Read Saluan NOSABATMO 33 Bible Online

NOSABATMO 33 - Saluan bible

NOSABATMO 33

¹ Lantas Tumpu notataemo hi Musa, “Pala'imo na tampat aijo' ka' lako'mo tiba bansa anu binoamo mae nu beleyum lengkat i Mesir aijo' namba i lipu' anu jinanji'-Kumo hi Abraham, Ishak, ka' i Yakub tiba lee' nu aha.

²Aku monsaije samian na malaekat da molaya' belemiu. Aku molaa'je bansa nu Kana'an, Amori, Het, Feris, Hewi ka' Yebus.

³Belemiu mambamo mokiijo' i tano' anu kaya ka' molumba'. Panyo Aku madi' mamba tiba belemiu da belemiu madi' Ku silakai i tonga' nu jalan, kalana belemiu te bansa anu panggaga hondo.”

⁴Lapas aijo' Tumpu nonsaimo i Musa da mompoto'i hi bansa Israel, “Belemiu bansa anu panggaga hondo. De Aku mamba tiba belemiu mau mule' ola sasaingoni', memang belemiu Ku silakaimo iwi-iwi'. Pasi'akon na mainan nu belemiu, Ku tantukanje apaa na anu tionyo ahi' Ku bau hi belemiu.” Salatan nohongomopotatae nu Tumpu aijo' aha sinusa'mo hondo sumomo mian anu tinokaanmo nu kasilakaan, lantas pinasi'akonmo nu aha na mainan nu aha. Jadi, salatan nompala'imo Bungkutnyo nu Sinai bansa nu Israel madi'mo nompake mainan.

⁷De bansa Israel mombaumo kemah, i Musa mongalamo olon nu Kemah ka' mompotinjomo gagana' majo'on i pombauan Kemah nu aha. Kemah aijo' osanggohi Kemah nu Tumpu, ka' ihe na mongka'oho' momoita pokinde' hi Tumpu, mambamo mokiijo'.

⁸De i Musa mokiijo'mo i Kemah aijo', mian nu Israel haha aijo' tuminjomo i ahop nu sabatan nu Kemah nu aha ka' mompalahatikan i Musa sampe ia minsoopmo.

⁹Salatan i Musa ninsoopmo, tudunmo mae na kundom i sabatan nu Kemah. I kundom aijo' Tumpu motataemo hi Musa.

¹⁰Salatan mian nu Israel montoamo kundom i sabatan nu Kemah nu Tumpu, aha iwi-iwi' tolodadupumo toto samian i sabatan nu kemah toto samian.

¹¹Tumpu tiba i Musa nompaha ahop susumo mian basisik tiba sangalunyo. Lapas aijo' i Musa minsusule'mo i kemah kajojoongannyo. Panyo i Yosua anak i Nun anu daagi' olitau, anu saja' montulungi kalaja' i Musa, na sajojoongnyo ahi' i Kemah aijo'.

¹²Daagi' kino sansinaan notataemo na i Musa hi Tumpu, “Tumpu, Belento nompalentahmo aku da molaya' bansa aiya mamba i lipu' anu jinanji'mo nu belento, panyo belento madi' mompoto'i mae ihe na nusai mae nu Belento montulungi aku. O Tumpu, Belento notatae, koonyo nu Belento monsumbu' aku ka' sanang hi belengku,

¹³Desumo aijo', yo poto'imo mae mosia na tanga'an nu Belento o Tumpu, da ku bau apaa na anu opalentahkon nu Belento ka' saja' momposanang kinyonyoa nu Belento. Ka' suele o inau' mae saba' bansa aiya pinile'anmo nu Belento, belentomo na tumpu-Nyo.”

¹⁴Tumpu notatae, “Belemiu Ku jagaije da mohumpak tano' anu jinanji'-Kumo.”

¹⁵Tinaaman i Musa, “De Belento Tumpu madi' mamba tiba kami, boli monsai kami mompala'i tampat aiya.

¹⁶Mosia na mian monsumbu' taalu' Belento sanang hi belengku ka' hi bansa aiya de belento madi' montulungi kami? Tumpu saja' hingga-hinggat tiba kami aijo'mo na salaku tanda saba' kami madi' pokakana tiba bansa-bansa sangga'at i dunia aiya.”

¹⁷Notatae na Tumpu hi Musa, “Apaa na anu nu poita Ku bee'mo kalana Ku sumbu' na beleyum, ka' Aku sanang hi beleyum.”

¹⁸Lantas i Musa nongkakasemo, “Tumpu potoa mae hi belengku na jingka de Belento tokamo.”

¹⁹ Tinaaman nu Tumpu, “Aku motulu, Ku potoaje mosia na balu-balu'nyo na Aku salaku anu opopodaka' miu ka' montaloakon sanggongku anu susi'. Akumo na Tumpu, ka' Ku potoaje na kanonongan-Ku ka' kalibosan hi to mia-mian anu pinile'an-Kumo.

²⁰Ohup-Ku madi' Ku potoa hi belemiu, kalana madi' timbali mian montoa Aku ka' tataap sabole-bole tumuu'.

²¹Koko aiya hi beleng-Ku daagi' ko puge'nyo nu batu; beleyum timbali tuminjo ikiijo'.

²²De jingka salaku tanda Aku notulumo, beleyum Ku posoopmo i olot nu puge'nyo nu batu aijo' ka' Ku kukubi nu limang-Ku, Ku lapasakonje de Aku moko potulumo.

²³Lantas Ku hambetje na limang-Ku da beleyum timbali montoa Aku aiya mae i hiku, panyo ohup-Ku madi' nu toa.”