Read Saluan AYUB 21 Bible Online

AYUB 21 - Saluan bible

AYUB 21

¹Tinaaman i Ayub, “Potombihing pa' apaa na anu ku loakon; ola aijo' na anu ku poita salaku bau pohase' mae.

³Pobee' pe'e mae da ku balosakon na motatae, lapas aijo' po'ule'je alu mae nu belemiu na aku!

⁴Misa' tiba manusia na aku painggaga, jadi madi' mongkuka de aku madi' saban.

⁵Tonto'i mae na aku, da belemiu tolokengkengje, belemiu sainjonomo ka' nganga' nu belemiu madi'mo moko ala motatae.

⁶De ku potutugakon na aku aiya, nulakatmo na aku kalana mansihimo na bulu na mongoa'i ka' mabuhukmo.

⁷Kadaka' mian anu ma'idek na kinyonyoanyo nupotumuu' nu Tumpu Allah pipin, ka' halata' nu aha ola kopintu-pintuangnyo?

⁸Aha tumuu' pin hondo, sahingga makumpu nu aha daagi' nutoa nu aha na daka'mo.

⁹Auwan nu aha sanang ka' bilahi hondo; Tumpu Allah madi' mompotoka mae balaa' hi aha.

¹⁰Potuu'on nu aha sapomo-pomolee'nyo, ka' madi' mahan na monganak.

¹¹To ana-anak nu mian anu ma'idek na kinyonyoanyo nahalumpatanmo kalana i lame'mo, sumomo domba anu daagi' anaknyo i lame'mo.

¹²Tiba onyi' nu labana, puloit ka' kasapi', aha i lame'mo na nanyanyi ka' lewa'mo nonsalelei.

¹³Sansina-sinaa na kantumuu'an nu aha mingahen i kabilahian, ka' de silakamo sanang hondo na kinyonyoa nu aha.

¹⁴Padahan notataemo na aha hi Tumpu Allah, “Pala'imo na kami ka' bolimo mae mati ohani! Kami madi'mo mongka'ima'i da monsumbu' kahanda' ka' pongka'oho' nu Belento i uno nu kantumuu'an mami.”

¹⁵Nututugi nu aha, “Montuluti anu nupoto'i nu Tumpu Allah madi' ko kaliangannyo, ka' balado'a hi Ia suele madi' mingguna.

¹⁶Te misa' ola ahi' posi kahosonanto, o humpakmo na anu o tanga'into ka' anu okahanda'into?” Panyo aku madi' hondo-hondo monsitujui, pikilan ka' tanga'an anu sumo itina'.

¹⁷Te toho'mo na sulu' nu mian anu ma'idek na kinyonyoanyo pinoho' ka' aha tinuda'anmo nu balaa' ka' kasusa'an? Te toho'mo na Tumpu Allah nontambuha'i aha, sahingga aha i hukum-Nyomo?

¹⁸Te toho' aha susumo hat ka' abu' anu nutilahabakonmo nu antong ka' mombun anu motulu?

¹⁹Belemiu notatae, “Anak nu hukum nu Tumpu Allah kalana dosa' nu tu'anyonyo.” Panyo aku motatae: Anu nu hukum nu Tumpu Allah aijo'mo mian anu baladosa', da nusumbu' nu aha taalu' kalana dosa' nu aha, sahingga Tumpu Allah nompokonamo hukumanNyo.

²⁰Bakas da mian anu baladosa' montanggungmo posi dosa'nyo, bakas da nu'oa'imo na tambuha' nu Tumpu Allah Anu Daka' hondo na kuasanyo.

²¹De manusia tokamo na tempo'nyo mompala'i dunia aiya, te daagi' ia montutugi pa' to ana-anaknyo mohumpakmo kabilahian?

²²Te nupoko ala mule' nu manusia na mompogulu' Tumpu Allah, te misa' Tumpu Allah ahi' na momputusi palakala nu malaekat i suluga'?

²³Daagi' ko mian anu mahoson na butongnyo tempo'nyo ia daagi' tutuu'; ia sinilakamo panyo kantumuu'annyo sinukupmo ka' sinanangmo. Ia sinilaka madi' sinansala ka' na'ima' hondo, ka' mule' butongnyo daagi' ahi' mahoson.

²⁵Panyo daagi' mule' ahi' ko anu silaka sinansala hondo, madi' toho' nongoa'i kasanangan.

²⁶Panyo i uno nu pinolamunan, aha pokakana bubu' pinomale'; ka' nukampuhimo nu ias.

²⁷Memang ku sumbu' apaa na anu opotutugakon nu belemiu, ka' iwi-iwi' na kalakuan anu ma'idek anu otanga'imo nu belemiu.

²⁸Belemiu mompokilawa, “Iya mae na laigan nu anu balakuasa anu mombau kalakuan anu palaganta?”

²⁹Te ma'isa toho' ileleakon nu belemiu hi mian da'isan anu lewa' mamba momoya? Te belemiu madi' mompalesaya lele anu sinisikmo nu aha?

³⁰Koonyo nu aha, “De tokamo na tempo'nyo Tumpu Allah mombee'imo hukuman, to mia-mian anu ma'idek na kinyonyoanyo oposalamatmo.”

³¹Madi' ko anu mompisala'i kalakuannyo; madi' ko anu mombalosakon kalakuannyo anu ma'i-ma'idek.

³²Ia oboa i pinolamunan, ka' oposoopmo i bolo'; pinolamunan ia o jagai ka' saja' opilasi.

³³Momada-madala na mian anu i lumajang nontuntuni ia i lembanmo aijo'; ka' mule' tano' nomalasanmo na nontabuhi ia.

³⁴Jadi potatae nu beleyum anu kahanda' mae mohase' aijo' madi' totu'u, ka' iwi-iwi' na anu pinontaami mae nu beleyum itina' baleko'!”