Read Saluan NOSABATMO 23 Bible Online

NOSABATMO 23 - Saluan bible

NOSABATMO 23

¹ “Boli mombebeakon lele anu madi' totu'u ka' boli montulungi mian anu ma'idek na kinyonyoanyo ka' mule' anu mombee'i katalangan anu madi' totu'u.

²Boli mombaya'i mian da'isan de aha mombau sala' kabai monggeo-geo'akon atulan ka' mombee'i katalangan anu madi' totu'u.

³ De mongulus palakala nu mian boli obeda-bedakon maumo anu o'ulus aijo' mian anu kasiasi.

⁴ De belemiu saintolo-tolo montoamo sapi' kabai keledai nu anu mompaha idek tiba belemiu tinalasmo, boakon mae hi tumpunyo.

⁵De keledai nu anu mompaha idek tiba belemiu tinolubukmo kalana binoatanmo nu anu pinosake' tulungi na ia mompotinjo keledai aijo'; boli ola opala'i.

⁶ O'ulus na mian misikin adi-adin de ia toka mongkalak palakalanyo hi mian kopian.

⁷Boli mompokona kasala'an anu madi' totu'u ka' boli monsaduakon mian anu madi' ko sala'nyo mohumpakmo hukuman opatei, kalana Aku madi' mompototu'u mian anu mombau ka'idekan sumo aijo'.

⁸Boli mongala doi pombayan palakala da otinjohi na mian aijo', kalana doi pombayan palakala aijo' mompopaha mian sahingga madi'mo montoa anu totu'u ka' mompolugi'mo to mia-mian anu madi' ko sala'nyo.

⁹ Boli monsusa'i taha-tahahumo mian anu lengkat mae i salipu'an; kalana sinumbu'mo nu belemiu mosia na mongoa'i de timbali mian anu lengkat mae i salipu'an, kalana u'utu mae belemiu suele toho'mo tinimbali mian anu lengkat mae i salipu'an tempo'nyo i Mesir.”

¹⁰ “Anom na taun na kopinnyo belemiu timbali momula i ale' nu belemiu ka' mongala isinyo nu ale'.

¹¹Panyo i taun ko popitu'nyo tano' aijo' bolimo daagi' osu'ani. Sataun aijo' na kopinnyo belemiu madi' timbali mongala apa-apaa, anu mosi tumuu' i ale' nu belemiu aijo'. Bakasmo na aijo' da baumo bagi nu mian anu kasiasi, ka' tuha'nyo baumo bagi nu binatang anu ma'ela'. Baumo suele sumo aijo' na ale' nu anggur, ka' to kau-kau' zaitun anu nu belemiu.

¹² Anom sinaa i uno nu sa'angu' na duminggu belemiu timbali mokalaja, panyo sinaa ko ipitunnyo belemiu tionyo ahi' milawemo da potuu'on nu belemiu, to posa-posaihon ka' to mia-mian anu lengkat mae i salipu'an anu mokalaja hi belemiu milawemo suele.

¹³O'intomakon iwi-iwi' apaa na anu tinaloakon-Kumo hi belemiu. Boli monsombah to pilo-pilogot sangga'at, monsanggo pe'e sanggonyo madi' timbali.”

¹⁴“Sataun toka sataun belemiu tionyo ahi' mombau totolu' na lamean bau pongadati Aku.

¹⁵ I bitu'on Abib, kona i tempo'nyo anu pinotantumo nu belemiu tionyo ahi' molame'akonmo lamean nu Roti anu Madi' ko Raginyo susumo sonto' anu pinalentah-ng-Kumo hi belemiu, kalana i bitu'onmo aijo' na belemiu nompala'imo mae Mesir. Boli mongkaan roti anu ginalo'an ragi na mombau, kopinnyo ipitun hau-haunyo molame'akon aijo'. De belemiu tokamo mae monsombah Aku, belemiu tionyo ahi' momboa mae anu osombahkon.

¹⁶ Lame'akon na Monsawe de Mompadakmo hasin nu ale' nu belemiu anu momona pinadak. Lame'akon na Lamean anu o'atopi nu Hon nu Kau' na Tahop i kapupusanmo nu taun salatan belemiu mompolimu'mo hasin nu ale' nu anggur ka' ale' nu sosu'anon anu okaan na bua'nyo.

