Read Saluan NOSABATMO 6 Bible Online

NOSABATMO 6 - Saluan bible

NOSABATMO 6

¹Tumpu Allah notataemo hi Musa. Ia notatae, “Akumo na Tumpu.

² Aku nanintoamo hi Abraham, hi Ishak ka' hi Yakub salaku Tumpu Allah Anu Daka' hondo na kuasanyo, panyo madi' pinosumbu'-Ku na butong-Ku hi aha; sanggong-Ku 'Tumpu'.

³Aku suele nombaumo palajanjian tiba aha. Aku binalajanji'mo, Ku bee'mo na lipu' Kana'an hi aha, lipu' tampat kinajojoongan nu aha naipuan mae tinumuu' salaku mian anu i salipu'an.

⁴I hongong-Kumo na aha mian nu Israel talalomo sinansala kalana obotuani nu bansa Mesir, lantas tinonginau'mo na Aku i palajanjian-Ku aijo'.

⁵Jadi poto'imo hi bansa Israel taalu' Aku notataemo hi aha: Akumo na Tumpu; belemiu atina' obotuani nu bansa Mesir Ku pobebasmo. Ku potoamo na kakuasa'an-Ku anu opalias, da momposalamat belemiu, ka' mompokonaimo hukuman anu maboat hondo hi bansa Mesir.

⁶Belemiu Ku potimbalimo mian anu palesayamo hi beleng-Ku ka' Aku timbalimo Tumpu Allah nu belemiu. Sahingga osumbu'mo nu belemiu taalu' Aku aiya Tumpu, Tumpu Allah nu belemiu, anu nompobebasmo belemiu binotuanan i Mesir.

⁷Belemiu Ku boamo i lipu' anu jina-jinanji'-Kumo ka' binauakonmo sumpa' hi Abraham, hi Ishak, ka' hi Yakub; tano' aijo' Ku bee'mo hi belemiu, belemiumo na tumpunyo. Akumo na Tumpu.”

⁸Iwi-iwi' na potuunon nu Tumpu aijo' pinotokamo i Musa hi bansa Israel, panyo aha madi' mongka'oho' mompajuli i Musa, kalana aha binotuanan aijo' tahahumo kinabisa'an, sahingga nonsaduakonmo aha ingise-ise'mo na kinyonyoa kalana madi'mo moko ala mombau apa-apaa.

⁹Lapas aijo' Tumpu notatae mule' hi Musa,

¹⁰“Lako'mo mangadap hi tomundo Mesir ka' poto'i koonyo nu Tumpu, tomundo nu Mesir tionyo ahi' mompobee' bansa Israel mompala'imo lipu'nyo.”

¹¹Panyo tinaaman i Musa, “Posi mian nu Israel madi' mongka'oho' mohongo-hongo aku. Madi' koko tomundo nu Mesir mohongo mian anu madi' pande na basisik sumo aku?”

¹²Sumo aijo' na Tumpu nonsai i Musa ka' i Harun da mompotoka hi bansa Israel ka' hi tomundo Mesir tukoonyo nu Tumpu aha pinalentahmo nu Tumpu da molaya' bansa Israel mosabatmo mompala'i Mesir.

¹³Aiyamo na tundulan i Musa ka' i Harun: I Ruben, anak tumpe i Yakub, kino anak aha opat na mo'ane: I Henokh, i Palu, i Hezron, ka' i Karmi. Aha aijo'mo na mompolee' mae nu tulunan i Ruben.

¹⁴I Simeon ka' bengkele'nyo boune nu Kana'an kino anak aha anom na mo'ane: I Yemuel, i Yamin, i Ohad, i Yakhin, i Zohar ka' i Saul. Aha aijo'mo na mompolee' mae nu tulunan i Simeon.

¹⁵I Lewi kino anak aha totolu' na mo'ane: I Gerson, i Kehat ka' i Merari; aha aijo'mo na mompolee' mae nu tulunan i Lewi. I Lewi nontokai umunnyo 137 na taun.

¹⁶ I Gerson kino anak ua'aha na mo'ane: I Libni ka' i Simei; aha kino lee' manjoo'.

¹⁷I Kehat kino anak aha opat na mo'ane: I Amram, i Yizhar, i Hebron ka' i Uziel. I Kehat nontokai umun 133 na taun.

¹⁸I Merari kino anak ua'aha na mo'ane: I Mahli ka' i Musi. Aijo'mo na mompolee' mae nu tulunan i Lewi ka' lee' mae nu aha toto samian.

¹⁹I Amram no'osoa tiba i Yokhebed, boune utus ise' nu tuumanyo, ka' to ana-anak nu aha atina'mo i Harun ka' i Musa. I Amram tinumuu' 137 na taun.

²⁰I Yizhar kino anak aha totolu' na mo'ane: I Korah, i Nefeg ka' i Zikhri.

²¹I Useil suele kino anak aha totolu' na mo'ane: I Misael, i Elsafan ka' i Sitri.

²²I Harun no'osoa tiba i Eliseba, anak boune i Aminadab; i Eliseba suele moto utus tiba i Nahason. I Eliseba nohampeakon i Nadap, i Abihu, i Eleazar ka' i Tamar.

²³I Korah kino anak aha totolu' na mo'ane: I Asir, i Elkana ka' i Abiasaf. Aha aijo'mo na mompolee' mae nu aha sa'anakan i Korah.

²⁴I Eleazar, anak mo'ane i Harun, no'osoa tiba sala'samian na anak i Putiel, ka' anak nu aha aijo'mo i Pinehas. Aijo'mo iwi-iwi' na kapala nu mompolee' ka' kapala nu aha sa'anakan nu tulunan i Lewi.

²⁵I Harun ka' i Musa aijo'mo na anu pinalentah nu Tumpu da momboa to mia-mian nu Israel mosabat lengkat i Mesir.

²⁶Ua-ua' aha nangadapmo hi tomundo Mesir da ia mompobee' mian nu Israel.

²⁷Tempo'nyo Tumpu binasisikmo tiba i Musa ka' i Harun kiijo' mae i Mesir.

²⁸Notataemo na Tumpu, “Akumo na Tumpu. Potokakon hi tomundo nu Mesir iwi-iwi' apaa na anu pinoto'ingkumo hi belemiu.”

²⁹Panyo tinaaman i Musa, “Tumpu, Belento nonsumbu' saba' aku madi' pande na basisik. Madi' koko i tomundo mongka'oho' mohongo-hongo aku?”