Read Saluan NOSABATMO 5 Bible Online

NOSABATMO 5 - Saluan bible

NOSABATMO 5

¹Lapas aijo' i Musa ka' i Harun nambamo nangadap hi tomundo Mesir ka' nompoto'i, “Sumo uuka na palentah nu Tumpu, Tumpu Allah Israel, 'Pobee' mae na bansang-Ku mamba da aha timbali monsombah beleng-Ku kiijo' mae i padang bola.' ”

²“Ihe na Tumpu aijo'?” pinokilawa i tomundo. “Kadaka' aku montapalimo Ia ka' mompobee'mo bansa Israel mamba? Aku madi' monsumbu' Tumpu aijo' ka' mian nu Israel madi' ku pobee' mamba.”

³I Musa ka' i Harun notatae, “Tumpu Allah mian nu Ibrani nanintoamo hi kami. Pobee'mo mae na kami mamba i padang bola kojo'onnyo tolun sinaa na lumajang da monsombahkonmo koloban hi Tumpu, Tumpu Allah mami. De madi' obau mami na aijo', kami Nu pateimo nu panyakit kabai mahampate.”

⁴Notataemo na i tomundo hi Musa ka' hi Harun, “Kadaka' komiu mongatunmo mian haha aijo' da aha madi'mo mombau kalaja nu aha? Palentah na botuan haha aijo' mokalaja!

⁵Mian haha aijo' talalomo nanjoo'. Ka' uuka aiya gagalan nu beleyum da aha bolimo mokalaja!”

⁶Sinaa uuka to ponga-pongatun nu aha bansa Mesir ka' to mando-mandon nu aha bansa Israel nohumpakmo palentah hi tomundo,

⁷“Bolimo mombee'i haat bansa aijo' da bau batu tela. Bakas da aha mambaje mosi lio.

⁸Panyo pokau na aha mombau batu tela konjoo'nyo madi maga'a susumo anu imomona. Aha ola saja' moluluk; mokonyo aijo' aha me saja' mososon ka' sapota-potatae da opobee'mo mamba monsombahkon koloban hi Tumpu Allah nu aha.

⁹Pakisa na mian haha aijo' mokalaja lebe makeke, da aha olingkang nu kalaja ka' madi'mo ko tempo' mohongo sisik anu madi' ko kaliangannyo.”

¹⁰To ponga-pongatun nu aha bansa Mesir ka' to mando-mandon nu aha Israel haha aijo' nosabatmo lantas nompoto'imo mian nu Israel haha aijo', “I Tomundo nompalentahkonmo da belemiu madi'mo obee'i haat.

¹¹Belemiu tionyo ahi' mosi lio iyaya mae, panyo o inau', batu tela anu obau nu belemiu konjoo'nyo madi' maga'a susumo anu momona.”

¹²Sahingga nambamo na mian nu Israel nonsongkohi songko-songko na tano' nu Mesir mompolimu' haat.

¹³To ponga-pongatun saja'mo nompalentah da sansina-sinaa ko anu nubau nu aha na batu tela anu pokakana na konjoo'nyo sumo tempo'nyo aha obee'i haat.

¹⁴To pongaponatun haha aijo' nondokemo to mando-mandon nu aha Israel anu binee'anmo kalaja monjagai pakalaja'an. Aha nompokilawa, “Kadaka' uuka aiya bansa nu belemiu nombau batu tela konjoo'nyo madi'mo susumo anu u'utu mae momona?”

¹⁵Lantas to mando-mandon nu aha Israel nambamo nangadap hi tomundo ka' nososon, “Kadaka' belento Tomundo nombaumo sumo aiya hi kami?

¹⁶Kami madi' obee'i mae haat, panyo opakisa mombau batu tela! Uuka aiya kami odoke padahan anu ko pangkat mokalaja hi Tomundo na sala'!”

¹⁷Tinaaman i tomundo, “Belemiu memang moluluk madi'mo mongka'oho' mokalaja. Mokonyo aijo' belemiu momoitamo hi belengku da opobee'mo mamba monsombahkon koloban hi Tumpu nu belemiu.

¹⁸Lako'mo po'ule' pokalaja. Haat madi'mo obee' hi belemiu, panyo belemiu sabole-bole tionyo mombau batu tela anu konjoo'nyo madi' maga'a sumo anu momona.”

¹⁹Mandon haha aijo' tinonginau'mo taalu' aha sinusa'mo salatan pinoto'imo na to mia-mian nu Israel tionyo ahi' mombau batu tela anu sabole-bole konjoo'nyo madi' maga'a susumo anu momona.

²⁰Salatan aha nosabatmo lengkat mae i laigan nu tomundo, aha siningkabotmo tiba i Musa ka' i Harun anu hau-haunyo montanda'imo aha.

²¹Notataemo na mandon haha aijo', “Tumpu monsumbu' apaa na anu binaumo nu belemiu! Ia mohukumo belemiu! Belemiu na nonsaduakon kami kina'idekanmo i tomundo ka' to pangka-pangkat anu mokalaja hi ia, sahingga aha mongkahanda'imo mompatei kami.”

²²Lantas i Musa po'ule'mo nangadap hi Tumpu ka' notatae, “O Tumpu, kadaka' bansa Israel talalomo Nu bau ide-idek sumo aiya? Kadaka' Belento nonsaimo mae aku no uuka mae?

²³Salatanmo pe'e aku nangadap hi tomundo ka' notatae nomboa sanggo nu belento, ia nontampu'unimo nonsakisa bansa aiya. Ka' madi' ko anu binau nu belento apa-apaa nontulungi aha.”

²⁴Lantas pinoto'imo nu Tumpu hi Musa, “Uuka aiya beleyum montoamo mosia na Ku bau na i tomundo. Ia Ku pakisamo mompobee' bansang-Ku. Totu-totu'u, ia Ku pakisamo molaa' aha mompala'i lipu' aiya.”