Read Saluan NOSABATMO 12 Bible Online

NOSABATMO 12 - Saluan bible

NOSABATMO 12

¹ Tumpu notataemo hi Musa ka hi Harun, i tano' nu Mesir. Ia notatae,

²“Bitu'on aiya timbalimo bitu'on anu bau tanggan nu belemiu anu saja' o inau' sataun toka sataun.

³Poto'i na palentah aiya hi aha iwi-iwi' mian nu Israel. Tanggan sampulu' bitu'on aiya batu-batu mo'ane tionyo mongkolot sa'angu' na anak nu domba da okaan nu aha sa'anakan hingga-hinggat.

⁴De aha sa'angu' na auwan aijo' madi' manjoo' na miannyo mompomingkot sa'angu' na anak nu domba, saba' auwan aijo' ka' auwan anu mompaha ohani aijo' timbali mongkaan hingga-hinggat anak nu domba aijo'. Sangkuka na konjoo'nyo na mian anu mongkaan, sumo aijo'mo na konjoo'nyo na obagi-bagiakon na anak nu domba aijo'.

⁵Belemiu timbali mompile'i domba kabai mee' panyo tionyo ahi' mo'anenyo, umunnyo sataunmo ka' anu madi' ko panyakitnyo.

⁶Osegoti pe'e miu sampe toka i tanggal sampulu' ka' opat. Toka i sinaa aijo' mamalomnyo iwi-iwi' na aha mian nu Israel tionyo ahi' mongkolotmo anak nu domba aijo'.

⁷Baso'yo sangkiding tionyo ahi osapuakon i ohu-ohua' na ohi' nu sabatan, ka' aita' i buannyo nu sabatan nu laigan anu pongkaanan nu aha.

⁸Pihi-pihimo aijo' ahi' na antoknyo o tunui ka' okaan tiba utan anu mapakat ka' roti anu madi' ko raginyo.

⁹Anak nu domba aijo' tionyo ahi' o tunui iwi-iwi' tiba ubaknyo, tengkenyo ka' unonyo nu kompongnyo. Kaan na antoknyo anu tinunuanmo aijo', boli mongkaan anu daagi' mata' kabai anu okuluki.

¹⁰Boli opotuha' mau pe'e sangkiding sampe toka dodop daagi' subu; de daagi' ko labinyo tionyo ahi' opapui sampe mingkot.

¹¹Pusokmo totouka na baju' anu opake lumajang tiba sandaan ka' tokon otoongimo, atina'je ka' belemiu mongkaan. O lia-lia'i na belemiu mongkaan. Sumo aijo' na molame'akon Paskah bau pongadati Aku, Tumpu.

¹²Pihi aijo' Aku lumajangmo monsongkohi tano' nu Mesir, ka' mompateimo to ana-anak tumpe mo'ane, mau manusia mau pe'e binatang. Ku hukumo na pilogot iwi-iwi' i Mesir, kalana Akumo na Tumpu.

¹³Baso' anu i sabatan nu laigan nu belemiu bau pontandai laigan haha atina' kajojoongan nu belemiu. De Ku toamo na baso' aijo' belemiu so'mo Ku liu-liu ka' madi' Ku silakai de Aku mohukumo Mesir!

¹⁴ Sinaa aijo' tionyo ahi olame'akon nu belemiu salaku sinaa daka' pongadati Tumpu. Jadi tionyo ahi saja' olame'akon na sinaa aijo' sataun toka sataun.”

¹⁵Tumpu notatae, “Pitun sinaa na kopinnyo, belemiu madi' timbali mongkaan roti anu ko raginyo. I sinaa anu momona iwi-iwi' na ragi anu itina' i laigan nu belemiu tionyo ahi osabatakon, kalana de pitun sinaa na kopinnyo aijo' daagi' ko mian anu mongkaan roti anu ko raginyo, ia madi'mo timbali mian anu osanggohi mian anu pinalesayamo hi beleng-Ku.

¹⁶I sinaa anu momona, ka' suele i sinaa anu ko pipitu'nyomo, belemiu sihukmo da monsombahmo. I sinaa aijo' belemiu madi' timbali mombau hia mau mule' pa' apaa, boli mompiakon kapalaluan momposadia anu okaan.

