Read Saluan NOSABATMO 38 Bible Online

NOSABATMO 38 - Saluan bible

NOSABATMO 38

¹I Bezaleel nongalamo kau' akasia, lantas ia nombaumo mezbah aijo' sulapa' opat, ko mantannyo ka' ko bolanyo pokakana 2,2 meten ka' ko tangkasnyo 1,3 meten.

²Aita' i pasu'nyo opa-opat obaui anu susumo tanduk anu obau sa'a-sa'angu' tiba mezbah aijo'. Songko-songko olapisi nu tambaga.

³Binaunyo suele na to pamu-pamutu', sikop, to mangko-mangko', to soba-sobang ka' pomposunan apu. Iwi-iwi' na talakonannyo aijo' tambaga na obau.

⁴Ia nonganyam kawat tambaga anu otikubakon akaong i aluknyo, ko tangkasnyo toka i pohintonga'an nu ko tangkasnyo nu mezbah.

⁵Lantas ia nombaumo opat na pasinsingnyo anu opokona akaong i aluknyo nu pasu'nyo opa-opat bau pomposoopan kau' polembanan.

⁶Kau' polembanan aijo' akasia na binau ilapisan nu tambaga.

⁷Lantas ohu-ohua' na kau' polembanan pinosoopnyomo i pasinsingnyo haha aijo' i sambiha' ka' i sambiha' nu mezbah aijo'. Mezbah aijo' dopi' na binau ka' i unonyo lulu.

⁸ I Bezaleel nombaumo pongisian uee, tambaga na obau tiba paningkokoannyo suele tambaga. Tambaga aijo' to mangki-mangkitan anu nu to bou-boune anu mokalaja i sabatan nu Kemah nu Tumpu.

⁹I Bezaleel nompaganmo natan nu Kemah nu Tumpu te hude bola-bola lenan anu ma'ima' hondo na kina'ut. Sasu selatan ko mantannyo 44 meten,

¹⁰ingohi'an nu uampulu' na ohi' tambaga toto sa'angu' paningkokoannyo, tambaga na binau, tiba kait ka' paningkaitnyo salaka na binau.

¹¹Sasu utara suele binau sumo aijo'.

¹²Sasu kinsoban pinokonannyo hude bola-bola ko mantannyo 22 meten, tiba ohi'nyo sampulu' ka' paningkokoannyo sampulu'; kaitnyo ka' pompogantumnyo salaka na obau.

¹³Sasu kabete'an anu pinokonan sabatannyo, ko bolanyo nu hude bola-bola suele 22 meten.

¹⁴I kowi koanan nu sabatan aijo' pinokonan hude bola-bola, ko mantannyo pokakana 6,6 meten, ohi'nyo totolu' ka' paningkokoannyo totolu'.

¹⁶Iwi-iwi' na hude bola-bola titikub i natan aijo' te hude lenan anu ma'ima' hondo na kina'ut.

¹⁷Paningkokoan nu to ohi-ohi'nyo haha aijo' tambaga na binau, panyo kaitnyo, ka' paninggantumnyo ka' tuu'nyo nu ohi'nyo salaka na binau. Iwi-iwi' na ohi'nyo i songko-songko na natan aijo' opaha pogantum sa'angu tiba sa'angu' tiba paningkaitnyo salaka.

¹⁸Lalanse' nu sabatan daka' i natan aijo' lenan anu ma'ima' hondo na kina'ut, anu tinonun tiba laken mobilu', mingkamumu' ka' momea' ka' sinujian bau pombunga-bungai. Ko mantannyo osio' na meten, ka' ko tangkasnyo ohua' na meten, pokakana tiba hude bola-bola nu natan aijo'.

¹⁹Lalanse' nu sabatan aijo' ingohi'an opat tiba paningkokoannyo opat na tambaga. Iwi-iwi' na kaitnyo pongkukubi tuu'nyo tiba paningkaitannyo salaka na binau.

²⁰Panyo totokolonnyo nu Kemah ka' pagannyo tambaga na bianu.

²¹Aiyamo na daputan nu pakakas anu opake i Kemah nu Tumpu tampat anu pompo'una'an ohua' na batu tiba Sampulu' na Palentah nu Tumpu Allah. Daputan aijo' binau kalana pinalentahkon i Musa ka' tinulis nu aha to mia-mian nu Lewi anu mokalaja nu atun i Itamar anak i Imam Harun.

²²I Bezaleel anak i Uri, makumpu i Hur lengkat mae i tulunan bansa Yehuda, nombaumo iwi-iwi' apaa na anu pinalentahkonmo nu Tumpu.

²³Anu nonsampo kalaja i Aholiab anak i Ahisamakh lengkat mae i tulunan bansa Dan, mian anu pande mongukin, anu pande na mompopikilakon ka' monsumbu' montonun hude lenan anu ma'ima' hondo tiba laken mobilu', mingkamumu' ka' momea'.

²⁴Mosoni' anu osombahkon hi Tumpu anu opake i Kemah Susi' iwi-iwi'mo konjoo'nyo samadala na kilogram, anu tinimbang i timbangan anu opake i Kemah nu Tumpu.

²⁵ Salaka anu i humpak tempo'nyo nolekeng bansa Israel konjoo'nyo 3.439 na kilogram tinimbang i timbangan anu opake i Kemah nu Tumpu.

²⁶ Konjoo'nyo aijo' pokakana susumo anu binayanmo nu mian iwi-iwi' anu tuli-tulis i daputan nu pinolekengan aijo'. Toto samian nombayan olinyo anu tinantukanmo, anu tinimbangmo i timbangan anu saja' opake. Tempo'nyo nolekeng aijo' dinaputanakonmo 603.550 na to momo'ane anu umunnyo molabimo mokiita' uampulu' na taun.

²⁷Salaka aijo' 3.400 kilogram opake mombau sa'atu na paningkokoan nu ohi' nu Kemah nu Tumpu ka' lalanse' nu sabatan. Toto sa'angu' na paningkokoannyo ko boatnyo 34 kilogram.

²⁸Labinyo nu salaka aijo' konjoo'nyo 30 kilogram, binaumo i Bezaleel bau pompogantumnyo ka' to kai-kaitnyo anu opokona i ohi'nyo haha aijo', tiba pongkulubinyo tuu'nyo nu ohi'nyo haha aijo'.

²⁹Tambaga anu sinombahkon hi Tumpu iwi-iwi' konjoo'nyo 2.425 kilogram.

³⁰Tambaga aijo' opake mombau paningkokoan nu sabatan nu Kemah nu Tumpu, mezbah tiba kawat tambaga anu inganyamo, iwi-iwi' na talakonan nu mezbah,

³¹paningkokoannyo nu ohi' nu hude bola-bola titikub i natan ka' i sabatan daka', iwi-iwi' na totokolon nu Kemah ka' natannyo titikub.