Read Saluan NOSABATMO 21 Bible Online

NOSABATMO 21 - Saluan bible

NOSABATMO 21

¹Lantas Tumpu notataemo hi Musa, “Bee' na atulan haha aiya hi bansa Israel:

² De belemiu mongoli samian na botuan posi bansa nu belemiu, ia tionyo mokalaja hi belemiu anom na taun. I taun anu ko popitu'nyomo ia tionyo opobebasmo ahi' ka' madi' palalu obayan nu maumo pa' apaa.

³De ia ma'isa no'osoa salatan tinimbali botuan nu belemiu saba' bengkele'nyo madi' timbali mombatuki de ia mambamo, panyo de ia polo-polo'mo no'osoa salatan tinimbali botuan nu belemiu bengkele'nyo timbali mamba tiba ia.

⁴De tuannyo mompo'osoakon ia tiba samian na boune, lantas ia mohumpakmo anak, saba' bengkele' ka' anaknyo aijo' tuannyo na tumpunyo, ka' madi' timbali mombatuki botuan aijo' de ia opobebasmo.

⁵Panyo de botuan aijo' mompoto'i tukoonyo ia mongkalibosi bengkele'nyo, to ana-anaknyo, tiba tuannyo, ka' madi'mo mongka'oho' opobebas,

⁶saba' tuannyo tionyo ahi' momboa ia i tampat ponsomban. Ikiijo' botuan aijo' opokau tuminjo maninseha i tumban kabai ohi' nu tumban tampat ponsomban. Ka' tuannyo tionyo ahi' monsusuk bihing nu botuannyo aijo', sahingga ia timbalimo botuannyo sampe toka sidu-sidutu'.

⁷De samian na boune nu aha Ibrani nupobalukmo nu tuumanyo da timbali botuan, boune aijo' madi' timbali opobebas mau mule' anomo na taun, jadi madi' pokakana tiba botuan mo'ane.

⁸De ia madi' momposanang tuannyo anu ko kahanda' mongosoaimo ia, saba' ia po'ule' opobaluk hi tuannyo. Boune aijo' madi' timbali opobaluk hi mian anu i salipu'an mae, kalana madi' ingadin na tuannyo lewa' nompalentah ia ka' madi' nontoongi palajanjiannyo.

⁹De ihe-he na mian mongoli botuan boune da bau bengkele' nu anaknyo, botuan boune aijo' tionyo ahi' opalentah susumo posi anaknyomo.

¹⁰De anak mo'ane aijo' po'ule' mule' mo'osoa, ia tataap mombee'i anu okaan ka' pakeannyo ka' iwi-iwi' na anu tionyo obau hi bengkele'nyo anu momona.

¹¹De ia madi' moko ala mombau iwi-iwi' aijo' ia tionyo ahi' mompobebasmo bengkele'nyo aijo' ka' madi' pilenje mombayan nu doi.”

¹² “Ihe na anu mondoke mian sangga'at lantas matemo, tionyo ahi' suele o hukum mate.

¹³ Panyo de ia mondoke madi' ototonggolakon ka' madi' ko kahanda' mompatei, ia timbali malai ia sa'angu' na tampat anu Ku potiju' hi belemiu ka' ikiijo' mae ia madi'mo timbali opatei.

¹⁴Panyo de ihe-he na talalomo puuson ka' montotonggolakonmo mompatei mian sangga'at, lapas aijo' malai mamba i mezbah-ngKu da boli opatei, mian aijo' tionyo mamba o ala ikiijo' i mezbah ka' obee'i hukuman opatei.

¹⁵Ihe na mondoke tuuma ka' tinanyo, tionyo obee'i hukuman opatei.

¹⁶ Ihe na mompopalaihakon mian, tionyo obee'i hukuman opatei maumo mian aijo' pinosuluknyomo kabai daagi' i laigannyo.

¹⁷ Ihe na montundai tuumanyo kabai tinanyo, tionyo obee'i hukuman opatei.

¹⁸De mian anu mahantuda', lantas samian mondokemo sampo pahantuda'nyo nu batu kabai jinagunnyomo, panyo madi' pinateannyo ia madi' o hukum. De mian anu dinokenyo aijo' tinombahangkangmo kalana jinagunmo aijo',

¹⁹panyo lapas aijo' ia daagi' noko ala nobula ka' po'ule'mo i lumajang nitokon, mian anu nonjagun ia tionyo ahi' mongulus da opakuli'i sampe ma'alin, ka' mombolosi kalugi'an pa' ingipian na kopinnyo na ia nasakit.