¹⁷I sinaa aijo' iwi-iwi' na bansa nu belemiu Ku boamo mompala'imo Mesir. Kalana aitu aiya mae i ahop, sataun toka sataun sinaa aijo' tionyo ahi' olame'akon nu belemiu salaku sinaa daka'.

¹⁸I bitu'on anu momona, otampu'uni tanggal sampulu' ka' opat pihinyo toka-toka i tanggal uampulu' ka' sa'angu' pihinyo, belemiu madi' timbali mongkaan roti anu ko raginyo. Pitun sinaa na kopinnyo aijo' iwi-iwi' na ragi anu i laigan nu belemiu osabatakon. Mian nu Israel kabai mian anu i salipu'an mae anu hau-haunyo molame'akon aijo' lantas mongkaanmo roti anu ko raginyo, madi' osanggohi mian anu palesayamo hi beleng-Ku.”

¹⁹

²⁰

²¹I Musa nolagamo iwi-iwi' na polaya' nu aha Israel ka' nompoto'i hi aha, “Lako'mo ka' ala sa'angu' na anak nu domba toto sangauwan sa'angu' da bau polame'akonan Paskah.

²²Ala na hemput anu batangnyo ko honnyo die' ka' opuuti olobongakon i mangko' anu ko isinyo baso' nu domba aijo' lantas osapuakon i ohi' ohu-ohua' aijo' i sabatan ka' aita' i buannyo nu sabatan aijo' i laigan nu belemiu. Sampe toka dodop daagi' subu madi' timbali ko samian anu atina' hi belemiu mompala'i laigannyo.

²³ Salatan Tumpu lumajangmo monsongkohi lipu' aiya kahanda mompateimo to ana-anak nu Mesir, nutoa nu Tumpu na baso' anu aijo' i ohua' na ohi' ka' aita' i buan nu sabatan i laigan nu belemiu, saba' ia ola lamba-lamba ka' madi' mompobee' Malaekat Kapatean mompinsoopi laigan nu belemiu, mompatei belemiu.

²⁴Belemiu ka' to ana-anak nu belemiu tionyo ahi' mohongo-hongo palentah aijo' sampe toka sidu-sidutu'.

²⁵De belemiu mompinsoopimo lipu' anu jina-jinanji'mo nu Tumpu hi belemiu, belemiu tionyo ahi' mombau adatnyo susumo aiya.

²⁶De to ana-anak nu belemiu mompokilawa, 'Apaa na alati'nyo nu adat aiya?'

²⁷Belemiu tionyo ahi' montaami, ‘Aiya koloban nu Paskah bau pongadati Tumpu, kalana laigan nu aha mian Israel, kiijo' mae i Mesir pinolilit-Nyo, tempo'nyo Ia nompatei to ana-anak mo'ane anu tumpe i Mesir ka' kita pinobee'-Nyomo tinumuu'!’ ” Sahingga dinumaladupumo na aha mian Israel, ka' nonsombah.

²⁸Lantas aha nambamo ka' nombaumo apaa na anu pinalentahkonmo nu Tumpu hi Musa ka' hi Harun.

²⁹ Tonga-tonga' pahu aijo' Tumpu nompateimo iwi-iwi' na anak mo'ane anu tumpe hi bansa Mesir, lengkat pe'e hi anak nu tomundo toka-toka hi to ana-anak nu mian anu tinalungku'mo. Iwi-iwi' na potuu'on anu inganakakon momona suele pinatean.

³⁰Pihi-pihi' aijo' i tomundo ka' aha anu ko pangkatnyo ka' iwi-iwi' na mian nu Mesir, singkapmo nobula. I songko-songko na lipu' nu Mesir me saja' i hongo haang anu montando'i kalana madi' ko sa'angu' pe'e na laigan na madi' ko samian na anak mo'ane sinilaka.

³¹Pihi-pihimo aijo' na i tomundo nolaga i Musa ka' i Harun ka' nompoto'i, “Lako'mo na komiu iwi-iwi'! Pala'imo na lipu'ku. Lako'mo mamba monsombah Tumpu Allah nu belemiu susumo anu pinoitamo nu belemiu.

³²Boa na sapi' iwi-iwi', domba ka' mee' nu belemiu, ka' lako'mo lamba! Poitakon mae balakat suele na aku!”

