Read Saluan NOSABATMO 30 Bible Online

NOSABATMO 30 - Saluan bible

NOSABATMO 30

¹Tumpu notatae mule' hi Musa, “Bau sa'angu' na mezbah tampat pompapuian kamangian, kau' akasia na o ala.

²Ko daka'nyo nu mezbah aijo' tionyo ahi' sulapa' opat, ko mantannyo ka' ko bolanyo pokakana 45 sentimeten, ko tangkasnyo 90 sentimeten. I pasu'nyo opa-opat pokonai anu susumo tanduk anu jadimo sa'a-sa'angu' tiba mezbah aijo'.

³Sasu buannyo tiba opa-opat na pasu'nyo ka' anu susumo tanduk aijo' tionyo ahi' olapisi nu mosoni' anu madi' ko galo'nyo ka' opokonai bingkainyo mosoni' duhu-duhuk.

⁴Bau ohua' na pasinsingnyo i aluk nu bingkainyo poti-potimbiha' da bau pomposoopan kau' bau polembanan mezbah aijo'.

⁵Bau polemban aijo' tionyo ahi' kau' akasia na obau ka' olapisi nu mosoni'.

⁶Pokoko na mezbah aijo' i sasu sambiha'nyo nu hude anu i ahop nu Peti' Palajanjian, i tampat kasingkabotan-Ku tiba beleyum.

⁷Sansina-sinaa salatan subu-subumo de i Harun tokamo mae momposadia sulu', ia tionyo ahi' mompapui kamangian anu manohong i mezbah aijo'.

⁸Anu sumo aijo' tionyo ahi' nu bau suele de ia montutungimo sulu' mamalomo. Kamangian anu osombahkon aijo' tionyo ahi' saja' obau sampetoka sidu-sidutu'.

⁹Boli monsombahkon aijo' i mezbah, kamangian anu madi' timbali opake; koloban binatang kabai koloban anu okaan, boli mule' mondudu'akon anggur salaku anu okolobanakon aita' i mezbah.

¹⁰Sataun minsan na i Harun tionyo ahi' mombau kalaja momposusi' mezbah tiba jalan mompipi'i tanduknyo opa-opat nu baso' aijo'mo baso' nu potuu'on anu kinolobanakonmo pongampuni dosa'. Han aijo' tionyo ahi' obau sataun toka sataun sampe toka sidu-sidutu'. Mezbah aijo' tionyo ahi' susi' songko-songko samata-mata opake bau kapalaluan-Ku.”

¹¹Tumpu notatae hi Musa,

¹²“De mombilangmo bansa Israel, toto samian na mo'ane tionyo ahi' mombayan hi beleng-Ku doi pontobus butongnyo da ia madi' nukona nu balaa' de tokamo na tempo'nyo pombilangan.

¹³ Toto samian na anu obilangmo de pombilanganmo aijo' tionyo ahi' momboa mae doi bau pombayan konjoo'nyo susumo anu tinantukanmo na olinyo anu bau pombayan Kemah-Ku salaku kasanangan anu obee' samata-mata hi beleng-Ku.

¹⁴Toto samian na anu obilangmo de pombilanganmo aijo', aijo'mo toto samian na mo'ane anu umunnyo uampulu'mo na taun kabai molabimo tionyo ahi' mombee' salaku kasanangan anu samata-mata obee' hi Tumpu aijo'.

¹⁵Mian kaya madi' timbali mombayan molabi, ka' mian kasiasi madi' timbali mombayan madi' sampa', de aha mombayanmo doi bau pontobus butongnyo.

¹⁶Limu' na doi aijo' hi bansa Israel, ka' balanjakon bau kapalaluan de monsombahmo i Kemah-Ku. Iwi-iwi' aijo' te doi bau pontobus butong nu aha, ka' aha saja' Ku inau' da ojagai.”

¹⁷Tumpu notatae hi Musa,

¹⁸ “Bau sa'angu' na tampat pongisian uee tambaga na obau ka' paningkokoannyo suele tambaga na obau. Pokoko na tampat aijo' i olot nu Kemah ka' mezbah lantas isii nu uee.

