Read Saluan AYUB 26 Bible Online

AYUB 26 - Saluan bible

AYUB 26

¹Panyo i Ayub notatae, “Pande hondo na beleyum montulungi mae aku anu madi'mo mahoson ka' anu madi'mo moko ala mombau apa-apaa!

³Ma'ima' hondo na pokinde' ka' pangajalan itina' anu binee'mo nu beleyum hi belengku, mian anu madi'mo moko ala mombau apa-apaa ka' talalomo tinadok susumo aiya.

⁴Toka hi he na potatae nu beleyum itina'? Ihe na mompoto'i ka' mompotiju' beleyum sahingga nonsumbu'mo notatae sumo itina'?”

⁵Tinaaman i Bildad, “To mia-mian i dunia nu mian anu silakamo langkakatan; uee ka' anu suele jojoong i unonyo suele nu lakat.

⁶I ahop nu Tumpu Allah, dunia nu mian anu sinilakamo tuhe-tuhea' hi Tumpu Allah, madi' tinumban sahingga kantoan hi Ia.

⁷Tumpu Allah nombokamo ewa-ewa langit aita' i bawo nu ndalangon songko-songko ka' pinokalayo'-Nyomo na dunia i tampat anu madi' ko isinyo.

⁸Lantas ingisian-Nyomo na kundom nu uee manjoo' hondo, panyo kundom aijo' madi' nobongkas maumo isinyo naboatmo hondo.

⁹Pinosuluk-Nyomo na ohup nu bitu'on anu tinimpodonmo, i sambiha' nu kundom anu binoka-Nyomo.

¹⁰Ginamban-Nyomo titikub aita' i kilit nu ambai da bau pongga'at jingka tiba pintung.

¹¹De Ia tolosegamo daka-daka', sinin na ohi' pontungkon langit gayu'an.

¹²Ndalangon songko-songko mahungku hi kuasa-Nyo, ka' i Rahab suele dinokemo nu kapandean nu Tumpu Allah.

¹³Sawonyo nu Tumpu Allah monsauti langit, sahingga majingkamo hondo: limanyo nompateimo kotong nu ulo anu daka' hondo, anu kinoboli' nopalaimo.

¹⁴Panyo iwi-iwi' aijo' ola salaku bau pongibalatakon kuasa-Nyo; ola susumo anu ingoyongakon i bihingto. Talalo ahi' sangkiding na kita mompangalati'i Tumpu Allah ka' kakuasa'an-Nyo talalo ahi daka'!”