Read Saluan NOSABATMO 27 Bible Online

NOSABATMO 27 - Saluan bible

NOSABATMO 27

¹“Bau sa'angu' na mezbah kau' akasia na obau sulapa' opat, ko mantannyo ka' ko bolanyo pokakana 2,2 meten ka' ko tangkasnyo 1,3 meten.

²Aita' i pasu'nyo opa-opat na mezbah opokonai anu susumo tanduk na obau ka' aijo' madi' timbali o alinakon. Iwi-iwi' tionyo ahi' olapisi nu tambaga.

³Bau na to pamu-pamutu', sasahuk, to mangko-mangko', to soba-sobang ka' pomposulian apu. Iwi-iwi' na talakonan haha aijo' tionyo ahi' tambaga na obau.

⁴Anyam na kawat tambaga ka' pokonai opat na pasinsingnyo pomposoopan kau', bau polembanan i pasu'nyo opa-opat akaong i aluknyo.

⁵Ko tangkasnyo nu kawat anu inganyamo aijo', tionyo ahi' toka i pohintonga'annyo nu ko tangkasnyo nu mezbah aijo'. Kawat anu inganyamo aijo' tionyo ahi' opokona titikub i aluknyo nu mezbah.

⁶Bau wangkau na kau' akasia da bau polembanan olapisi nu tambaga,

⁷ka' oposoop i pasinsingnyo poti-potimbiha' aijo' i mezbah de molembanmo mezbah aijo'.

⁸Bau na mezbah pompake dopi' ka' lulu na sasu unonyo susumo anu pinoto'ingkumo aita' i bungkutnyo aiya.”

⁹“Bau na popasannyo titikub Kemah-Ku, anu obalabati nu hude lenan anu bola ka' anu ma'ima' hondo. I sasu selatan, hude bola-bola aijo' ko mantannyo 44 meten,

¹⁰ingohi'an nu uampulu' na ohi' tambaga', toto sa'angu' pinokoko i tambaga, ka' pongkaitnyo tiba pompokaitannyo salaka na binau.

¹¹Bau suele sumo aijo' i sasu utara.

¹²I sasu kinsoban, hude bola-bola aijo' ko mantannyo 22 meten, ohi'nyo sampulu' ka' opotinjo i sampulu' na paningkokoannyo.

¹³I sasu kabete'an anu binauan sabatannyo ko mantannyo nu hude bola-bola aijo' suele 22 meten.

¹⁴I Kowi ka' koanan na sabatan aijo' tionyo ahi' opokonai hude bola-bola toto sa'angu' ko mantannyo 6,6 meten ka' totolu' na ohi'nyo suele totolu' na paningkokoannyo.

¹⁶I sabatannyo tionyo ahi' opokonai lalanse'nyo ko mantannyo 9 meten lenan anu ma'ima' hondo, otonun tiba laken mobilu', mingkamumu' ka' momea', ka' sinuji'an bau pombunga-bungai. Bau pongohi'i lalanse' nu sabatan aijo' tionyo ahi' opokonai ohi'nyo opat ka' suele opat na paningkokoannyo.

¹⁷Iwi-iwi' na ohi'nyo titikub na popasannyo aijo' tionyo ahi' opoguntang sa'angu' ka' sa'angu' ka' pompokaitannyo salaka; kaitnyo tionyo ahi' salaka na obau ka' paningkokoannyo tambaga suele na obau.

¹⁸Hude bola-bola titikub na popasan aijo' ko mantannyo 44 meten, ko bolanyo 22 meten ka' ko tangkasnyo 2,2 meten. Hude bola-bola aijo' tionyo ahi' hude lenan anu ma'ima' hondo na obau ka' latasnyo suele tambaga na obau.

¹⁹Iwi-iwi' na talakonannyo anu opake i Kemah, iwi-iwi' na totokolonnyo anu opake i Kemah ka' hude bola-bola anu opake tionyo ahi' tambaga na obau.”

²⁰“Pokau na aha mian nu Israel momboa mae lanya' nu zaitun, anu madi' ko galo'nyo ka' anu ma'ima' hondo da bau pongisi sulu' i Kemah-Ku da otutungi ka' saja' samoa-moaknyo.

²¹I Harun ka' to ana-anaknyo na tionyo saja' mompokopiani sulu' haha aijo' salatan mamalomo toka-toka daagi' subu i tampat kajojoongan-Ku, i sambiha'nyo nu hude anu pinokalayo' sasu ahopnyo nu Peti' Palajanjian. Palentah aijo' tionyo ahi' obau sampetoka sidu-sidutu' nu aha mian Israel ka' iwi-iwi' lee'nyo nu aha.”