¹⁹Uee aijo' nupake i Harun ka' to ana-anaknyo da pombaso'ian nu aha lima ka' tengke,

²⁰ma'isa pe'e ninsoop i Kemah kabai mongohani mezbah momboa koloban anu otunui. Tionyo ahi' nubau nu aha na aijo' da aha madi' opatei. Atulan aijo' tionyo ahi' otuluti nu aha ka' lee' nu aha sampetoka sidu-sidutu'.”

²² Tumpu notatae hi Musa,

²³“Ala na to lampa-lampa anu ma'ima' hondo, anom na kilo na mur anu mingue, totolu na kilo na kayu manis, totolu' na kilo na tumba' anu manohong, ka' anom na kilo na kau' teja.

²⁴Iwi-iwi' otimbang i timbangan anu saja' opake i Kemang-Ku. Tuangi nu lanya' zaitun opat na liter,

²⁵ka' bau da timbali lanya' anu opake de mombalakatimo, anu opogalo' susumo minya-minya' anu manohong.

²⁶Opake na anu opogalo'mo aijo' bau polanya'i Kemah-Ku, Peti' Palajanjian,

²⁷meja' ka' iwi-iwi' posadiaonnyo, tengke nu sulu' ka' posadiaonnyo, mezbah tampat pompapuian kamangian,

²⁸mezbah bau pontunuian koloban tiba iwi-iwi' na posadiaonnyo, ka' tampat pongisian uee tiba paningkokoannyo.

²⁹Tiba jalan anu sumo aijo', posadiaon haha aijo' ola samata-mata nupake bau kapalaluan-Ku, da iwi-iwi' timbalimo susi'. Maumo pa' apaa na anu monsentungmo mezbah aijo' tionyo ahi' sabole-bole obee'mo hi Tumpu, ka' maumo ihe na monsentungmo mohumpak balaa' kalana mahoson hondo na kasusi'an nu mezbah aijo'.

³⁰Osapui lanya' na i Harun ka' to ana-anaknyo da aha obalakatimo timbali imam anu mombau apaa na Ku palentahkon.

³¹Poto'i hi bansa Israel, taalu' lanya' anu opake monsombah Aku aijo' ola samata-mata bau kapalaluan-Ku.

³²Lanya' aijo' madi' timbali odudu'akon hi yayamo na mian. Boli mombau lanya' sumo aijo' ka' mompake galo'nyo anu sumo aijo'. Lanya' aijo' susi' ka' tionyo ahi' o angga'i na balang aijo' anu susi'.

³³Mian anu mombau lanya' susumo aijo' kabai anu mompake misa' imam, madi'mo timbali minsoop mian anu pinalesayamo hi beleng-Ku.”

³⁴Tumpu notatae hi Musa, “Ala to pia-piangkuka na ngangahan nu lampa opokakanakon na konjoo'nyo, aijo'mo damak, kubangnyo nu tima, pulutnyo nu rasa mala ka' kamangian anu madi' ko galo'nyo.

³⁵Opake na aijo' iwi-iwi' de mombaumo kamangian anu opogogalo'akon da manohong. O'una'i timuson da kamangian aijo' tataap ma'ima ka' madi sampa ma'idek ka' timbali opake monsombah Aku.

³⁶Sambagian na kamangian aijo' tionyo ahi' o uja' sampe sumo labu. Boa mae na aijo' i Kemang-Ku ka' kakambuhakon i ahop nu Peti' Palajanjian. Kamangian aijo' tionyo ahi' o'anggap balang anu susi' anu samata-mata obee' hi beleng-Ku. Boli mombau kamangian anu opogogalo'akon tiba ngangahan nu lampa anu susumo aijo' suele, anu oposi pake nu belemiu.

³⁸Ihe na mombau anu to noho-nohong susumo aijo' madi'mo oposoop timbali mian anu pinalesayamo hi beleng-Ku.”