Read Saluan AYUB 29 Bible Online

AYUB 29 - Saluan bible

AYUB 29

¹Po'ule' mule' tinutuahakon i Ayub, ia notatae,

²“De timbali da kantumuu'anku mompo'ule' mule' susumo u'utu mae, daagi' tempo'nyo Tumpu Allah montoa ka' monjagai mae aku.

³Aku saja' Nu tulungi mae, Nu jingkai mae na aku de mamba lumajang i uno nu pikat.

⁴Aijo'mo na sinaa kinatumuu'anku anu aku kinayamo tempo'nyo kanonongan nu Tumpu Allah nonjagaimo kantumuu'anku.

⁵Tempo'nyo aitu, Anu Daka' hondo na kuasanyo daagi' saja' monsangalui aku, ka' to ana-anaku daagi' aiya tiba aku.

⁶Susu manjoo' hondo na ku humpak i potuu'onku lanya' manjoo' hondo na ku humpak ito kau-kau Zaitun, maumo sinu'an i tano' anu batuon.

⁷De to tu'a-tu'anyo nu kota' sumuhang hingga-hinggat ka' aku nongala tampat aijo' i olot nu aha

⁸molengkatmo na to oli-olitau lia-lia' salatan tinoamo mae nu aha na aku. Ka' suele to tu'a-tu'anyo tuminjomo salaku mongadati aku.

⁹Ka' mule' to pangka-pangkat daka' madi'mo motatae,

¹⁰ka' suele anu o'angga'i madi'mo motatae.

¹¹Maumo pa' ihe na mohongo aku, ia bangang; ihe na montoa aku mompuji' anu binaungkumo.

¹²Kalana, ku tulungi na mian kasiasi anu momoita tulung; ku tulungi na anak anu madi'mo ko tuumanyo ka' tinanyo anu madi'mo ko anu mompalakai.

¹³Aku nupuji' nu mian anu talalo hondo susa', ku tulungi na mian anu binalumo sahingga aha madi'mo susa'.

¹⁴Iwi-iwi' na anu binaungkumo madi' tageo' ka' madi' koalunyo; aku saja' montinjohakon ka'adilan.

¹⁵Kona hi mian anu mapisokmo akumo na timbali mata; kona hi mian anu madi'mo moko ala lumajang, akumo na bau tengke nu aha.

¹⁶Kona hi mian anu kasiasi, akumo na bau tuuma nu aha; kona hi mian anu i salipu'an mae, akumo na montoakon aha.

¹⁷Panyo kakuasa'an nu mian anu singgi na kinyonyoa, i hungku'ankumo, ilugi'an mo nu aha ka' anu sinilakamo na aha pinosalamatkumo.

¹⁸Anu ku indi' da mantan na umun, ka' silaka sanang i posi laiganku.

¹⁹Aku sumo kau' anu tumuu' molumba', sukup na uee tiba dondu'ok ibakatnyo mohumpisi panga'nyo.

²⁰Iwi-iwi' na mian saja' mompuji' aku, ka' kahosonanku madi' toho' maga'a.

²¹To mia-mian momohokot, de aku mompokinde'imo; sinin na anu ku poto'i nu potombihing hondo-hondo nu aha.

²²Noko lapas na aku notatae, madi'mo daagi' ko anu palalu nompaka tuangi; potataengku nongkonamo aha susumo ujan tinudunmo mae.

²³Iwi-iwi' na mian sanang hondo na mahongo potataengku sumomo mian topo ale' molabotmo ujan de tempo'mo nu mimbuhak na sosu'anon.

²⁴Tinolomoingmo na aku hi aha salatan aha madi'mo ko anu otaha imani; ohupku anu saja' mompotoa kabilahian nompaka posumangatmo aha.

²⁵Akumo na timbali kapala, ka' montantukan iwi-iwi' na kaputusan. Kinapalaankumo na aha susumo tomundo aijo' mongatun suludadunyo, ka' i hase'kumo na aha hau-haunyo aha sinusa'mo na kinyonyoa nu aha.