Read Saluan AYUB 24 Bible Online

AYUB 24 - Saluan bible

AYUB 24

¹Kadaka' Tumpu Allah madi' nompotantu sinaa anu katokaannyo mae momputusi palakala, da to mia-mian anu monsumbu'mo Ia mohumpak kaputusan anu adin?

²Daagi' ko mian anu nondensu'akomo pinontanda'i potempasan, da tano'nyo ewamo. Aha nombulingmo domba manjoo' hondo, ka' pinosoopnyomo i pangkun nu domba nu aha.

³Keledai anu nu anak anu ingunonmo madi'mo ko tinanyo ka' tuumanyo, pinopalaihakonmo nu aha; sapi' nu mian anu binalumo, ingalamo nu aha binau ponggadei.

⁴Madi' opobee' nu aha na mian anu kasiasi mohumpak anu memang ia ahi' na tumpunyo, sahingga paya' naninsulukmo na miana nu kasiasi hondo.

⁵Jadi, mian anu kasiasi aijo' sumomo keledai anu ma'ela', anu molio mongotot i tampat anu ko hemputnyo; ola i tampat anu susumo aijo' na daagi' ko anu nu otot nu to ana-anaknyo.

⁶Ale' nu mian paya' kinalajakonnyomo; bua' nu anggur nu mian anu ma'idek na kinyonyoanyo tinipunyomo.

⁷Ia madi' ko sabut ka' baju', da mamut na butongnyo de hoyotmo malom.

⁸Ia i humpismo nu ujan anu mabohos hondo kiita' mae ibungkutnyo, lantas ninsondo'mo i batu anu daka'hondo da mingkong.

⁹Mian anu ma'idek na kinyonyoanyo nombotuanimo anak anu madi' mo ko tinanyo ka' tuumanyo, ka' nongalamo bungamea' nu mian anu kasiasi anu ko samaya' hi ia.

¹⁰Mian anu kasiasi namba madi' nompusok baju'; ia no'ohopmo hau-haunyo daagi' aijo' i ale' mompadak gandum.

¹¹Bua' nu zaitun binaunyo lanya', ka' bua' nu anggur binaunyo tinimbali'mo anu o'inum, panyo ia i negotmo hondo.

¹²I sinin na kota' i hongomo na tano' nu mian anu toto ide-idek na kinyonyoanyo, to mia-mian anu binelaonmo momoita tulung da opakuli'i, panyo Tumpu Allah madi' mohongo do'a nu aha; Ia madi' mompajuli aha.

¹³Daagi' ko to mia-mian anu madi' mongka'ima'i jingka ka' mule' ahi' nu ka'ideki, aha madi' monsumbu-sumbu' ka' madi' mombatuki jalannyo.

¹⁴Daagi' subu-subu hondo mian anu topo patei nobulamo madi' mo ia i hoyot, lantas mosabatmo mamba mompatei mian anu kasiasi hondo madi'mo ko apa-apaa, ka' de ma'isa mopatas dodop subu, ia daagi' lewa' monggogiap susumo mian anu montomang.

¹⁵Mian anu saja' masala' montanda'imo sinaa anu malia'mo malom, kinukumbungnyomo na ohupnyo da mian madi' monsumbu' ia.

¹⁶Mian anu lewa' mombuling mongguili laigan tonga' bongi'; de sinaamo ia madi' manintoa i jingka ka' maninsulukmo.

¹⁷Hi ia de subumo nu kabuhuk hondo, panyo anu talalo hondo pikat aijo' na nu ka'ima'i hondo.”

¹⁸Lantas notataemo na i Zofar, “Mian anu ma'idek na kinyonyoanyo na'anjumo nu iyaba'. Tano' halata'nyo kinutukanmo nu Tumpu Allah; ale' nu anggurnyo i liingmo; madi'mo daagi' ko anu nokalaja i kiijo'.

¹⁹Susumo eis noe'mo kalana tinimpa'anmo nu posinaa sumo aitumo na mian anu binaladosa'mo minsoopmo mokiijo' i dunia nu mian anu sinilakamo.

²⁰Tinanyo pe'e mongkolilimimo ia, ka' sinin na ias nongkekedimo butongnyo. Sanggonyo madi'mo lewa' o'inau'; ia pinateanmo susumo kau' anu notua'mo.

²¹Iwi-iwi' aijo' jinadimo kalana ia lewa'mo nonsansalai to balu-balu, ka' talalo ahi' nonsigohi totina anu madi'mo ko anaknyo.

²²Panyo kalana kakuasa'an nu Tumpu Allah pinotobala'nyomo na mian anu baani. Tumpu Allah nohukumo, sahingga sinilakamo na mian anu palaganta.

²³Tumpu Allah nombee'imo ia kantumuu'an anu ma'ima', panyo sabole-bole saja' nu potomatakon.

²⁴Ola sasaingoni' na ia tumuu' bilahi, panyo lapas mae madi'mo daagi' ko kabilahian sampe toka sidu-sidutu'. Ia mangkalualemo susumo hemput anu madi' ko kaliangannyo; susumo tangkenyo nu pae anu pinadakmo i batangnyo.

²⁵ihe na madi' mompototu'u han anu jinadimo aijo', kabai monggagakon potataengku anu totu'u?”