Read Saluan NOSABATMO 18 Bible Online

NOSABATMO 18 - Saluan bible

NOSABATMO 18

¹I Yitro, monian i Musa tuuma nu bengkele'nyo, imam nu Midian, nohongomo mae iwi-iwi' apaa na anu binaumo nu Tumpu Allah hi Musa ka' i bansa Israel, tempo'nyo ia nomboamo aha nosabat lengkat i Mesir.

² Lantas nambamo na i Yitro nolenga i Musa nomboa i Zipora, bengkele i Musa anu daagi' jinojoong kiijo' mae i Midian,

³ tiba anaknyo to momo'ane ua-ua'aha, i Gersom ka' i Eliezer. Anak tumpe sinanggohannyo i Gersom kalana i Musa notatae, “Aku mian anu lengkat mae i salipu'an namba mae i aiya”,

⁴anak tuenyo sinanggohan i Eliezer kalana i Musa notatae, “Tumpu Allah anu lewa' osombah nu mompolee'ku nontulungimo mae ka' nomposalamatmo aku sahingga aku madi' pinatean nu tomundo Mesir.”

⁵I Yitro tinokamo tiba bengkele' i Musa ka' anaknyo ua'aha i padang bola tampat pinombauan i Musa kemah koko bungkutnyo anu susi'.

⁶Pinosumbu'mo hi Musa na aha tinokamo mae,

⁷sahingga ia nosabat mae da molabot aha. Ia tinolodadupumo i ahop hi Yitro ka' ingookannyo. Aha nompaha poki-pokilawamo pa' aha toto samian mahoson ahi' lantas ninsoopmo nokiijo' i kemah i Musa.

⁸I Musa nonsisikmo hi moniannyo iwi-iwi' apaa na anu binaumo nu Tumpu hi tomundo ka' hi bansa Mesir da momposalamat aha mian Israel. Ia mule' nonsisikmo hi moniannyo mosia na kasansala'an anu ingoa'anmo nu bansa Israel namba mae ka' mosia na Tumpu nomposalamatmo aha.

⁹Nohongo iwi-iwi' aijo', i Yitro i lame'mo,

¹⁰ka' notatae, “Opuji' na Tumpu anu nomposalamatmo belemiu i lima nu tomundo ka' hi bansa Mesir! Opuji' na Tumpu anu nompobebasmo bana Israel da madi'mo binotuanan!

¹¹Uuka aiya sinumbu'kumo taalu' Tumpu na lebe daka' molingkudui pilogot iwi-iwi', kalana iwi-iwi' aijo' binau-Nyomo tempo'nyo mian nu Mesir nongkabisa'imo ka' kinobubuunmo hondo hi aha mian Israel.”

¹²Lapas aijo' i Yitro nomboamo tino pia-piangkuka na koloban anu otunui ka' koloban anu o kolot da osombahkon hi Tumpu Allah. I Harun ka' to pola-polaya' iwi-iwi' nu aha bansa Israel tinokamo ka' nongkaanmo hingga-hinggat tiba i Yitro ka'ingatuhanmo nu Tumpu Allah.

¹³Dodododopnyo i Musa nongulusmo anu nahantuda' aijo' hi aha to mia-mian nu Israel. Pakalaja'an aijo' pinin hondo lengkat pe'e daagi' subu sampe i nalom.

¹⁴Salatan tinoa i Yitro iwi-iwi' aijo' i Musa na tionyo mongulus, ia nompokilawamo, “Te apa-apaamo na anu tionyo beleyum na mongulus hi bansa aiya? Te iwi-iwi'mo aijo' ola posi beleyum na mongulus, sahingga mau ola momoita pokinde' hi beleyum, mian haha aijo' sabinmo na tuminjo i aiya lengkat pe'e daagi' subu sampe malom?”

¹⁵Tinaaman i Musa, “Mian haha aijo' toka mae hi belengku kahanda' monsumbu' pa' mosia na koonyo nu Tumpu Allah.

¹⁶De aha mahang ka'idekimo aha mambamo mae hi belengku da palakala nu aha oputusi, ka' ku poto'imo hi aha na to pale-palentah ka' to atu-atulan nu Tumpu Allah.”

¹⁷I Yitro notataemo, “Madi' ma'ima' na sumo atina'.

¹⁸Desumo jalan atina' nu posi polawemo na butong nu beleyum, ka' suele mian haha aitu. Pakalaja'an atina' talalo manjoo' de ola samian na mongulus.

¹⁹Hongo mae na pokinde'ku, ka' nutulungije nu Tumpu Allah na beleyum. Memang ma'ima' na beleyum timbali wakin nu bansa aiya i ahop nu Tumpu Allah ka' momboa hahan nu aha hi Ia.

²⁰Beleyum tionyo ahi' mompogulu' hi aha iwi-iwi' na palentah nu Tumpu Allah ka' mompoto'i mosia na jalan nu kantumuu'an anu ma'ima' ka' apaa na anu tionyo ahi nubau nu aha.

²¹Panyo tionyo ahi' suele beleyum mompile'i to pia-piangkuka na mo'ane anu pande, ka' mohangkat aha timbali polaya' hi mian anu samadala, mian anu sa'atu, mian anu limampulu' ka' mian anu sampulu'. Aha tionyo ahi' to mia-mian anu mabuhuk ka' mohongo-hongo Tumpu Allah, ka' timbali opalesaya ka' madi' mongka'oho' mongala doi bau pontutup palakala.

²²Pokau na aha mompojalan ulusan salaku mian kopian nu aha bansa aijo', toto samian hi posi-posi tompuknyo nu aha. Kalaja aijo' tionyo ahi' nubau nu aha ma'i-ma'ima' ka' tangatun. Palakala anu toto maha-mahan yo aijo' na timbali nuboa mae nu aha hi beleyum, panyo pahangka'idekan anu toto ise-ise' timbalimo nu posi putusi nu aha. Han aijo' mompolaingmo ulusan nu beleyum kalana aha suele bala usahamo ahi' mokalaja totu-totu'u na momputusi.

²³De beleyum mombaumo sumo aijo' ka' han aijo' pinalentahkonmo nu Tumpu hi beleyum, beleyum moko alamo mombau pakalaja'an nu beleyum ka mian iwi-iwi' minsusule'mo tiba sanangmo na kinyonyoa nu aha kalana palakala nu aha sampamo ingulus.”

²⁴I Musa nombatukimo pokinde' i Yitro,

²⁵ka' nompile'imo to mia-mian anu pande hi aha mian nu Israel. Ia nohangkatmo aha timbali polaya' hi mian anu samadala, hi mian anu sa'atu, hi mian anu limampulu', ka' hi mian anu sampulu'.

²⁶Aha mompojalan palentah salaku mian kopian nu aha bansa Israel. Palakala anu toto maha-mahan na nuboa nu aha hi Musa, panyo pahangka'idekan anu toto ise-ise' nu posi ulusmo nu aha.

²⁷Lapas aijo' i Musa nompolambamo i Yitro minsusule'mo, lantas i Yitro nambamo i lipu'nyo.