Read Saluan ESTER 5 Bible Online

ESTER 5 - Saluan bible

ESTER 5

¹I sinaa kino itolunnyomo na ia binapuasa', i Ester po'ule'mo nompusok baju'nyo salaku bengkele' nu tomundo lantas nambamo nokiijo' tinuminjo i popasan nu laigan nu tomundo i ahop nusabatan anu lewa' kasuhangan i tomundo. I Tomundo tempo'nyo aitu aijo' suha-suhang i kasuhangan nu tomundo mongahopi sabatan aijo'.

²Salatan i tomundo' nontoamo i Ester Bengkele'nyo tinjo-tinjo aijo' i sambiha'nyo, ia nolibosmo hi ia ka' nontangkakonmo tokonnyo moso-mosoni' nokiijo' hi Ester. Jadi nokiijo'mo na i Ester, ka' kinanyangnyo na pusnyo nu tokon aijo'.

³Lantas pinokilawamo i tomundo, “Mosia Bengkele'ku? Apaa na anu nu kahanda'i? Poto'i mae. Mau mintonga' na kalaja'anku na nu poita ku bee'mo.”

⁴Tinaaman i Ester, “De Belento Tomundo sanang da pihi uuka belento Tomundo ka' i Haman toka mae mongkaan anu pinosadiangkumo mompokaan belento Tomundo.”

⁵I tomundo nompoto'imo hi Haman da sampa toka mae, da aha mamba hi Ester aijo'. Jadi nambamo na aha nongkaan hi Ester aijo'.

⁶Salatan aha nonginumo anggur, pinokilawamo i tomundo, “Uuka poto'imo mae pa'apaa na nu kahanda'i. Maumo pa'apaa na nu poita ku bee'mo, maumo mintonga' na kalaja'anku!” Tinaaman i Ester,

⁷“De belento Tomundo sanang mombee' mae anu ku kakaase aiya, yo belento Tomundo ka' i Haman po'ule' toka mae mongkaan anu ku bau dodop malom. Tempo'je mongkaan aijo' na ku poto'i apaa na anu ku kakaase hi Belento.”

⁹Lengkat mae hi Ester Bengkele' i Tomundo nongkaan aijo' sinanangmo na kinyonyoa i Haman ninsusule'. Panyo salatan tinokamo i sabatan daka' i laigan nu tomundo tinoanyomo na i Mordekhai anu madi' tinuminjo nontabea'i ia, ia notambuha'mo hondo.

¹⁰Panyo pagalamo sinabaanakonnyo lantas ia ninsusule'mo i laigannyo. Tinoka kiijo' i laigannyo, pinokaunyomo na to sanga-sangalunyo da toka mae ka' ilaganyomo na i Zeres, bengkele'nyo, da ko susuhang tiba aha.

¹¹Lantas i Haman nolabi-labimo na notatae hi aha ka' nontakabunakonmo kakaya'annyo, konjoo'nyo nu to ana-anaknyo to momo'ane, pangkatnyo anu daka', anu binee' i tomundo, ka' mule' pangkatnyo anu matangkas aijo' anu molingkudui anu ko pangkatnyo sangga'at.

¹²Ia notatae mule', “I Ester bengkele' nu tomundo ola nolaga aku ka' i tomundo namba nongkaan anu ola pinadalakonnyo hi kami, ka' dodop pihi kami po'ule' mule' nulaga.

¹³Panyo iwi-iwi' aijo' madi' ko kaliangannyo de daagi' ku toa na i Mordekhai, aha mian nu Yahudi aijo', sumuhang i sabatan daka' i laigan nu tomundo.”

¹⁴Nohongo potatae aijo' bengkele'nyo ka' iwi-iwi' na to sanga-sangalunyo nombee'imo pikilan sumo uuka, “Pokaumo na mian mombau ohi' tangka-tangkas uampulu' ka' ohua' na meten. Lantas dodop subu-subu pomoitamo kaloasan hi tomundo da opokalayo'mo na i Mordekhai i ohi' aijo'. Tiba jalan anu sumo aijo' sanangmo na kinyonyoa nu beleyum mamba mongkaan.” Pikilan anu binee' nu aha aijo' ma'ima' hondo na tinutugan i Haman, kalana aijo' i sampamo nokibau ohi' bau pompokalayo'an aijo'.