Read Saluan NOSABATMO 4 Bible Online

NOSABATMO 4 - Saluan bible

NOSABATMO 4

¹Lantas i Musa nontaamimo Tumpu, “Panyo mosia de bisuannyo to mia-mian nu Israel madi' mongka'oho' palesaya ka' madi' mongka'oho' montapali potataengku? Apaa na anu tionyo ku bau de maluannyo aha motatae koonyo nu aha Tumpu madi' nanintoa hi belengku?”

²Tumpu nompokilawamo hi Musa, “Apaa na atina' i lima nu beleyum?” Tinaaman i Musa, “Tokon”.

³Notatae na Tumpu, “Alin mokiijo' i tano'.” I Musa nongalinmo, lantas tokon aijo' nongabali'mo tinimbali ulo ka' i Musa nalaimo madi'mo nonsasuhi.

⁴Tumpu notataemo hi Musa, “Ohanii na ulo aijo', ka' toongi na ikunyo”. Ingohanianmo i Musa ka' i hakopnyo na ulo aijo' ka' lia-lia' po'ule'mo nongabali' tinimbali tokon i lima i Musa.

⁵Notatae na Tumpu, “Obau sumo aijo' da to mia-mian nu Israel palesaya taalu' Aku, Tumpu, Tumpu Allah nu mompolee' nu aha, Tumpu Allah i Abraham, i Ishak, ka' i Yakub nanintoamo hi belemiu.”

⁶Tumpu notatae mule' hi Musa, “Posoop na lima nu beleyum i uno nu baju' nu beleyum.” I Musa nontulutimo, ka' salatan i hambetnyomo na limanyo, limanyo aijo' nopute'mo hondo kalana kinonamo nu panyakit kilit anu mahenyu.

⁷Lantas Tumpu notataemo, “Po'ule' posoop na lima nu beleyum i uno nu baju' nu beleyum.” I Musa nombaumo sumo aijo', lantas limanyo aijo' na'alinmo.

⁸Notatae na Tumpu, “De aha madi' mongka'oho' palesaya hi beleyum, kabai madi' nu akui nu aha salatan montoamo anu okabangangi momona, sahingga anu okabangangi aiya mompotimbalimo aha palesaya.

⁹De aha ma'isa mule' mongka'oho' palesaya hi beleyum mau mule' nontoamo ohua' na anu okabangangi aiya, ka' aha madi' mongka'oho' montapali potatae nu beleyum, ala sangkiding na uee nu Kaunyo nu Nil ka' dudu'akon i tano'. Uee aijo' mongabali' timbalimo baso'.”

¹⁰Panyo i Musa notatae, “O, Tumpu, aku misa' mian anu pande na motatae, mau naipuan mae mau uuka aiya, salatan Tumpu nompoto'imo hi belengku. Maboat na jila'ku, manyeeng na motatae ka' motatae madi' lompat.”

¹¹Tumpu notataemo hi ia, “Ihe na nombee'i nganga' hi manusia? Ihe na nompotimbali ia momo' kabai mabongon? Ihe na nompotimbali ia moko ala montoa kabai mapisok? Te misa' Aku, Tumpu?

¹²Uuka aiya, lako'mo, Ku tulingije na beleyum motatae ka' mompogulu' apaa na anu tionyo nu taloakon”.

¹³Panyo tinaaman i Musa, “Ku poita, boli monsai aku, o Tumpu, saimo mian sangga'at.”

¹⁴Lantas Tumpu pinusamo hi Musa ka' notatae, “Te misa' beleyum ko utus sanggonyo i Harun? Ku sumbu' ia pande na motatae. Totu-totu'u ia hau-haunyo mambamo mae mo'uuka, ka' ia sanaang na singkabot tiba beleyum.

¹⁵Basale'mo tiba ia, ka' poto'i hi ia apaa na anu tionyo nutaloakon i Harun. Ku tulungije na belemiu ohua' ka' mompogulu' apaa na anu tionyo otaloakon nu belemiu ka' obau.

