Read Saluan AYUB 33 Bible Online

AYUB 33 - Saluan bible

AYUB 33

¹Uuka aiya, O Ayub, potombihing mae ima-ima' na potataengku anu kahanda'mo ku poto'i aiya.

²Tinoukankumo na anu kahanda' ku taloakon.

³Hodi-hodi' na kinyonyoangku motatae; anu kahanda' ku poto'i aijo'mo anu sahondo-hondonyo.

⁴Roh nu Tumpu Allah na nompotimbalimo aku ka' nombee'imo kantumuu'an hi belengku.

⁵Jadi, de timbali, taami mae na aku. Potoukamo na pontaami mae aku salaku bau pongkantahium butongum da osumbu' beleyum totu'u.

⁶De hi Tumpu Allah, beleyum ka' aku madi' ko bedanyo tano' ponto na kita kinompon-Nyo.

⁷Jadi, boli okabuhuk na aku nu beleyum: aku madi' ko kahanda' mohungku'i beleyum.

⁸Jadi, i hongongkumo apaa na anu nu taloakon nu beleyum, ka' sinumbu'kumo apaa na anu nu kahanda'i.

⁹Beleyum notataemo, ‘Aku belesi' madi' nombau anu madi' opongala. Aku madi' ko alunyo ka' madi' nombau kasala'an.

¹⁰Panyo Tumpu Allah noliomo sabab kahanda'mo mongewa aku, ka' binau-Nyomo na aku susumo mian anu mompaha idek tiba Ia.

¹¹ Ia nompungumo nu lante' i tengkengku; ka' pinotomatakonnyomo na aku kolangka-langkas.’

¹²O, Ayub, pikilan nu beleyum atina' sala' iwi-iwi'! Kalana Tumpu Allah ahi' na lebe daka' molingkudui manusia.

¹³Kadaka' beleyum montuukmo Tumpu Allah tukooyum Ia madi' mompajuli apa-apaa na anu nu kasusa'akon nu manusia?

¹⁴Manjoo' na ngangahannyo mosia na Tumpu Allah motatae, panyo madi' ko samian na anu mongintomakon potataenyo.

¹⁵ Mian pe'e anu hoyot binobogonmo pihi-pihi, ia nongipimo ka' nontoamo, Tumpu Allah notatae.

¹⁶Pinokaumo nu Tumpu Allah na aha da mompotombihing; pinotolokengkeng-Nyomo na aha nu pokinde', mompisala'i.

¹⁷Ia mongkahanda'i da aha bolimo mombau dosa' ka' bolimo lewa' mombuulakon butong nu aha, ka' bolimo nubau nu aha.

¹⁸Madi' Ia mompojohok aha da mongoa'i kapatean; Nujagai na aha da boli silaka.

¹⁹Tumpu Allah nompokinde'i salaku mompisala'i aijo'mo pinotoka-Nyomo mae na panyakit, sahingga butongnyo nasakitmo songko-songko.

²⁰Anu masakitmo madi'mo ko kinyonyoa mongkaan, maumo kaanon anu toto mamaamis o'oa'i monguahimo.

²¹Butongnyo nagesukmo hondo, bukunyo iwi-iwi' kinantoaanmo.

²²Ia malia'mo minsusule' i kajojoongan sampetoka sidu-sidutu', dunia kajojoongan nu mian anu silakamo ohanimo hi ia.

²³Samadala na malaikat nu Tumpu Allah, ugaat samian, na mompotuka' hi manusia apaa na kalajanyo, anu saidi' toka mae montulungi ia.

²⁴Molibos hondo na malaikat aijo' kalana aitu ia notatae, ‘Polapasakonmo na ia, madi' timbali ia mintatau' i dunia nu mian anu silakamo. Aiya na doi bau pontokong, da ia po'ule' pe'e bebas.’

²⁵Butongnyo mompo'ule'mo mahoson hondo po'ule'mo ma'ima' susumo olitau.

²⁶De ia balado'amo, ia nukalibosimo nu Tumpu Allah, sahingga lame'mo hondo na ia mompuji' Tumpu Allah ka' Tumpu Allah po'ule'mo mompohoson ia susumo momonanyo mae.

²⁷Sahingga i ahop nu mian da'isan ia motataemo, ‘Anu ma'idek ku anggapmo ma'ima', dinaka'mo na dosa'ku, panyo Tumpu Allah madi' mohukum aku.’

²⁸Tumpu Allah na nontewa' aku boli mamba i dunia nu mian anu silakamo sahingga aku daagi' tinumuu' sampe uuka aiya.

²⁹Saja'mo pino uli-ulitnyo, nu Tumpu Allah nombau iwi-iwi' sumo aiya,

³⁰da manusia timbali nuposalamat nu Tumpu Allah ka' mombee'i kabilahian i uno nu kantumuu'annyo nu manusia.

³¹Jadi potombihingmo Ayub, po'anga' na bihingum pomohokotmo, uuka aiya akumo na motatae.

³²Panyo de daagi' ko anu kahanda' nupoto'i, yo potataemo; ka' de beleyum ahi' na totu'u, aku sanang na mongakui.

³³Panyo de madi', pomohokotmo ka' potombihing mae na aku, aku mompogulu'mo kapandean bapikin hi beleyum.