Read Saluan ESTER 6 Bible Online

ESTER 6 - Saluan bible

ESTER 6

¹Pihi-pihi aitu suele i tomundo madi'mo tinohoyot. Kalana aijo' pinokipoitakonnyomo da o'alamo mae na kitab pinontulisan sisikon nu kalaja'an ka' pinalentahnyomo na mian nombasa'akon.

² I kiijo' i humpaknyomo na tulisan taalu' i Mordekhai nompoto'imo daagi' ko anu kahanda' mompateimo i tomundo, anu nombau tanga'an aijo'mo, i Bigtan ka' i Teres, ua'aha aijo' mian anu binee'anmo kalaja monjagai salipi' nu tomundo.

³Pinokilawamo i tomundo, “Apaamo na binau pinoholomati ka' pinombalosi i Mordekhai anu nokalajamo ma'i-ma'ima' aijo'?” To posa-posaihon haha aijo' nontaami, “Ia madi' nohumpak apa-apaa.”

⁴Lantas notataemo na i tomundo, “Ihe na anu ko pangkatnyo mokalaja hi belengku anu kiijo' i laigan nu tomundo uuka aiya?” I Haman sala'je ninsoop i popasan nu laigan i tomundo; ia ko kahanda' momoita kaloasan hi tomundo' da opokalayo'mo na i Mordekhai i ohi' anu pinotinjomo aijo'.

⁵Posaihon haha aijo' nontaami i tomundo, “i Haman na kiijo' i laigan nu tomundo ka' ia ko kahanda' mangadap hi belento Tomundo.” “Pokau mae da ia minsoop,” na koonyo i tomundo.

⁶Salatan i Haman ninsoopmo, i tomundo notataemo hi ia, “Daagi' ko mian anu kahanda' ku bee'i salaku bau poholomati anu daka' hondo. Apaa na anu kahanda' ku bau hi ia?” Koonyo i Haman i uno nu kinyonyoanyo, “Ihe mule na o holomati daka hondo i Tomundo? Pasti akumo!”

⁷Mokonyo aitu tinamanyo, “Kahanda'nyo mianitina o'alapimo baju' pesalin anu biasa nu pusok i Tomundo. Lantas ajahan i Tomundo obungu-bungai nu bunga-bunga anu pontandai kalaja'an.

⁹Samian na anu daka' na pangkatnyo i negara aiya, anu tulunan mae nu mian daka' aijo' na tionyo opopusoki baju' ka' iamo aijo' na nu holomati i Tomundo, lantas opolondimo na mian aijo' monsake'i ajahan i Tomundo montulu lapangan i uno nu kota'. Mian anu daka' na pangkatnyo aijo' na lumajang mamba momona ka' molobo'akon daka-daka', ‘Sumo aiya na i tomundo' mongangga'i mian anu nu holomati.’ ”

¹⁰Lantas notataemo na i tomundo' hi Haman, “Palia-lia', ala mae na baju' ka' ajahan aijo' ka' bee' na apa-apaa anu bau pohomati i Mordekhai, mian nu Yahudi aijo'. Obau susumo anu tinaloakonumo u'uka, madi' timbali sa'angu' na madi' obau. Ia nu tokai kiijo' suha-suhang i ahop nu sabatan i laigan nu tomundo.”

¹¹Lantas i Haman nongalamo baju' ka' kuda aijo' ka' pinopusoknyomo hi Mordekhai. Salatan i Mordekhai nonsake'imo ajahan aijo' pinolondemo i Haman nontulu lapangan i uno nu kota' ka' lewa' ilobo'akonnyo, “Potoakon, sumo aiya na tomundo mongangga'i mian anu nu holomati i tomundo!”

¹²Lapas aijo' i Mordekhai po'ule'mo ninsusule' i sabatan daka' i laigan nu tomundo. Panyo i Haman sampamo ninsusule'. Ia madi'mo mongka'oho' nutoa nu mian, kalana ia na'ambangmo hondo sahingga kinukumbungannyomo na ohupnyo.

¹³Hi bengkele'nyo pinonsisikannyomo ka' hi to sanga-sangalunyo apaa na anu ingoa'annyomo. Jadi bengkele'nyo ka' to sanga-sangalunyo anu toto pande-pande haha aijo', nompoto'imo hi ia, “Kahosonan nu beleyum nu hungku'imo i Mordekhai. Ia mian nu Yahudi, madi' nupoko ala nu beleyum na mongewa ia. Ia na tionyo mohungku'i beleyum.”

¹⁴Hau-haunyo bengkele'nyo tiba to sanga-sangalunyo daagi' bahou tiba i Haman, to mia-mian anu ko pangkatnyo kiijo' i laigan nu tomundo' kinosia-sia'mo na tinoka momboamo i Haman mamba mongkaan anu pinosadiamo i Ester.