolun sinaa ka' tolumpahu. Aku ka' to lalangkoyang anu mompalakai aku suele bapuasa'mo. Lapas aijo' aku mangadapmo hi tomundo, maumo han aijo' mompaha sala'mo tiba atulannyo. De memang aku silakamo kalana aijo', bakasmo da aku silakamo!”

¹⁷Lantas nambamo na i Mordekhai ka' binaunyomo apaa na anu pinotunnyomo mae i Ester hi ia.