Read Saluan ESTER 9 Bible Online

ESTER 9 - Saluan bible

ESTER 9

¹Ahennyo tinokamo i tanggan sampulu' ka' totolu' bitu'on Adar, aijo'mo na sinaa anu sinanggomo da pomposidanmo palentah i tomundo kona hi aha to mia-mian Yahudi. Sinaamo ai-aijo' na anu titinanda'anmo nu aha sampobali' nu bansa Yahudi da opatundu'mo na bansa aijo'. Padahan ola mule' ahi' bansa nu Yahudi na nompatundu'mo aha.

²I toto sa'angu' na kota', to mia-mian nu Yahudi sinihukmo ka' nosa'angu'mo ka' nontumbuhimo iwi-iwi' mian anu ko niat ma'idek hi aha. Bansa-bansa sangga'at iyayamae nabuhukmo hi aha, sahingga madi'mo ko samian na anu baani mongahopi aha.

³Pakalaus iwi-iwi' na to mia-mian anu matangkas na pangkatnyo i propinsi, to gubernur-gubernur, to kapa-kapala da'erah, ka' anu ko pangkatnyo i kalaja'an nonsangaja'imo mian nu Yahudi kalana iwi-iwi' nabuhukmo hi Mordekhai.

⁴I songko-songko na kalaja'an sinumbu'mo nu mian na i Mordekhai okabuhuk ka' oholomati hondo nu mian kiijo' i laigan nu tomundo ka' nompaka daka'mo hondo na kuasanyo.

⁵Sumo aijo' na bansa Yahudi nombau sampobali' nu aha iwi-iwi', sahingga madi'mo aha nabuhuk hi sampobali' nu aha, toongon nu aha nontumbuhi aijo'mo bajak na pinompatei nu aha.

⁶Kiijo' i Susan puso nu kota nu Negara, mian nu Yahudi nompatei aha lima atu na mian.

⁷Anu sinilaka aijo', kiijo'mo galo-galo' na anak i Haman aha sampulu' to momo'ane, anak i Hamedata anu talalo hondo monsampobali' mian nu Yahudi. Aha aijo' atina'mo: i Parsandata, i Dalfon, i Aspata, i Porata, i Adalya, i Aridata, i Parmasta, i Arisai, i Aridai ka' i Waizata. Panyo mian nu Yahudi madi' lewa' nontololangi anu nu mian.

¹¹I sinaamo aijo' na mian nompoto'i hi tomundo konjoo'nyo nu mian anu pinatean i kota' Susan.

¹²Koonyo i tomundo hi Ester Bengkele'nyo, “Ola pe'e i kota' Susan 500 mo na mian na pinatean nu mian Yahudi, tibamo anak i Haman aha sampulu'. Tantu lebe manjoo' mule' na kiijo' mae i propinsi-propinsi! Pa' apaamo na binau nu aha kiijo' mae! Jadi daagi' apaa na nu poita uuka? Poto'imo mae nuhumpakmo na anu nu poita!”

¹³Tinaaman i Ester, “De sanang na belento Tomundo da mian nu Yahudi anu jojoong i Susan dodop daagi' subu mompaka bau mule' susumo anu binaumo nu aha sinaa aiya. Ka' mule' to ana-anak i Haman anu sinilakamo aijo' tionyo ahi' opaha pokalayo' i ohi' pompokalayo'an haha aijo'.”

¹⁴Lantas pinalentahmo i tomundo' da obaumo na anu pinoita i Ester; sulat palentah da obau i kota' Susan tinulismo ka' pinakatumo, ka' anak i Haman anu aha sampulu' aijo' pinokalayo'mo.

¹⁵Jadi i tanggan sampulu' ka' opat bitu'on Adar, to mia-mian nu Yahudi i kota' Susan sinihuk nosa'angu' mule' ka' nompateimo aha 300 na mian i kota' aijo. Ka' mule' aha tempo'nyo aitu madi' ahi' nontololangi anu nu mian.

¹⁶To mia-mian nu Yahudi anu jojoong i propinsi-propinsi suele sinihukmo ka' nosa'angu'mo da mahampatemo na aha. Aha nompatundu'mo sampobali' nu aha ka' nompateimo 75.000 na mian anu mongka'ideki aha. Panyo aha madi' montololangi anu nu mian.

¹⁷Han aijo' jinadi i tanggan sampulu' ka' totolu' bitu'on Adar. Dodododopnyo mule' i tangga kinosampulu'nyomo ka' opat, aha sabenannyo madi'mo timbali mompatei, panyo molame'akonmo ahi' sinaa aijo'.

