Read Saluan NOSABATMO 7 Bible Online

NOSABATMO 7 - Saluan bible

NOSABATMO 7

¹Tumpu notatae hi Musa, “Ku potimbalimo na beleyum sumo Tumpu Allah i ahop i tomundo, ka' utus nu beleyum i Harun na basisik hi ia salaku nabi nu beleyum.

²Potoka hi Harun iwi-iwi' apaa na anu pinalentahkon-Kumo hi beleyum. Pokau na i Harun mompoto'i hi tomundo tokoong-Ku i tomundo tionyo ahi' mompobee' mian nu Israel mompala'imo lipu' nu Mesir.

³ Panyo Ku potimbalimo na i tomundo da panggaga. Ia madi' koko mompajuli beleyum, mau mule' Aku mompodaagi'mo manjoo' na balaa' kiijo' i Mesir.

⁴Kalana aijo' Ku hukumo na Mesir na hukuman anu toto boa-boat, lapas aijo' Ku boamo iwi-iwi' na bansa Israel, mian anu pinalesayamo hi beleng-Ku, mosabatmo mompala'i lipu' aijo'.

⁵Sahingga nu sumbu'je nu mian nu Mesir saba' Aku aiya Tumpu, tempo'nyo Aku mohukumo aha ka' momboamo Israel nosabat mompala'i lipu' nu aha.”

⁶Apaa na anu pinalentahkonmo nu Tumpu binaumo i Musa ka' i Harun.

⁷I Musa umunnyo 80 mo na taun, ka' i Harun 83 mo na taun, tempo'nyo aha mangadapmo hi tomundo nu Mesir.

⁸Tumpu notatae hi Musa ka' hi Harun.

⁹“De i tomundo mompoita belemiu mombau anu okabangangi salaku bukuti', pokau na i Harun mongala tokonnyo ka' olumbu'akon i tano' i ahop hi tomundo. Tokon aijo' mongabali'mo timbali ulo.”

¹⁰Sahingga nambamo na i Musa ka' i Harun nangadap hi tomundo ka' binaumo nu aha apaa na anu pinalentahkon nu Tumpu Allah. I Harun nolumbu'akonmo tokonnyo i tano i ahop hi tomundo ka' to pangka-pangkat anu mokalaja hi tomundo, lantas tokon aijo' nongabali'mo tinimbali ulo.

¹¹Kalana aitu i tomundo nolagamo to mia-miannyo anu pa ilimu' ka' pangatahuanon, lantas aha suele nombaumo sumo aijo' nu ilimu' nu aha.

¹²Aha nolumbu'akonmo tokon nu aha i tano' lantas tokon haha aijo' nongabali'mo tinimbali ulo. Panyo tokon nu aha i lonyomo nu tokon i Harun.

¹³Mau mule' sumo aijo' i tomundo sabole-bole pinanggaga ka' madi' mongka'oho' mompajuli potatae i Musa ka' i Harun, susumo anu pinoto'imo nu Tumpu.

¹⁴Lapas aijo' Tumpu nompoto'imo hi Musa, “Tomundo aijo' pinanggagamo hondo; ia madi' mongka'oho' mompobee' bansa Israel mamba.

¹⁵Mokonyo aijo' lako'mo singkaboti na ia subu-subu, de ia mokaiyongmo i Kaunyo nu Nil. Boa na tokon anu nongabali' tinimbali ulo aijo' ka' tanda'i na ia toka i biwi nu kaunyo.

¹⁶Poto'i hi tomundo aijo': Tumpu, Tumpu Allah nu aha mian Ibrani nonsaimo mae aku mompotoka hi belento Tuanku da mompobee'mo miannyo anu pinalesayamo hi Ia, mambamo momsombah Ia i padang bolaa. Panyo sangkutnyo uuka aiya belento Tuanku madi' mongka'oho' mohongo-hongo.

¹⁷ Kalana aijo', Tumpu notataemo sumo uuka, 'Pa' apaa na anu Ku bau atina'je ka' nusumbu' nu belento taalu' Akumo na Tumpu. Tiba tokon aiya ku sapahimo na kilit nu uee nu kaunyo, ka' mongabali'mo na ueenyo timbali baso'.

¹⁸To ika-ikan matemo, ka' kaunyo aiya mabusikmo, sahingga bansa Mesir madi'mo timbali monginum ueenyo.' ”

¹⁹Tumpu nompoto'i hi Musa, “Pokaumo na i Harun mongala tokonnyo ka' opotadu mompatui iwi-iwi' na kaunyo to sepe-sepe' ka' to kola-kolam anu aiya i Mesir. Ueenyo timbalimo baso', ka' i songko-songko na lipu' ko baso'nyomo ka' mule' i toka-kas pongisian uee, ka' to gumba-gumbang batu.”

²⁰Apaa na anu pinalentahkonmo nu Tumpu, binaumo i Musa ka' i Harun. I ahop i tomundo ka' to pangka-pangkat anu mokalaja hi ia, i hangkatmo i Harun na tokonnyo ka' nonsapahi uee nu Kaunyo Nil, sahingga ueenyo nongabali'mo tinimbali baso'.

²¹To ika-ikan anu i kaunyo aijo' singkapmo i nate ka' nabusikmo hondo, sahingga mian nu Mesir madi'mo timbali monginum uee haha aijo'. Songko-songko na lipu' nu Mesir kahomo baso'.

²²Panyo anu toto panga-pangatahuanon i Mesir nombaumo suele sumo aijo' nu ilimu' nu aha, sahingga i tomundo sabole-bole panggaga. Susumo anu tinaloakonmo nu Tumpu, i tomundo madi' mongka'oho' mohongo-hongo i Musa ka' i Harun.

²³Aitu pe'e ia ola ahi' ninsusule' i laigan nu tomundo sangkiding pe'e madi' pinajuliannyo apaa na anu tinimbali aijo'.

²⁴Iwi-iwi' na mian Mesir nongkekemo bolo' tutus biwi nu kaunyo molio uee anu o inum, kalana uee nu kaunyo aijo' madi'mo timbali o inum.

²⁵Ingipitun na olotnyo salatan i Tumpu nongkutukimo kaunyo nu Nil.