²⁰Ihe na mondoke botuannyo mo'ane kabai boune sahingga botuan aijo' lau-laus nate, tionyo ahi' o hukum.

²¹Panyo de botuan aijo' madi' i nate sinansinaa kabai inguansinaa, mian aijo' madi' o hukum. Kalugia'an anu ingoa'annyomo kalana madi'mo ko botuan, aijo' sumomo hukuman anu pinokonamo hi ia.

²²De aha sangkuka na mo'ane hau-haunyo mahanjagun ka' sala'samian aijo' hi aha monsaduakonmo bahaya hi samian na boune anu poboa sahingga anaknyo i kompong inanabu'mo ma'isa pe'e tempo'nyo nu kahampeannyo, panyo ia madi' nongoa'i sakit i bagian butong sangga'at, jadi mian aijo' tionyo mombayan bau pondenda konjoo'nyo iyamo na anu nupoita nu langkai'nyo ka' nusetujui nu to mia-mian kopian.

²³Panyo de boune aijo' nohumpak bahaya lebe maboat saba' hukuman i kalakuan anu ma'idek aijo' nyawa obolosi nu nyawa,

²⁴ mata obolosi nu mata, bese' obolosi nu bese', lima obolosi nu lima, tengke obolosi nu tengke,

²⁵bela obolosi nu bela, bela mopapu obolosi nu bela mopapu, bangkak obolosi nu bangkak.

²⁶Ihe na mondoke mata nu botuannyo sampe mapisokmo tionyo ahi' opobebasmo na botuan aijo' salaku pontokong matanyo.

²⁷De ihe-he na mian mondoke botuannyo sahingga mopato'mo na bese'nyo aijo',” botuan aijo' tionyo ahi' opobebasmo salaku baumo pontokong bese'nyo aijo'.

²⁸“De sa'angu' na sapi' lakinyo montanduk mian sampe mate, sapi' aijo' tionyo ahi' opahambunu'akon nu batu sampe mate, ka' antoknyo madi' timbali okaan panyo tumpunyo madi' obee'i hukuman.

²⁹De sapi' lakinyo aijo' biasa montanduk, ka' tumpunyo pinoto'imo, panyo madi' monjagai binatang aijo', lantas de sapi' lakinyo aijo' montandukmo mian sampe mate, saba' binatang aijo' tionyo ahi' opahambunu'akon nu batu sampe mate.

³⁰Panyo de tumpunyo nu sapi' aijo' opobee' mombayan bau pontokong, ia tionyo ahi' mombayan sangkuka na konjoo'nyo na anu opoita bau pontokong nyawanyo.

³¹De anu pinatean aijo' samian na anak mo'ane kabai boune, atulannyo anu opake sumo aijo'mo.

³²De anu pinateannyo aijo' samian na botuan mo'ane kabai boune, tumpunyo nu sapi' aijo' tionyo ahi' mombayan tolumpulu' na doi salaka hi anu mompojoong botuan aijo', ka' sapi' lakinyo aijo' tionyo ahi' opahambunu'akon nu batu sampe mate.

³³Ihe na mongala anu bau pongkulubi sa'angu' na bubung kabai mongkeke bubung ka' madi' mongkulubi, lantas sa'angu' na sapi' lakinyo kabai keledai manabu' i unonyo,

³⁴tumpunyo nu bubung aijo' tionyo ahi' mombayan bau pombolosi kalugi'an hi tumpu nu potuu'on aijo', panyo timbali nu ala hi ia na potuu'on anu ina-inatemo aijo'.

³⁵De samian ko sapi' lakinyo mompatei sapi' lakinyo nu mian sangga'at, ua-ua'aha na tumpunyo tionyo ahi' mompobaluk potuu'on anu daagi' tumuu' aijo' ka' mombagi doinyo. Aha suele tionyo ahi' mombagi antoknyo nu potuu'on anu natemo aijo'.

³⁶Panyo de sinumbu'mo na sapi' lakinyo aijo' biasa montanduk, ka' tumpunyo madi' nonjagai, ia tionyo ahi' mombolosi nu sapi' lakinyo anu daagi' tumuu' ka' nu alamo hi ia na potuu'on anu i natemo aijo'.”