Read Saluan NOSABATMO 11 Bible Online

NOSABATMO 11 - Saluan bible

NOSABATMO 11

¹Tumpu notataemo hi Musa, “Aku mompotokamo mae sa'angu' na balaa' mule' hi tomundo Mesir ka' hi layatnyo. Lapas aijo' nu pobee'je na belemiu mamba. Pakalaus belemiu iwi-iwi' nu laa'mo mompala'i tampat aiya.

²Kalana aijo' basale'mo tiba bansa Israel; pokau na aha momoita mainan mosoni' ka' salaka hi anu mompaha ohani laigan nu aha.”

³Nupotimbalije nu Tumpu na mian nu Mesir da mongkanonongi aha mian nu Israel. Ka' i Musa timbalimo mian anu talalo hondo o'angga'i nu aha anu ko pangkatnyo ka' songko-songko na layat nu Mesir.

⁴I Musa notataemo hi tomundo, “Sumo uuka na Tumpu notatae, 'Kila-kila tonga' pahu Aku mololomo tano' nu Mesir.

⁵Batu-batu anak tumpe mo'ane i Mesir tionyo mate, lengkat pe'e hi anak nu tomundo Mesir toka-toka hi anak nu posaihon boune anu monggiling gandum. Anak nu to potu-potuu'on anu momona inganakakon, iwi-iwi' tionyo mate suele.

⁶I songko-songko na Mesir o hongomo na tando' anu tahahumo, susumo anu ma'isa toho' jinadi ka' madi'mo po'ule' jadi.

⁷Panyo hi aha mian nu Israel, mau manusia mau pe'e potuu'on madi' opoposia. Sahingga osumbu'je miu taalu' Aku, Tumpu, nonggihanakonmo mian nu Mesir ka' mian nu Israel madi' pokakana.' ”

⁸Ahennyo i Musa notataemo, “Iwi-iwi' na aha anu ko pangkatnyo anu mokalaja hi belento Tuanku tionyo toka ka' tolodadupu i ahopku ka' momoita da aku ka' bansangku mompala'imo lipu' aiya. Lapas aijo' mambamo na aku.” I Musa sinumpumo hondo lantas pinala'iannyomo na i tomundo.

⁹Tumpu notataemo hi Musa, “I tomundo madi' mompajuli potatae nu beleyum, da Aku mombau lebe manjoo' na anu okabangangi hi songko-songko na Mesir.”

¹⁰I Musa ka' i Harun nombaumo iwi-iwi' na anu okabangangi aijo' i ahop nu tomundo, panyo Tumpu nompotimbalimo ia pinanggagamo, sahingga ia madi' mongka'oho' mompobee' aha mian nu Israel mompala'i lipu'nyo.