Read Saluan NOSABATMO 19 Bible Online

NOSABATMO 19 - Saluan bible

NOSABATMO 19

¹Lapas aijo' aha bansa Israel nompala'imo Rafidim, ka' i tanggal sa'angu' bitu'on ko totolu'nyo salatan aha nompala'imo mae Mesir, aha tinokamo i padang bola Sinai. Aha nombaumo kemah i tengke nu Bungkutnyo Sinai,

³ka' i Musa nindakomo i bungkutnyo aijo' mamba singkabot tiba Tumpu Allah. Tumpu notatae hi Musa i bungkutnyo aijo' ka' nompokaumo ia da mompoto'i hi aha mian nu Israel lee' mae i Yakub,

⁴“Tinoamo nu belemiu apaa na anu binaung-Kumo hi mian nu Mesir ka' mosia na Aku nomboamo mae belemiu hi beleng-Ku i tampat aiya nu kuasa anu daka' hondo sumomo tomonsi' bonyia' momboa soma'nyo aita' i polipiknyo.

⁵ Uuka aiya de belemiu tulu-tulutan hi beleng-Ku ka' mohongo-hongomo palajanjian-Ku, belemiu Ku potimbalimo mian anu palesayamo hi beleng-Ku. Songko-songko na dunia aiya Aku na tumpunyo, panyo belemiu akumo na tumpunyo anu talalo Ku kalibosi,

⁶ ola posi Aku na tumpunyo ka' belemiu mombaumo apaa na anu Ku palentahkon salaku to ima-imam.”

⁷Lantas nintatau'mo na i Musa ka' nolaga to pola-polaya' da sihuk, lantas sinisikakonnyomo hi aha iwi-iwi' na anu pinalentahkonmo nu Tumpu hi ia.

⁸Aha iwi-iwi' nontaamimo hingga-hinggat, “Kami mongka'oho' mombau iwi-iwi' apaa na anu tinaloakonmo nu Tumpu, ka' pinontaami nu aha aijo' pinotokamo i Musa hi Tumpu.” Lantas notataemo na Tumpu hi Musa, “Aku tokaje mae hi beleyum i uno nu kundom anu butolu hondo; nuhongoje nu to mia-mian na Aku motatae hi beleyum, ka' otampu'uni aijo', aha saja'mo palesaya hi beleyum.

¹⁰Uuka aiya lako'mo singkaboti na mian haha aijo', ka' pokau na aha sinaa aiya ka' dodop momposadiamo butong da monsombahmo mae. Aha tionyo ahi' mombaso'i hude nu aha.

¹¹Hipuan aha tionyo ahi' montanda'imo. I sinaa aijo' Aku mintatau'mo mae i Bungkutnyo nu Sinai, tampat anu timbali pontoan Aku.

¹² Bau tanda titikub i bungkutnyo aiya bau potempasan anu madi' timbali so' olanggai nu bansa aijo'. Tewa' na bansa aijo' mindako i bungkutnyo ka' mongohani. Ihe na so' moliu-liu' tempas aijo', o hukum mate;

¹³mian aijo' tionyo ahi opahambunu'akon nu batu kabai o pana' ka' madi' timbali o kanyang. Aiya obau hi manusia ka' sumo aitu mule' hi binatang; iwi-iwi' na anu so' molanggai tempas aijo' tionyo ahi o hukum mate. De ohongomo na tolompet onyi'nyo opomantanmo, mian haha aijo' tionyo mindakomo ahi' i bungkutnyo.”

¹⁴Lapas aitu i Musa nintatau'mo mae lengkat i bungkutnyo ka' nompokaumo mian haha aijo' da mosadiamo monsombah. Ia notatae, “Hipuan komiu tionyo ahi' montanda'imo, ka' hau-haunyo uuka aiya belemiu ma'isa timbali moduhus.” Lantas bansa aijo' nontampu'unimo binasadia ka' nombaso'imo hude nu aha.

¹⁶ I sinaa kino itolunnyomo daagi' subu, kino gohungmo ka' kilat. Kundom anu butolu hondo tinoamo aita' i bungkutnyo ka' i hongomo na onyi'nyo nu tolompet anu ma'onyi' hondo. Iwi-iwi' na mian kiijo' i kemah i lakatnyomo ka' nabuhukmo hondo.

¹⁷Sinabatakonmo i Musa na aha da mamba singkabot tiba Tumpu Allah, lantas aha tinuminjomo i tengke nu bungkutnyo aijo'.

¹⁸Songko-songko na Bungkutnyo nu Sinai sinaputmo nu tibuk, kalana Tumpu nintatau'mo aita' i uno nu apu. Tibuk aijo' kino puha-puhamo susumo tibuk i tampat anu pinapuanmo, ka' songko-songko na bungkutnyo ginayu'anmo hondo-hondo.

¹⁹Onyi' nu tolompet nompaka onyi'anmo. I Musa notataemo, lantas tinaamanmo nu Tumpu Allah nu gohung.

²⁰Tumpu nintatau'mo aita' i bawo nu Bungkutnyo nu Sinai, ka' nolagamo i Musa da mokiita'mo i bawo nu bungkutnyo aijo'. Lantas i Musa nindakomo,

²¹ka' Tumpu notataemo hi ia, “Pintatau'mo ka' poto'i hi mian haha aijo' taalu' aha madi' timbali so' molanggai tempas de mamba mae montoa Aku. De aha sabole-bole molanggai, manjoo' na aha anu mate.

²²Ka' mule' to ima-imam anu mongka'oho' mongohani Aku, tionyo ahi' momposusi' butongnyo, de madi' aha Ku hukumo.”

²³I Musa notataemo hi Tumpu, “Mian haha aijo' madi' timbali mindako, kalana Belento nompalentahmo kami da osumbu' na bungkutnyo aiya salaku tampat anu susi' ka' otoa na tempasnyo titikup.”

²⁴Tinaaman nu Tumpu, “Pintatau'mo, ka' po'ule 'minsusule' mae i aiya tiba i Harun. Panyo to ima-imam ka' layat madi' timbali so' molanggai tempas de aha mamba mae hi beleng-Ku. De aha so' mae molanggai, aha Ku hukumo.”

²⁵Lantas i Musa nintatau'mo nonsingkaboti bansa aijo' ka' pinotoinyomo na potuunon nu Tumpu hi aha.