Read Saluan NOSABATMO 8 Bible Online

NOSABATMO 8 - Saluan bible

NOSABATMO 8

¹Lantas Tumpu notataemo hi Musa, “Lako'mo mamba mangadap hi tomundo ka' potoka hi ia na potuunon-Ku aiya: 'Pobee'mo na mian anu pinalesayamo hi beleng-Ku da mambamo monsombah Aku.

²De beleyum madi' mompobee', Ku potokamo mae manjo-manjoo' na bahangkakak i lipu' aiya, salaku hukuman.

³Kaunyo nu Nil mobuke'mo nu bahangkakak, sahingga binatang haha aijo' mosabat mae i uee ka' minsoop i laigan nu belento tomundo, i salipi' kahoyotan ka' i tampat kahoyotan nu belento, i uno nu laigan nu batu-batu mian anu ko pangkatnyo ka' layat, ka' mule' i tampat pombauan roti ka' i iwi-iwi' na kuhon.

⁴Bahangkakak haha aijo' malalumpatan mompoliba'i beleyum, iwi-iwi' anu ko pangkatnyo ka' layat.' ”

⁵Tumpu notatae hi Musa, “Pokau na i Harun montangkakon tokonnyo mokiijo' i sasu nu to kau-kaunyo, to sepe-sepe' ka' hi to kola-kolam, da to baha-bahangkak lubat ka' monsongkohi tano' nu Mesir.”

⁶Sahingga i Harun nontangkakonmo tokonnyo nokiijo' i sasu iwi-iwi' na uee sahingga i lubatmo na to baha-bahangkakak nonsongkohi iwi-iwi' na lipu'.

⁷Panyo to mia-mian anu pa ilimu' nompojalanmo ilimu' nu aha, panyo ola ahi' da nompaka panjoo' na bahangkakak haha aijo' i lubat i lipu' aijo'.

⁸I tomundo nolagamo i Musa ka' i Harun ka' nompoto'i “Balado'amo hi Tumpu da Nu alini na bahangkakak haha aiya sahingga ku pobee'je na bansa nu beleyum mamba monsombahkon koloban hi Tumpu.”

⁹Tinaaman i Musa, “Sanang na kinyonyoangku mondo'akon belento Tuanku. Potantumo na tempo'nyo da ku do'akon na belento Tuanku, to pangka-pangkat ka' layat. Da balaa' bahangkakak haha aijo' madi'mo mae toka hi belento Tuanku, ka' madi'mo ko anu tontuha', sangadinyo anu ikiijo' i Kaunyo nu Nil.”

¹⁰Tomundo aijo' nontaami, “Do'akon mae na aku dodop.” Notatae na i Musa, “Ku bauje apaa na anu pinoitamo nu belento Tuanku. Sahingga osumbu'je nu belento Tuan saba' madi' ko Tumpu Allah sangga'at sumo Tumpu, Tumpu Allah mami.

¹¹Ia madi'je mompolubat mae bahangkakak haha aijo' toka hi belento Tuanku, hi to pangka-pangkat ka' hi layat. Madi'mo ko bahangkakak i to lai-laigan sangadinyo i Kaunyo nu Nil.”

¹²Lantas i Musa ka' i Harun nompala'imo i tomundo. Lapas aijo' i Musa binalado'amo hi Tumpu da mongalini bahangkakak haha aijo' anu pinotoka-Nyomo mae hi tomundo.

¹³Tumpu nompopo'i'mo anu pinoita i Musa, ka' bahangkakak haha aijo' anu i uno nu iwi-iwi' na laigan ka' hi iwi-iwi' na natan ka' hi iwi-iwi' na ale' singkapmo i nate.

¹⁴Mian nu Mesir nontoluki bangke' nu bahangkakak haha aijo' manjoo' hondo na tambulannyo sahingga songko-songko na lipu' binusikannyomo.

¹⁵Salatan tinoa i tomundo taalu' bahangkakak haha aijo' singkapmo i nate, ia sabole-bolemo pinanggaga. Ka' susumo anu tinaloakonmo nu Tumpu, i tomundo madi' mongka'oho' mompajuli potatae i Musa ka' i Harun.

