Read Saluan NOSABATMO 26 Bible Online

NOSABATMO 26 - Saluan bible

NOSABATMO 26

¹“Baui na Aku kemah obau sampulu' na kolongan nu lenan anu ma'ima' hondo, otonun tiba laken mobilu', mingkamumu' ka' momea'. Osuji'i na hude aijo' nu gambalan anu sumo malaekat.

²Toto sangkolong sukatannyo tionyo ahi' pokakana, ko mantannyo sampulu' ka' ohua' na meten ka' ko bolanyo ohua' na meten.

³Olima' na kolongan nu hude aijo', tionyo ahi' opogantum timbali sa'angu' na hude bola hondo, ka' olima' na kolongannyo sangga'at tionyo ahi' suele obau susumo aijo'.

⁴Baui bibitnyo te hude anu mobilu' na obau i pani'nyo ohu-ohua' nu hude anu bola-bola aijo'.

⁵Limampulu' na bibitnyo i hude anu toto bola-bola haha aijo'.

⁶Baui pongkaitnyo mosoni' na obau, limampulu' na konjoo'nyo da bau pompogantum hude bola-bola haha aijo' da timbali jadi oposa'angu'.

⁷Atop nu Kemah aijo' sampulu' ka' sa'angu' na kolongan nu hude bulu nu mee' na obau.

⁸Toto sangkolong tionyo ahi' pokakana na sukatannyo, ko mantannyo sampulu' ka' totolu' na meten ka' ko bolanyo sampulu' ka' ohua' na meten.

⁹Olima' na kolongan tionyo ahi' opogantum timbali sa'angu' na hude anu bola, ka' anom na kolongan sangga'at tionyo ahi' suele obau sumo aijo'. Gantumannyo anu ko anomnyo tionyo ahi' opaku' ohua' da bau pongatopi Kemah sasu ahopnyo.

¹⁰Pokonai limampulu' na bibitnyo i pani'nyo nu hude bola-bola anu momona ka' limampulu' suele na bibitnyo i pani'nyo nu hude bola-bola anu ko ohua'nyo.

¹¹Bau limampulu' na pongkaitnyo tambaga na obau ka' pokait i bibitnyo aijo' da ohu-ohua' na hude bola-bola aijo' timbali sa'angu' bau pongatopi Kemah.

¹²Sambagian na kolongan nu hude, labinyo baumo pongatopi sasu padutnyo nu Kemah.

¹³Labinyo nu hude ko bolanyo limampulu' na sentimeten mombatuki ko mantannyo nu Kemah pobakasmo da bau pongatopi Kemah aijo' poti-potimbiha'.

¹⁴Bau ohua' na atop da pongatopi sambiha'nyo nu Kemah, sa'angu' kilit nu domba lakinyo na obau ka' obuhiti momea' ka' sa'angu' mule' kilit anu ma'ima' hondo.

¹⁵Bau na Kemah ohi'nyo kau' akasia anu to hodi-hodi',

¹⁶toto sa'angu' na ohi'nyo ko tangkasnyo opat na meten ka' kobolanyo 66 sentimeten.

¹⁷Toto sa'angu' na ohi' ohua' na totokolonnyo opobaba', sahingga ohi' haha aijo' timbali opoguntang sa'angu' tiba sa'angu'.

¹⁸Sasu selatan nu Kemah, obau uampulu' na ohi'nyo,

¹⁹ka' bau pompokokoannyo patompulu' aijo' salaka na obau, toto ohua' na opokoko i aluknyo opotinjoimo ohua' na totokolonnyo.

²⁰Sasu utara nu Kemah obau uampulu' na ohi'nyo

²¹ka' patompulu' na pompokokoannyo salaka na obau, toto ohua' i aluk nu ohi'nyo.

²²I padutnyo nu Kemah sasu kinsoban, bau anom na ohi'nyo

²³ka' ohua' na ohi'nyo opokona i pasu'nyo iwi-iwi'.

²⁴Ohi' nu pasu'nyo haha aijo' tionyo ahi'opobaba' tiba sasu tengkenyo lau-laus mokiita' i bawonyo. Ohu-ohua' na ohi' anu timbali pasu'nyo tionyo ahi' obau sumo aijo'.

²⁵Jadi iwi-iwi' ualu' na ohi'nyo ka' sampulu' ka' anom na salaka pinompokokoannyo sa'angu' na ohi'nyo ohua' na salaka.

²⁶Bau sampulu' ka' olima' na kau' akasia pombalatani, olima' na ohi'nyo nu Kemah i sohipi'nyo sambiha',

²⁷ka' olima' i sohipi'nyo mule' sangga'at, ka' olima' mule' i sohipi' nu Kemah, padutnyo sasu kinsoban.

²⁸Kau pombalatani anu i totonga'nyo tionyo ahi' opokona ko tangkasnyo obagi ohua' na ko tangkasnyo nu ohi', lengkat i puusnyo toka i puusnyo nu Kemah aijo'.

²⁹Ohi' nu Kemah ka' kau' pombalatani haha aijo' tionyo ahi' olapisi nu mosoni'. Pasinsingnyo bau pomposoopan kau' haha aijo' tionyo ahi' mosoni' na obau.

³⁰Potinjo na Kemah aijo' mombatuki sumo anu pinotiju'Kumo aita' i bungkutnyo aiya.

³¹Bau sa'angu' na lalanse' hude lenan na obau anu ma'ima' hondo, anu tinonun tiba laken mobilu', mingkamumu' ka' momea'. Gambalan anu susumo malaekat aijo' na oposuji' i hude aijo'.

³²Pompokalayo'an lalanse' aijo' hi opat na ohi' kau' akasia na obau anu ko lapisnyo mosoni' tiba pongkaitnyo mosoni' na obau ka' pinotinjomo i paningkokoannyo opat na salaka.

³³ Pokona na hude aijo' i pongkaitnyo anu pinaha pojiji'mo i aluk nu atop nu Kemah aijo'. I hikunyo nu hude aijo', aijo'mo na tionyo ahi' pompo'una'an Peti' Palajanjian anu isinyo ohua' na batu. Hude aijo' na bau pongoloti Salipi' Susi' tiba Salipi' anu Talalo hondo Susi'.

³⁴Kolobi na Peti' Palajanjian.

³⁵Meja' bau pompotimpasan anu osombahkon tionyo ahi' opo'una' i sambiha'nyo nu salipi' anu Talalo hondo Susi' i sasu utara, ka' tengke nu sulu' i sasu selatan i uno nu Kemah aijo'.

³⁶Bau na lalanse' anu opake i sabatan nu Kemah hude lenan anu ma'ima' hondo anu tinonun tiba laken mobilu' ka' mingkamumu' ka' momea', ka' sinujian bau pombunga-bungai.

³⁷Lalanse' aijo' tionyo ahi' obau olima' na ohi'nyo kau' akasia na obau anu ko lapisnyo mosoni' ka' pinoguntangmo nu olima' na kaitnyo mosoni'. Bau olima' na paningkokoannyo tambaga na obau da bau pompokokoan ohi' haha aijo'.”