Read Saluan AYUB 16 Bible Online

AYUB 16 - Saluan bible

AYUB 16

¹Panyo tinaaman i Ayub, “Toto minsan i hongongku na pikilan nu aha sumo uuka; anu mohase' beleyum ola kasansala'an.

³Hipian na potatae anu toto bale-baleko' aijo' madi'mo otaeakon nu belemiu? Apaa na anu monggua-gua kinyonyoa nu belemiu sahingga belemiu montaamimo?

⁴De bisuannyo belemiu aiya aku, ka' aku aiya na belemiu, aku suele timbalimo motatae sumo belemiu atina'. Mingiaba'mo na potataengku moitina' hi belemiu; ubaku ku lilo-lilokakonmo.

⁵Kinyonyoa nu belemiu ku pohosonmo nu ngangahan na pokinde'; potataengku aiya bau pohase'.

⁶De aku motatae, kasansala'anku aiya madi' tolo edok; de aku momohokot apaamo ahi' na gunanyo?

⁷Binaumo nu Tumpu Allah na aku aiya sahingga tinadokmo; iwi-iwi' na mian anu i laiganku sinilakanmo.

⁸Ia madi'mo nompajuli aku ka' i hakop-Nyomo na aku. Uuka aiya nagesukmo hondo na butongku, ka' aijo'mo na bukuti'nyo da nusumbu' nu mian da'isan taalu' aku aiya binaladosa'mo.

⁹Tambuha' nu Tumpu Allah na nombea-beakmo butongku aiya; kina'idekannyomo na montoa mae aku.

¹⁰To mia-mian lewa'mo nongkokojoi aku, nu nganga'akon nu aha daka-daka' na nganga' nu aha lewa' mongalu aku; aku ilibutanmo nu aha ka' i hapa'mo nu aha na gagisingku.

¹¹Binee'mo nu Tumpu Allah na aku hi mian anu palaganta; pinokongkomnyomo na aku hi mian anu madi' monsumbu' Tumpu Allah.

¹²U'utu mae kantumuu'anku ma'ima' hondo madi' ko anu nompoposia ka' bilahi hondo, panyo monti-montiik Tumpu Allah nontumbuhimo mae hi belengku. Gogohongku sasu tundun pinanggohakon-Nyomo ka' aku ingalin-Nyomo; saja' sumo aijo' na Ia nombau aku salaku bau tatihan-Nyo.

¹³Madi'mo daagi' kokalibosan, Ia me saja' mompana' aku; sahingga nobubusmo na isi nu kompongku.

¹⁴Sumomo ahi' suludadu na Ia nontumbuhi mae aku; ka' pino uli-ulit-Nyomo na Ia nombelai mae aku.

¹⁵Aku nompusokmo kalung salaku tanda sinusa'mo hondo, ka' sinumuhangmo i abu' kalana pinatundu'mo.

¹⁶Ohupku nohahamo kalana lewa'mo i humang; kikilapku nabakunmo ka' nobuloumo.

¹⁷Panyo aku madi' noto'idek; jadi do'angku hi Tumpu nolengkat ahi' i kinyonyoa anu madi' tageo'.

¹⁸O dunia, boli oposuluk na apa-apaa anu ma'idek anu opokona hi belengku; boli ola ohokotakon na aku moloboo' momoita tulung da obee'i mae ahi' ka'adilan.

¹⁹ Ku sumbu' saba' anu montinjohi aku kiita' mae i suluga'; Ia na nontutuhakon tukoonyo aku madi' baladosa'.

²⁰Aku lewa' ingalu nu to sanga-sangalungku ka' kinokojoan; aku i humang na nangadap hi Tumpu Allah nomoita tulung.

²¹Paya', de timbali da Tumpu Allahmo ahi' na mompototu'u aku i ahopnyo; susumo samian anu halala' ahi' na mompototu'u bela'nyo.

²²Labinyo nu taun anu daagi' katumuu'anku madi'mo manjoo'; gagana' uuka aku mambamo ka' madi'mo daagi' po'ule' minsusule' mae.