¹⁶Tumpu notataemo hi Musa, “Pokau na i Harun monsapahi tano' nu tokonnyo, da songko-songko na lipu' nu Mesir abu'nyo mongabali' timbalimo momot.”

¹⁷Lantas sinapahanmo i Harun na tano' nu tokonnyo, sahingga iwi-iwi' na abu' i Mesir nongabali'mo tinimbali momot anu nongkampuhimo manusia ka' binatang.

¹⁸Anu pa ilimu' nonsobakonmo ilimu' nu aha da suele mompodaagi' momot, panyo madi' pinoko bau nu aha. Iyaya mae daagi'mo ko momotnyo,

¹⁹ sahingga anu pa ilimu' haha aijo' notataemo hi tomundo, “Aiya Tumpu Allah na nombau,” panyo tomundo aijo' panggaga, ka' susumo anu tinaloakonmo nu Tumpu, tomundo aijo' madi' mongka'oho' mompajuli potatae i Musa ka' i Harun.

²⁰Tumpu notatae hi Musa, “Lako' dodop subu-subu hondo singkaboti na i tomundo hau-haunyo ia mokaiyongmo i kaunyo, ka' potokakon hi ia na potataeng-Ku aiya: 'Pobee'mo mae na mian anu pinalesayamo hi beleng-Ku mambamo monsombah Aku.

²¹De beleyum madi' mompobee' saba' Ku potokamo mae na lalo hi beleyum, hi to mia-mian anu ko pangkatnyo ka' hi layat. Iwi-iwi' na laigan nu mian Mesir ka' mule' songko-songko na lipu' mobuke'mo nu lalo.

²²Panyo tano' nu Gosyen madi' nu tokai, tampat kajojoongan nu mian anu pinalesayamo hi beleng-Ku. Kiijo' mae madi' nutokai nu lalo, da osumbu' nu belemiu saba' Aku, Tumpu, na nombaumo han aijo'.

²³Madi' pokakana na Aku mombau mian anu pinalesayamo hi beleng-Ku tiba layat nu beleyum. Anu okabangangi aijo' timbalimo dodop.' ”

²⁴Tumpu nompotokamo mae lalo manjoo' hondo i laigan nu tomundo ka' hi iwi-iwi' na laigan nu to mia-mian anu ko pangkatnyo. Songko-songko na lipu' nu Mesir mongoa'imo hondo sansala kalana lalo haha aijo'.

²⁵Lapas aijo' i lagamo i tomundo na i Musa ka' i Harun lantas pinoto'inyomo, “Lako'mo mamba sombahkon na koloban hi Tumpu Allah nu belemiu, panyo ola i lipu' aiya.”

²⁶“Sahanyo boli,” tinaaman i Musa, “kalana mian nu Mesir madi'mo sanang na kinyonyoa de montoamo anu osombahkon mami aijo', ka' tantu kami opahambunu'akonmo nu batu sampe mate.

²⁷Kami tionyo ahi' mamba i padang bolaa anu kojo'onnyo tolun sinaa na molajangi mamba monsombahkon koloban hi Tumpu Allah mami, susumo anu pinalentahkon-Nyomo hi kami.”

²⁸I tomundo notataemo, “Ma'ima'mo, ku pobee'mo na belemiu mamba i padang bolaa monsombahkon koloban hi Tumpu, Tumpu Allah nu belemiu, asan belemiu boli mamba majo'on. O'inau do'akon mae na aku!”

²⁹Tinaaman i Musa, “De aku mambamo ku do'akonje lia-lia' hi Tumpu da dodop lalo haha aijo' mompala'imo belento Tuanku, to mia-mian anu ko pangkatnyo ka' layat. Panyo bolimo mongakali kami, ka' bolimo montewa' bansa Israel mamba monsombahkon koloban hi Tumpu.”

³⁰I Musa nambamo nompala'imo i tomundo, lantas binalado'a hi Tumpu,

³¹ka' tinalimamo nu Tumpu na do'a i Musa. Lalo haha aijo' singkapmo i lumahap nompala'imo i tomundo, to mia-mian anu ko pangkatnyo ka' layat. Sa'angu' pe'e madi'mo ko anu jinojoong.

³²Panyo aiya suele i tomundo sabole-bole ahi pinanggaga ka' madi' ahi' nompobee' bansa aijo' da mambamo.