³³Mian nu Mesir sabole-bolemo nompakisa mian nu Israel da sampamo mamba mompala'i lipu' aijo'. Aha notatae, “Kami iwi-iwi' silakamo de belemiu madi' sampa mamba!”

³⁴Lalu to mia-mian nu Israel haha aijo' nongalamo iwi-iwi' na kuhon nu aha ko isinyo roti anu pinaha komponmo anu madi' ko raginyo, tinibunmo nu aha nu hude ka' binibitmo nu aha.

³⁵ Aha suele nombaumo apaa na anu pinoto'imo i Musa, aijo'mo momoita mainan mosoni' ka' salaka, ka' baju' nu aha mian Mesir.

³⁶Tumpu nompotimbalimo mian nu Mesir da mongkanonongi aha mian nu Israel, sahingga aha nombee'mo iwi-iwi' apaa na anu pinoitamo nu aha mian nu Mesir. Tiba jalan anu sumo aijo' mian nu Israel nomboamo kakaya'an nu aha mian nu Mesir nosabat nompala'imo lipu' aijo'.

³⁷Mian nu Israel nambamo ka' i lumajang tengke lengkat i kota Raamses nambamo i kota Sukot. Konjoo'nyo nu aha 600.000 na mian, madi' binilang na boune ka' to ana-anak.

³⁸Aha nomboa manjoo' na sapi' domba ka' mee'. Ka' mian anu i salipu'an mae suele pa' aha sangkuka na konjoo'nyo nombatukimo.

³⁹Aha nontunumo roti anu madi' ko raginyo anu kinomponmo, anu binoa mae nu aha lengkat i Mesir. Aha i laa' pinotolokengkeng sahingga madi' kino tempo' da nontoukaimo mantu.

⁴⁰ Bansa Israel jinojoong kiijo' mae i Mesir 430 mo na taun na kopinnyo.

⁴¹I sinaa pupuusnyomo nu taun ko 430 nyomo aijo' iwi-iwi' na mian anu pinalesayamo hi Tumpu nojonjulumo nompala'imo mae tano' nu Mesir.

⁴²Pihi-pihi aitu Tumpu nonjagaimo aha nonsabatakon mompala'imo Mesir. Ka' aijo'mo na pihi anu saja' osombahkon hi Tumpu salaku pihi anu saja' o inau'. Pihi aijo' mian nu Israel tionyo ahi' balajaga-jaga.

⁴³Tumpu notatae hi Musa ka' hi Harun, “Aiya na atulan molame'akon Paskah. Mian anu i salipu'an mae madi' timbali mongkaan antok nu domba anu sinombahkonmo i sinaa nu Paskah.

⁴⁴Panyo botuan anu ingolimo nu belemiu timbali mongkaan de ia o sunatmo.

⁴⁵Mian anu i salipu'an mae kabai anu toka mae molio tambo, madi' timbali mongkaan.

⁴⁶ Iwi-iwi' na antok nu domba aijo' tionyo ahi okaan i uno nu laigan ka' madi' timbali oboa i sambiha'nyo. Sa'angu'pe'e na bukunyo boli opato'akon.

⁴⁷Iwi-iwi' na mian Israel tionyo ahi' molame'akon lamean aijo'.

⁴⁸Mian anu madi' sinunat madi' timbali mongkaan kaanon nu lamean aijo'. De mian anu i salipu'an mae anu tinataapmo jinojoong hi belemiu ko kahanda' molame'akon Paskah bau pongadati Aku, Tumpu, iwi-iwi' na mo'ane i auwan nu aha tionyo ahi' momonanyo o sunat pe'e. Lapas aijo' aha o lekengje susumo mian nu Israel totu-totu'u, ka' timbalimo molame'akon Paskah.

⁴⁹Atulan aiya pokakana na opake mongkona aha anu memang ahi' Israel ka' hi mian anu i salipu'an mae anu jojoongmo tataap itina' hi belemiu.”

⁵⁰Iwi-iwi' na mian nu Israel mohongo-hongo ka' mombau iwi-iwi' apaa na anu pinalentahkonmo nu Tumpu hi Musa ka' hi Harun.

⁵¹I sinaa aijo' tumpu nomboamo iwi-iwi' mian nu Israel nosabatmo nompala'imo Mesir.