¹⁷De konamo i taun, molame'akonmo totolu' na lamean aijo', iwi-iwi' na to momo'ane tionyo ahi' tokamo mae monsombah Aku, Tumpu Allah nu belemiu.

¹⁸Boli monsombahkon roti anu ko raginyo da belemiu mongkolobanakonmo potuu'on hi beleng-Ku. Lompo'nyo nu potuu'on anu okolobanakon hi beleng-Ku hau-haunyo molame'akon aijo' madi' timbali opotuha' sampetoka dodop subu.

¹⁹ Sataun toka sataun belemiu tionyo ahi' momboa i Laigan nu Tumpu Allah nu belemiu, gandum anu momonanyo pinadak nu belemiu. Antoknyo nu anak nu domba kabai anak nu mee' madi' timbali okola' tiba juu' nu susu nu tinanyo.”

²⁰“Ku saije da mamba momona na malaekat-Ku, lantas belemiuje da monjagai belemiu lumajang ka' momboa belemiu i tampat anu pinosadiang-Kumo.

²¹O intomakon ka' otuluti na ia. Boli moto idek hi ia kalana ia Aku na nonsai ka' ia madi' mongampuni kasala'an nu belemiu.

²²De belemiu tulu-tulutan hi ia ka' mombau iwi-iwi' apaa na anu Ku palentahkon, Aku na mahampate mongewa sampobali' nu belemiu iwi-iwi'.

²³Malaekat-Ku na mambaje momona lantas belemiuje, ka' momboa belemiu i lipu' nu bansa Amori, Het, Feris, Kana'an, Hewi ka' Yebus, ka' aha Ku silakaimo.

²⁴Boli monsombah patong anu monjagai aha ka' boli montiho mosia na aha monsombah. Idei na patong haha aijo' anu monjagai aha ka' hobo'akon na ohi' batu haha aijo' anu nupake nu aha monsombah.

²⁵De belemiu monsombahmo Aku, Tumpu Allah nu belemiu, belemiu Ku balakatimo nu anu okaan ka' anu o inum ka' iwi-iwi' na panyakit Ku pojo'onmo hi belemiu.

²⁶I lipu' nu belemiu madi' ko boune anu mohampeakon anak ma'isa pe'e sukup na umunnyo i kompong lantas anak aijo' silakamo kabai boune anu lengke'. Belemiu Ku po'inum madi' sampa silaka.

²⁷To bansa-bansa anu otokai nu belemiu Ku potimbalije da aha mabuhuk hi beleng-Ku; Ku pogago'je na aha, iwi-iwi' na sampobali' nu belemiu minsusule'mo ka' mopadeka'mo.

²⁸Sampobali' nu belemiu Ku potimbalimo da madi' mosa'angu' ka' to bansa-bansa Hewi, Kana'an ka' Het Ku laa'mo da mompala'imo belemiu, da belemiu lumajang lau-laus.

²⁹Aha madi' Ku pominsan na molaa' iwi-iwi' i uno nu sataun, da tano' aijo' boli ola opobakas, ka' binatang anu mongkaan sangko binatangnyo boli mae ma'uha.

³⁰Aha Ku laa' toto sambagian, sampe mian bubu' belemiu sukupmo na konjoo'nyo na anu jojoong i tano' aijo'.

³¹Potempasan nu lipu' nu belemiu Ku potataapje lengkat mae i Luoknyo nu Akaba toka-toka i Kaunyo nu Efrat, ka' lengkat mae i Ambai anu i totonga'nyo toka-toka i padang bola. Belemiu Ku bee'imo kuasa mompalentah mian anu jojoong i lipu' aijo', sahingga aha olaa'mo nu belemiu salatan belemiu mambamo mompo'ago tano' aijo'.

³²Boli mombau palajanjian tiba mian haha aijo' kabai to pilo-pilogot nu aha.

³³Boli mompobee' mian haha aijo' jojoong i lipu' nu belemiu da belemiu boli monsombah to pilo-pilogot nu aha, ka' baladosa'mo hi beleng-Ku. De belemiu monsombahmo pilogot nu aha haha aijo', belemiu nukonamo nu ponggoda nu aha sahingga belemiu silakamo.”