Read Saluan NOSABATMO 32 Bible Online

NOSABATMO 32 - Saluan bible

NOSABATMO 32

¹ Salatan bansa Israel nontoa i Musa pininmo hondo madi'mo sampa ninsusule' mae lengkat i bungkutnyo dagi' sabole-bole kiita' mae, aha sinihukmo hi Harun ka' notataemo hi ia, “Kita madi' monsumbu' pa' apaa na anu tinimbalimo hi Musa, mian anu nomboamo mae kita nosabat lengkat mae i Mesir; jadi bauimo mae na kami pilogot anu molaya' kami.”

²Lantas i Harun notatae hi aha, “paha pasi'akon mae na anti-anting mosoni' anu pake-pake i bengkele' ka' i to ana-anak nu belemiu, ka' boa mae hi belengku.”

³Sahingga aha toto samian nompasi'akonmo anti-anting mosoni' ka' binoamo hi Harun.

⁴ I Harun nongalamo anti-anting haha aij'o, lantas pinoki tutuknyomo ka' pinoki baunyomo sa'angu' na patung susumo sapi'. Bansa aijo' notatae, “O Israel, aiyamo na pilogoto anu nolaya'mo mae kita nosabat lengkat mae i Mesir!”

⁵Lantas i Harun nompotinjomo sa'angu' na mezbah i ahop nu sapi' mosoni' aijo' ka' nombebakonmo, “Dodop daagi' ko lamean bau pongadati Tumpu.”

⁶ Dodododopnyo subu-subu hondo, to mia-mian nu Israel nomboamo tino pia-piangkuka na potuu'on anu otunui bau koloban, ka' tino pia-piangkuka mule' na bau koloban mompodame. Aha sinumuhangmo ka' nongkaanmo ka' nonginumo lantas tinuminjomo ka' binasana-sanangmo.

⁷Sahingga Tumpu notataemo hi Musa, “Pintudunmo lia-lia' kalana bansa nu belemiu i laya'mo nosabat mae lengkat i Mesir, nombaumo anu ma'idek.

⁸Aha nombaumo anu madi' pinalentahkon-Ku. Aha nombaumo patong sapi' mosoni' na tinutuk, lantas sinombahnyomo ka' nonsombahkonmo koloban hi ia. Koonyo nu aha aijo'mo na pilogot nu aha anu nomboamo mae aha nosabat lengkat mae i Mesir.

⁹Ku sumbu' na bansa aijo' talalo hondo panggaga.

¹⁰Boli soba-soba monggagakon anu Ku palentahkon. Aku pinusamo hi aha ka' nonsilakaimo aha. Panyo beleyum ka' lee' nu beleyum Ku potimbalimo sa'angu' na bansa anu daka'.”

¹¹ I Musa nongkakasemo hi Tumpu Allahnyo, ia notatae, “O Tumpu kadaka' Belento mombaumo sumo aijo' hi aha? Te misa' Belento nomposalamatmo aha lengkat mae i Mesir nu kakuasa'an ka' kahosonan anu daka'?

¹²De Belento monsilakaimo aha nutaloakonmo nu mian Mesir tukoonyo nu aha belento nolaya' mae bansa aijo' nosabat nolengkat mae i Mesir da opatei na aha i bungkutnyo ka' monsilakai aha iwi-iwi'. Boli sumo aijo'.

¹³ Inau'akon mae na to posa-posaihon nu belento i Abraham, Ishak ka' i Yakub. O inau' nu belento binalajanji'mo ka' binasumpa'mo mombee'i aha lee' konjoo'nyo sumo mandala' i langit ka' mule' iwi-iwi' na tano' anu jinanji'mo nu belento aijo' timbalimo anu nu lee' nu aha na tumpunyo sampetoka sidu-sidutu'.”

¹⁴Sahingga Tumpu nombee'imo tanga'annyo ka' madi'mo daagi' nompotoka balaa' anu tinanga'an-Nyomo da mongkona bansa aijo'.

¹⁵I Musa nintudunmo mae lengkat i bungkutnyo aijo' nomboa mae ohua' na batu anu ko tulisannyo palentah nu Tumpu Allah i batu aijo' ohu-ohua'.

¹⁶Posi Tumpu Allah na mombau batu aijo' ka' nontulis palentah haha aijo'.

¹⁷Hau-haunyo nintudunmo nokaiyong, i Yosua nohongomo to mia-mian nu Israel lewa'mo noloboo', lantas ia notataemo hi Musa, “Daagi' ko anu nahansala'mo kiijo' i pinombauan kemah.”