¹⁸Panyo mian nu Yahudi anu jojoong i Susan nolame'akonje i tanggan sampulu' ka' olima' binaumo sumo sinaa daka', kalana aha nompateimo sampobali' nu aha i tanggan sampulu' ka' totolu', ka' i tanggan sampulu' ka' opat, lantas madi'mo aha nompahampateakon i tanggan kinosampulu'nyomo ka' olima'.

¹⁹Kalana aijo' mian nu Yahudi anu jojoong i kota toto ise-ise' saja' molame'akan i tanggan sampulu' ka' opat bitu'on Adar salaku sinaa kalame'an, sinaa pombauan bau-bauon ka' balame-lame', ka' mompaha bagi-bagii anu okaan.

²⁰Lapas aijo' i Mordekhai nontulismo iwi-iwi' na anu jinadimo aijo' ka' nompakatumo sulat hi iwi-iwi' na mian nu Yahudi anu jojoong i songko-songko na kalaja'an nu Persia, mau anu majo'on, mau anu ohani.

²¹Onyi'nyo nu sulat aijo' mompalentahkon da olame'akon na tanggan sampulu' ka' opat ka' sampulu' ka' olima', bitu'on Adar sataun toka sataun.

²²Kalana i sinaamo aijo' na aha iwi-iwi' nompatundu'mo sampobali' nu aha iwi-iwi', sahingga kasusa'an ka' kasansala'an nu aha tinimbalimo kalame'an ka' kabilahian. Kalana aitu aha tionyo molame'akon sinaa haha aijo' obauakon bau-bauon mongkakaan ka' mompaha bagibagii kaanon ka' mule' mombee'i apa-apaa hi mian kasiasi.

²³Mian nu Yahudi nohongo-hongomo hondo palentah i Mordekhai ka' mule' lamean aijo' tinimbalimo adat saja' obau sataun toka sataun.

²⁴ I Haman anak i Hamedata, lee' mae i Agag, sampobali' hondo nu mian Yahudi, binuangakonmo onde anu osanggohi suele “Purim” da bau pompatantuan sinaa bau pompateian mian nu Yahudi; ia kino tanga'anmo da mompateimo aha iwi-iwi'.

²⁵Panyo i Ester na nangadapmo hi tomundo, ka' pinalentahkonmo i tomundo, palentahnyo aijo' tinulis anu nonsaduakonmo tanga'an ma'idek anu binau i Haman nosi konamo posi butongnyo, sahingga ia ka' to ana-anaknyo pinokalayo'mo i ohi' anu binau da pompokalayo'an.

²⁶Kalana aijo' sinaa daka' anu lewa' olame'akon aijo' osanggohi suele purim. Sulat i Mordekhai ka' iwi-iwi' na anu ingoa'anmo nu mian nu Yahudi,

²⁷nonsaduakon da aha nosi baumo atulan anu kona hi posi butong nu aha, kona hi lee' nu aha ka' kona hi iwi-iwi' mian anu ninsoopmo bansa Yahudi. Koonyo nu atulan aijo' sataun toka sataun aha tionyo ahi' molame'akon ohu-ohua' na sinaa aijo' anu pinoto'imo i Mordekhai.

²⁸Ka' mule' pinotataapmo da sampe toka sidu-sidutu' sinaa polame'akonan Purim aijo' saja' o'inau' ka' olame'akon nu batu-batu auwan nu Yahudi tulunan toka tulunan mae sa'angu' hi toto sa'angu' na propinsi ka' kota.

²⁹Ka' mule', hingga-hinggat tiba sulat i Mordekhai; i Ester Bengkele' nu tomundo anak i Abihail nontulismo suele sulat ko ohua'nyo anu lebe mompokeemakon isi nu sulat i Mordekhai mongkona Purim aijo'.

³⁰Sulat aijo' pinakatu toka hi iwi-iwi' na mian nu Yahudi, ka' suele anu po'ule' tinulis susumo sulat aijo' na isinyo pinakatu toka hi 127 na propinsi nu kalaja'an Persia. Sulat aijo' dino'akon da bansa Yahudi saja' mohumpak ka'ima'an ka' madi'mo ko anu mompoposia.

³¹Sulat aijo' suele mongkakeha'akon da aha ka' lee' nu aha saja' molame'akon sinaa monginau' Purim kona i tempo'nyo hondo-hondo madi' timbali sala', susumo aha lewa' molame'akon puasa' ka' lewa'mo mombau adat nu tomate. Aijo'mo na isinyo nu sulat i Mordekhai ka' i Ester Bengkele' i tomundo.

³²Palentah i Ester anu nontantukanmo atulan haha aijo' nu Purim, tinulismo i sa'angu' na kitab.