Read Saluan AYUB 14 Bible Online

AYUB 14 - Saluan bible

AYUB 14

¹Salatanmo pe'e manusia aijo' pinohampe madi' moko ala mombau apa-apaa, ka' madi' mahoson; umunnyo kodo' ka' saja' mongoa'i sansala.

²Ia minsumpe lantas mangkalualemo susumo bunga-bunga; susumo lolung monti-montiik madi'mo otoa.

³O Tumpu Allah, madi' minsoop i akan na Belento mongka oho' monto mae aku, ka' mompopangadap aku da oputusi nu Belento!

⁴Te toho' mule' na manusia anu baladosa' moko ala mompodaagi' anu talalo hondo ma'ima'?

⁵Konjoo'nyo nu umun nu manusia tinantukanmo nu Belento; konjoo'nyo nu bitu'onnyo pinatikolomo nu Belento. Ka' mule' kinoyomo nu Belento toka iya na kantumuu'annyo; ia madi' timbali moliu-liu.

⁶Bakasmo da ia mingkainmo, bolimo lewa' olingkang na ia; da nu oa'i totu-totu'u na kasanangan nu kantumuu'annyo sampe tokamo i ka'ahenannyo.

⁷Daagi' ko anu nutaha'imani nu kau' anu tinaa'mo; ia daagi' po'ule' minsumpe, ka' mimpanga'.

⁸Maumo i uno nu tano' bakatnyo napukmo, ka' tu'onyo nanggasmo kalana nahutakmo,

⁹panyo de nukonamo nu uee ia po'ule'mo tumuu'; susumo anu sala'je sinu'an sinin na sumpenyo singkapmo lubat.

¹⁰Panyo de manusia silakamo, madi'mo daagi' ko anu lewa' monsisik; ia silakamo lantas moyamo na ia?

¹¹Sumo uee aijo' i talaga sinumo'oamo sumo kaunyo tinolotutusmo ka' ilambakonnyomo no'oti na ueenyo,

¹²sumo aijo'mo na manusia anu sinilakamo: ia madi'mo po'ule' tumuu'. Ia madi'mo daagi' tolosikangkang de daagi' ko langit aita' ia hoyo-hoyot madi'mo daagi' toho' mobula.

¹³Posulukmo mae na aku i uno nu dunia nu aha anu sinilakamo; jagaiakon mae na aku sampe Belento madi'mo daagi' motambuha'. Panyo patikolo mae ahi' na tempo'nyo sampe toka hipian na monginau' mae butongku.

¹⁴Kalana de bisuannyo manusia silakamo te ia daagi' po'ule' tumuu'? Toka sansina-sinaa na aku montanda'i sampe tokaje na tempo'nyo madi'mo ko kasansala'anku anu sumo aiya.

¹⁵Sahingga Belento molagamo aku, ka' aku mule' montaamimo belento; Belento po'ule'mo mule' mongkalibosi aku manusia anu pinotimablimo nu Belento.

¹⁶Lantas pa' moya na palalangkasanku saja' nujagai nu Belento, panyo madi'mo lewa' nu'inau' nu Belento na dosa'ku.

¹⁷Dosa'ku nu ampunimo nu Belento ka' nu alinakonmo nu belento; kasala'anku u'utu mae madi'mo lewa' nututugi nu Belento.

¹⁸Saidi' mae sinin na bungkutnyo motuha-tuhanmo, ka' bungkutnyo nu batu molinggi-lingginmo madi'mo ko anu manintimpas i tampatnyo.

¹⁹Iwi-iwi' na batu lewa'mo nukikisi nu uee anu mabohos hondo na mo'ili; tano' nu anjuhakonmo nu ujan anu mabohos hondo. Sumo aijo'mo na Belento madi'mo hondo-hondo mombee'i apaa-apaa na anu nu ima-imani nu manusia.

²⁰Nupatundu'mo nu Belento na ia sampe toka sidu-sidutu'; sinaimo nu Belento na ia da mambamo ka' binali'anmo nu Belento na ohupnyo.

²¹To ana-anaknyo tinimbalimo mian anu tinalasanggomo, panyo ia madi' nonsumbu-sumbu'. Ka' de bisuannyo aha madi'mo o angga'i madi' ko anu mompoto'i hi ia.

²²Ola untuk nu butongnyo na nu oa'i; ola kalibosan nu kinyonyoanyo na binaumo kasansala'annyo.