¹⁶Ia tionyo motatae mowakini beleyum i ahop nu layat. Ia na mombolosakon beleyum motatae ka' beleyum nu anggapmo sumo Tumpu Allah anu montaeakon apaa na anu tionyo nu taeakon.

¹⁷Boa na tokon atina' kalana tiba tokon atina' beleyum timbalimo mombau anu okabangangi aijo'.”

¹⁸Lapas aijo' i Musa ninsusule'mo i laigan hi Yitro tuuma nu bengkele'nyo, ka' notatae hi ia, “Pobee'mo mae na aku minsusule'mo mamba i Mesir molenga to utu-utusku ka' montoa pa' aha daagi' tutuu'.” I Yitro notatae hi Musa, “Timbali; mambamo ka' kopi-kopian mae.”

¹⁹Tempo'nyo i Musa daagi' i tano' nu Midian, Tumpu notataemo hi ia, “Pinsusule'mo mamba i Mesir. Iwi-iwi' na mian anu mongkahanda'i mompatei beleyum sinilakamo”.

²⁰Lantas i Musa nonsale'imo bengkele'nyo ka' to ana-anaknyo ka' pinosake'mo na aha i keledai lantas aha nambamo hingga-hinggat nokiijo' i Mesir. Kalana palentah nu Tumpu, i Musa nomboa ahi' tokonnyo.

²¹Tumpu notatae hi Musa, “Aku mombee'imo kuasa hi beleyum da mombau anu okabangangi. Jadi de beleyum minsusule'mo i Mesir, baumo iwi-iwi' na anu okabangangi i ahop nu tomundo Mesir. Panyo Ku pojadimo na ia da panggaga, sahingga ia madi' mongka'oho' mompobee' bansa aijo' mamba.

²²Lantas poto'imo hi tomundo aijo' taalu' Aku, Tumpu, mompotuunmo mae sumo uuka: 'Israel atina' anak-Ku anu tumpenyo,

²³ ka' beleyum Ku palentahmo da mompobee' anak-Ku aijo' mambamo da ia timbali monsombah Aku. Panyo beleyum madi' mompobee'. Uuka aiya ku pateimo na anak nu beleyum anu tumpenyo.' ”

²⁴I sa'angu' na tampat pinombauan nu aha kemah aijo' tempo'nyo aha namba aijo'. Tumpu tinokamo hi Musa ka' ka oho'mo mompatei ia.

²⁵I Zipora, bengkele'nyo, nongalamo sa'angu' na batu anu matajom ka' sinayu'annyo na kilit bagi nu mo'ane hi anaknyo, ka' pinokelanyo hi tengke i Musa. Notataemo na i Zipora, “Beleyum langkai'ku anu kinelankumo baso'.”

²⁶Han aijo' tinaloakonnyo kalana ko tusanannyo nu adat sunat. Sahingga Tumpu madi'mo jinadi na nompatei i Musa.

²⁷Hau-haunyo aijo' Tumpu nompoto'imo hi Harun, “Lako'mo mamba i padang bola da mompahakabot i Musa.” I Harun nambamo ka' nompahakabotmo tiba utus ise'nyo i bungkutnyo anu susi' ka' ingookannyomo na ia.

²⁸I Musa nonsisikmo hi Harun iwi-iwi' apaa na anu tinaloakonmo nu Tumpu hi ia tempo'nyo ia po'ule'mo sinai minsusule' mokiijo' i Mesir ka' mule' mongkona iwi-iwi' anu okabangangi anu tionyo nu bau.

²⁹Lapas aitu i Musa ka' i Harun nambamo nokiijo' i Mesir ka' nomposihukmo iwi-iwi' na to pola-polaya' nu aha Israel.

³⁰I Harun nompoto'imo hi aha iwi-iwi' na anu tinaloakonmo nu Tumpu hi Musa, lantas i Musa nombaumo iwi-iwi' na anu okabangangi i ahop nu mian haha aijo'.

³¹Sahingga pinalesayamo na aha, ka' salatan aha nohongomo taalu' Tumpu daagi' monginau' bansa Israel ka' nontoamo iwi-iwi' na kasansalan nu aha, aha dinumaladupumo ka' nonsombahmo.