Read Saluan AYUB 34 Bible Online

AYUB 34 - Saluan bible

AYUB 34

¹Te misa' belemiu pande ahi' ka' mimpikilan ahi' ma'ima'? Jadi, potombihing mae iwi-iwi' na anu ku taloakon aiya.

³Anu o kaan osumbu'je taalu' ma'ima' de onyamitmo, ka' potatae anu mompopande osumbu'je de opotombihing.

⁴Han anu obisalakon aiya tionyo ahi' opalesanto lantas opopikinakonje hingga-hinggat.

⁵Koonyo i Ayub, ‘Madi' ko kasala'an hi belengku, panyo Tumpu Allah madi' mongka'oho' mombee'i apaa na anu adin hi belengku.

⁶Aku osanggohi baleko', kalana nontaloakonmo mae aku, aku madi' baladosa'. Uuka aiya tinadokmo hondo na aku binelaon, maumo aku madi' ko kasala'an.’

⁷Belemiu toho'mo nontoa mian anu sumo i Ayub aiya? Ia saja'mo nontaloakon potatae anu toto ide-idek hi Tumpu Allah.

⁸Ia mongka'ima'imo lewa' mosangalu tiba mian anu palaganta, ka' lewamo mogandi-gandi tiba mian anu madi' talakana.

⁹Ia nontaloakon, tukoonyo ola palasuma de ia ko gia' mombau pongka'oho' nu Tumpu Allah.

¹⁰O to mia-mian anu pande, potombihing mae! Te toho' mule' Anu Daka' na kuasanyo mombau kasala'an?

¹¹ Hukuman anu bau pohukumnyo manusia, anu ahi' mompahatimbangmo tiba apaa na anu binaumo nu manusia, mohukum ia nu hukuman anu singgoma'mo tiba kalakuannyo.

¹²Tumpu Allah Anu Daka na kuasanyo madi' mombau anu ma'idek; iwi-iwi' na mian Nu bee'i ka'adilan.

¹³Lengkat me hi he na pohumpakan nu Tumpu Allah kuasanyo? Ihe na nompokuasamo dunia aiya hi ia?

¹⁴De bisuannyo Tumpu Allah mombubutmo nyawa nu manusia ka' po'ule'mo mongala santuu'nyo anu mompotumu' ia,

¹⁵saba' silakamo iwi-iwi' na anu ko nyawanyo, ka' manusia po'ule'mo timbali abu' susumo momonanyo.

¹⁶Jadi, de beleyum pande, saja' o'inau' ma'i-ma'ima', ponggiling mae na bihing nu beleyum ka' potombihing.

¹⁷Te toho' mule' Tumpu Allah anu adin aijo' ka' mahoson nu pisala'i nu beleyum? Te beleyum monsangka Tumpu Allah aijo' mongka'ideki ka'adilan?

¹⁸Tumpu Allah mohukum tomundo ka' anu ko kuasanyo, de aha mombau anu ma'idek ka' palaganta.

¹⁹Ia madi' montinjohi to tomu-tomundo, kabai lebe mompopodaka' mian anu kaya ka' madi' montapa-tapali mian anu talalo hodo kasiasi. Kalana aha iwi-iwi' Ia na nompotimbali.

²⁰Tonga' pahu, aha timbali monti-montiik silakamo. Tumpu Allah mohukum anu ko kuasanyo ka' aha mule' silakamo; dengke hondo na ia mompatei mian anu mahoson.

²¹Kantumuu'an nu manusia ia na monjagai Nutoa iwi-iwi' na kolangka-langkas nu manusia.

²²Madi' ko anu pintung, maumo ahi' pikat taha-tahahumo, anu timbali moko ala momposuluk miana nu baladosa'.

²³Madi' palalu na Tumpu Allah mompatikolo tempo'nyo, manusia na tokamo mae da Nu bee'i kaputusan.

²⁴Madi' mompai selidiki ka' mompalesa, nu pobelentimo na mian anu ko kuasanyo ka' mohangkatmo anu bau pombolosi.

²⁵Kalana Nusumbu' apaa na anu binaumo nu aha; sahingga pinaha patundu'-Nyomo na aha ka' pinatean-Nyomo tonga-tonga' pahu.

²⁶Aha i hapa'-Nyomo kalana dosa' nu aha, i ahop nu mian da'isan na Ia nohukum aha.

²⁷Kalana aha madi' montuluti pongka'oho'-Nyo ka' madi' mompajuli iwi-iwi' apaa na anu pinalentahkon-Nyomo.

²⁸Ahamo na nonsaduakon sahingga mian anu kasiasi lewa'mo nahahunsa'an i kasusa'an aha i humang i hongomo nu Tumpu Allah.

²⁹De nutantukanmo nu Tumpu Allah da momohokotmo, madi' ko samian anu moko ala mompisala'i Ia. De nuposuluk na ahup-Nyo, madi' ko samian na anu moko ala mongkabot Ia.

³⁰Jadi iwi-iwi' na bansa madi' moko ala montewa' kakuasa'an i han anu ma'idek ka' talalomo hondo monsansalai.

³¹O Ayub, pa' dosa' nu beleyum hi Tumpu Allah ingakuanmo nu beleyum? binalajanji'mo na beleyum madi'mo po'ule' baladosa'?

³²Pinoitamo nu beleyum da Nupoto'i mae na kasala'an nu beleyum? Binasumpa'mo na beleyum madi'mo mombau kalakuan anu susumo atina'?

³³Te toho' mule' Tumpu Allah mombee'mo anu nu nu kahanda'i, de apaa na anu binaumo nu Tumpu Allah madi' beleyum monsitujui? Uuka aiya, beleyumo na montantukan, misa'mo aku. Poto'imo mae mosia na tanga'an nu beleyum!

³⁴Iwi-iwi' na anu pande tantu monsetujui; miana anu pande na mohongo de aku motataemo

³⁵Kalana i Ayub motatae madi' nusumbu' apaa na nu taloakon, ka' potataenyo madi' ko alati'nyo.

³⁶De potatae i Ayub oselidiki totu-totu'u, atina'je ka' osumbu' taalu' potataenyo sumo potatae nu mian anu ma'idek na kinyonyoanyo.

³⁷Kasala'annyo tinuangan mule' nu sa'angu' na dosa', ia notomuhukmo hi Tumpu Allah, ka' nongambangi Tumpu Allah i ahop to.