Read Saluan NOSABATMO 24 Bible Online

NOSABATMO 24 - Saluan bible

NOSABATMO 24

¹Lapas aijo' Tumpu notataemo hi Musa, “Pindakomo mae mangadap hi beleng-Ku, beleyum tiba i Harun, i Nadap ka' i Abihu, ka' aha pitumpulu' na to pola-polaya' nu bansa, ka' tolodadupumo mae nonsombah Aku, atina' mae jo'o-jo'on.

²Ola posi beleyum na toka mae mongohani Aku. Sangga'at madi' timbali toka mae oha-ohani ka' mule' layat madi' timbali mindako mae i bungkutnyo aiya.”

³Lantas i Musa nambamo ka' nombebakonmo hi bansa aijo' iwi-iwi' na palentah ka' atulan nu Tumpu. Aha iwi-iwi' nontaami hingga-hinggat, “Obaumo mami iwi-iwi' na anu tinaloakonmo nu Tumpu.”

⁴Lapas aijo' i Musa nontulismo iwi-iwi' na palentah nu Tumpu. Dodododopnyo subu-subu pinotinjonyomo na mezbah sa'angu' tiba sampulu' ka' ohua' na batu i tengke nu bungkutnyo aijo'; toto sa'angu' na batu mowakini sala'sa'angu' na bansa Israel.

⁵Lantas i Musa nonsaimo to pia-piangkuka na olitau ka' aha nonsombahkonmo koloban anu otunui bau bagi nu Tumpu, ka' mule' nongkolotmo to pia-piangkuka na sapi' da bau koloban paladamean.

⁶Sambagian na baso' nu sapi' aijo' ingala i Musa ka' i lambe'nyo i to mangko-mangko'. Sambagian mule' dinudu'akonnyomo i mezbah.

⁷Lapas aijo' ingalanyomo na kitab palajanjian anu pinontulisan to pale-palentah nu Tumpu ka' binasa'nyomo daka-daka' hi bansa aijo'. Aha notataemo, “Kami montulutimo Tumpu ka' iwi-iwi' na palentahnyo obaumo mami.”

⁸ Lantas i Musa nongalamo baso' i mangko' haha aijo' ka' pinipi'akonnyomo hi aha layat. Ia notataemo, “Baso' aiya mompohosonmo palajanjian anu binaumo nu Tumpu tiba belemiu, susumo anu pinalentahkon-Nyomo aijo'.”

⁹Lapas aijo' i Musa, i Harun, i Nadab, i Abihu, ka' aha pitumpulu' na to pola-polaya' haha aijo' nindakomo i bungkutnyo,

¹⁰ka' aha nontoamo Tumpu Allah nu aha Israel tinuminjomo aita' mae anu lupanyo sumo salo, te batu mainan na binau buhitnyo mobilu' sumo langit najingkamo.

¹¹To pola-polaya' nu aha Israel aijo' nontoamo Tumpu Allah; mau mule' sumo aijo' aha madi' sinilakan-Nyo. Lapas aijo' aha nongkaanmo ka' nonginumo.

¹²Lapas aijo' Tumpu notataemo hi Musa, “Tokamo mae hi beleng-Ku aita' i bungkutnyo. I kiita' mae Ku bee'je hi beleyum ohua' na batu anu tinulisan-Kumo nu atulan-Ku iwi-iwi'. Iwi-iwi' na atulan aijo' Ku bee' da bau pompokinde'i bansa aijo'.”

¹³Lantas i Musa ka' i Yesua anu montulungi ia nosadiamo, ka' i Musa nindakomo i bungkutnyo kajojoongan nu Tumpu aijo'.

¹⁴I Musa nompotuunmo hi to pola-polaya' nu aha mian nu Israel, “Tanda'imo i pinombauan kemah haha aiya sampe kami minsusule'mo mae. I Harun ka' i Hur aiya hingga-hinggat hi belemiu. Ihe na ko ulusan, timbali mangadap hi aha da o'ulus na palakalanyo.”

¹⁵I Musa nindakomo i Bungkutnyo nu Sinai, lantas ia sinaputmo nu kundom.

¹⁶Jingka nu Tumpu kalana nintatau'mo mae aita' i bungkutnyo aijo', ka' tinoamo nu aha mian nu Israel, sumomo apu anu i noakmo aita' i bawo nu bungkutnyo. Inganomsinaa na kinopinnyo na kundom nonsaput bawo nu bungkutnyo aijo' ka' salatan tinokamo i sinaa kino ipitunnyomo, Tumpu nolagamo i Musa potatae-Nyo lengkat mae i uno nu kundom aijo'.

¹⁸ Lantas i Musa balomo nindako sampe ia ninsoopmo i uno nu kundom aijo'. Pinatompulu' na sinaa ka' pinatompulu' na pihi, na i Musa jinojoongmo i kiita' mae.