Read Saluan ESTER 7 Bible Online

ESTER 7 - Saluan bible

ESTER 7

¹Jadi kinopinduannyomo na i tomundo ka' i Haman nongkaan nonginum hingga-hinggat tiba i Ester.

²Hau-haunyo nonginumo anggur, i tomundo nompokilawa mule' hi Ester, “Yo mosia, Bengkele'ku, apaamo na anu nu kahanda'i? Poto'imo mae! Apaa na anu nupoita tionyo ku bee'mo, maumo anu nu poita aijo' mintonga' na kalaja'anku.”

³Tinaamanmo i Ester Bengkele' i tomundo aijo', “De sanang na kinyonyoa nu Belento Tomundo, ku poita da aku tiba bansangku daagi' opotumuu'.

⁴Kalana aku tiba bansangku pinobalukmo da opatei. De kami ola ahi' pinobaluk ka' obau posa-posaihon yo aku ola ahi' momohokot, ka' madi' mompoposia belento Tomundo. Panyo uuka aiya kami opateimo ka' ohopu'imo ingko-ingkot!”

⁵Lantas pinokilawamo i Tomundo Ahasyweros hi Bengkele'nyo i Ester, “Ihe na baani kahanda'mo mombau anu sumo itina'? Mian itina' iyamae?”

⁶Tinaaman i Ester, “I Haman anu ma'i-ma'idek na kalakuannyo aitu, aiyamo ia na sampobali' ka' anu monsakisamo kami!” Tinonto'anmo i Haman na i tomundo ka' bengkele'nyo ka'nabuhukmo.

⁷I tomundo notambuha'mo hondo, lantas ia nambamo nompala'i meja' ka' nosabatmo, nokiijo'mo i taman i laigan nu tomundo. Sinumbu'mo i Haman na i tomundo taalu' nongalamo kaputusan mohukumo ia, kalana aijo' sinajojoongnyomo na ia hi Ester Bengkele' nu tomundo aijo' momoita da ia opotuu'.

⁸Kalana madi'mo nutaha'imani i Haman na butongnyo tumuu' sahingga tinua'akonnyomo na butongnyo i koi kahoyotan i Ester momoita ampun, panyo hau-haunyo aitu suele i tomundo ninsusule'mo mae lengkat mae aijo' i taman i laigan i tomundo. Nontoa i Haman sinumo aijo'mo, i tomundo tinolosegamo, “Beh totu'u ia Daagi' ahi' baani kahanda' mongkamale'i bengkele'ku aiya, i ahopku ka' aiya i laiganku?” Madi' pinin salatan tinaloakonmo i tomundo na potataenyo haha aijo', to mia-mian anu ko pangkatnyo tinokamo mae nonsoku' ubak i Haman nu hude.

⁹Lantas koonyo i Harbona, sala'samian aha anu koko pangkatnyo aijo', “Kita Tomundo, kiijo' koko laigan i Haman ko ohi' bau pompokalayo'an kotangkasnyo 22 meten. Pinototonmo i Haman bau pompokalayo'annyo i Mordekhai, mian anu nompotumuu'mo nyawa i Tomundo.” Lantas pinalentahmo i tomundo, “Pokalayo'mo na i Haman i ohi' itina'!”

¹⁰Sumo aijo' na i Haman pinokalayo'mo i ohi' anu pinototonnyomo anu kiniboli' bau pompokalayo'annyo i Mordekhai, lantas ilapas na aijo' atina'je ka' i tomundo madi'mo notambuha'.