¹⁸Notatae na i Musa, “O hongo misa' sumo ais nu anu inguntungmo na nahampate kabai kihis nu anu nahungku'mo; Kiijo' hengge' nu mian anu nanyanyimo.”

¹⁹Salatan i Musa ingohanimo kiijo' i pinombauan Kemah, tinoanyomo na sapi' mosoni' aijo' ka' to mia-mian hau-haunyo monsalelei sahingga ia notambuha'mo. Ikiijo'mo, i tengke nu bungkutnyo aijo', na i Musa nonsapahakon batu anu binoanyo mae aijo' sahingga nohimpunyumo toto sahintik.

²⁰Lapas aijo' ingalanyomo na patong sapi' anu binau nu aha mian Israel haha aijo', ingideannyo, pinahanguja'akonnyo sampe nohimpunyu susumo abu', lantas ginalo'akonnyomo i uee. Lapas aijo' pinokaunyomo na aha mian nu Israel da monginum.

²¹Ia notatae hi Harun, “Apaa na anu binaumo nu aha hi beleyum sahingga beleyum nompojohokmo aha nombau dosa' anu daka' hondo?”

²²Tinaaman i Harun, “Boli otambuha'i mae na aku, posi beleyum nonsumbu'mo mosia na kojunjuhi'nyo na mian haha aiya mombau anu ma'idek.

²³Aha notatae hi belengku, 'Kita madi' monsumbu' pa' apaamo na anu tinimbali hi Musa, mian anu nomboamo mae kita lengkat i Mesir, jadi bauimo mae na kami pilogot anu timbali molaya' kami.'

²⁴Aku nompokaumo aha da mombee' mae anti-anting mosoni', lantas aha nombee'mo mae hi belengku. Iwi-iwi' na anti-anting haha aijo' sinuangkumo, lantas tinimbalimo sapi' aiya!”

²⁵Sinumbu'mo i Musa taalu' i Harun nompojohokmo bansa Israel susumo ajahan nolapasmo i uno nu pangkunnyo, sahingga aha tinimbalimo anu saja' okokojoi nu sampobali' nu aha.

²⁶Sahingga tinuminjomo na ia i ahop nu sabatan daka' nu Kemah ka' noloboo', “Ihe na mongka'ima'i Tumpu sabole-bole toka mae aiya!” Sahingga tinokamo mae na tulunan nu bansa Lewi sinihukmo hi Musa,

²⁷ka' ia notataemo hi aha, “Tumpu Allah nu aha Israel nompalentahmo belemiu toto samian da mongkeat bajak miu ka' lumajang motulu i Kemah aiya lengkat i sabatan daka' aijo' lau-laus mokiijo' i sabatan daka' sangga'at ka' opatei na to Utu-utus, to sanga-sangalu ka' anu mompaha ohani kemah nu belemiu.”

²⁸Tulunan nu bansa Lewi nombaumo palentah aijo' ka' i sinaa aijo' kila-kila totolu' na madala na mian i nate pinatean.

²⁹Notatae na i Musa hi tulunan nu bansa Lewi, “Sinaa aiya belemiu nombee'mo butong nu belemiu da timbalimo samata-mata imam anu mombau apaa na anu nu palentahkon nu Tumpu kalana nompateimo to ana-anak ka' to utu-utus nu belemiu, sahingga Tumpu mombalakatimo belemiu.”

³⁰Dodododopnyo i Musa notataemo hi bansa aijo', “Belemiu nombaumo dosa' anu daka' hondo. Panyo uuka aiya aku po'ule'mo mindako i bungkutnyo aijo' mangadap hi Tumpu; o'amalakon mae da aku mohumpak ka'ampunan nu dosa' nu belemiu.”

³¹Lantas i Musa po'ule' mule' namba nangadap hi Tumpu ka' notatae, “Bansa aijo' nombaumo dosa' anu daka' hondo. Aha nombaumo pilogot mosoni' na binau.

³² Sana-sanang pe'e mae na mongampuni dosa' nu aha; de madi', yo alinimo na sanggongku i kitab nu to mia-mian anu tumuu'?”

³³Tinaaman nu Tumpu, “Ola to mia-mian anu binaladosa'mo hi beleng-Ku na Ku alinimo na sanggonyo i kita aijo'.

³⁴Lako'mo uuka aiya, ka' boa na aha aijo' i tampat anu pinoto'ing-Kumo hi beleyum. Malaekat-Kuje na molaya' beleyum, panyo tempo'nyo memang tokamo mian haha aijo' Kuhukumo kalana dosa' haha aijo' nu aha.”

³⁵Lantas Tumpu nompotokamo mae balaa' hi mian haha aijo' kalana aha nompakisamo i Harun nombau patong mosoni' aijo'.