Read Saluan AYUB 36 Bible Online

AYUB 36 - Saluan bible

AYUB 36

¹Soba potombihing pe'e mae, ka' sabaan pe'e, dagi' ko anu kahanda' ku poto'i, ko Tumpu Allah na monsumbu'.

³Anu ku sumbu' manjoo' hondo; jadi ku gunakonmo na han aijo' da bau pomponyata' saba' adin hondo na anu Nompodaagi'mo aku.

⁴Potataengku madi' ko anu madi' totu'u; mian anu totu-totu'u pande na bapikin aiya i ahop nu beleyum.

⁵Tumpu Allah aijo' daka' hondo na kuasanyo! Iwi-iwi' timbali Nu sumbu'. Madi' ko samian na anu Nutoa madi' kokaliangannyo.

⁶Mian anu baladosa' madi' Nu pojohok da tumuu' pin, Ia mombee'i ka'adilan hi mian anu mongoa'i kasansala'an.

⁷To mia-mian anu hodi' na kinyonyoanyo saja' Nu palahatikan. nu potimbali na aha da balakuasa susumo to tomu-tomundo, sahingga aha o'adati sampe toka sidu-sidutu'.

⁸Panyo de mian opungumo nu lante' besak, ia mongoa'imo kasansala'an kalana sinaduakonmo nu anu binaunyomo,

⁹sahingga dosa' nu aha ka' lewa' saja' buulon na aha nupoto'imo nu Tumpu Allah.

¹⁰Pinokaunyomo na aha da mompotombihing pokinde'-Nyo ka' mompala'imo kalakuan anu ma'idek na aha.

¹¹De aha montulutimo Tumpu Allah ka' monsombahmo Ia, aha tumuu'mo dame ka' mohumpakmo kabilahian sampe toka na tempo'nyo aha silakamo.

¹²Panyo de aha madi' mompotombihing, aha silakamo i uno nu kaponga'an.

¹³Mian anu madi' palesaya Tumpu saja' motambuha' i uno nu kinyonyoanyo; mau nuhukumo nu Tumpu, madi' mongka'oho' na aha momoita tulung.

¹⁴Aha silaka kalana tadokmo hodo na panyakit tempo'nyo daagi' olitau, kalana kantumuu'annyo saja'mo iuno nu anu moko ambang.

¹⁵Tumpu Allah mompokinde'i manusia mompake jalan aijo'mo Ia nombee'imo kasansala'an. kasusa'an na ginunakon-Nyo da bau pomposinsumbu' nusia.

¹⁶Tumpu Allah nompobebasmo beleyum da bolimo mongoa'i kasusa'an, sahingga beleyum madi'mo susa' na bapikin ka' meja' pong kaanan nu beleyum manjoo'mo na anu o kaan.

¹⁷Panyo uuka aiya kalana hahan anu ma'idek bibinaumo nu beleyum atina', beleyum mohumpakmo hukuman.

¹⁸Jaga ma'i-ma'ima' boli beleyum nu akali nu doi anu bau mae pontamboi; boli beleyum sala' na bapikin kalana nusaduakonmo nu kakaya'an.

¹⁹Ola palasuma na beleyum momoita tulung da otulungi, madi' kogunanyo na usaha ka' kahosonan anu ginunakonmo nu beleyum.

²⁰Boli beleyum mongka'ima'i pihi pikat, tempo'nyo nu to bansa-bansa silakamo ka' mohopu'mo.

²¹Jaga ma'i-ma'ima boli mongka'ima'i bauon anu palaganta. Kasansala'an anu ingoa'anmo nu beleyum aijo' alati'nyo da beleyum bolimo mombau anu ma'idek.

²²Sabole-bole otutugi, Tumpu Allah aijo' totu-totu'u daka' hondo na kuasanyo. Te daagi' ko gulu' anu sumo Ia na kopandenyo.

²³Ihe na anu moko ala mompotiju' jalan hi Ia? kabai baani na mompisala'i ia? Nombaumo kasalaan?

²⁴Saja' ia opuji' kalana apa-apaa na anu binau-Nyomo, ka' beleyum mule' tionyo ahi' mongadati Ia.

²⁵Iwi-iwi' na mian nontoamo apaa na anu binau-Nyomo; panyo maumo samian madi' ko anu monsumbu' totu-totu'u.

²⁶Tumpu Allah totu-totu'u talalo ahi' talasanggo madi' opoko ala okiop to na tanga'an-Nyo kabai mombilang konjoo'nyo nu taun anu Nugunakon.

²⁷Tumpu Allah na mohangkat uee lengkat i tano' mokiita' timbali kundom lantas obali'mo timbali ujan.

²⁸Ia na nombulok ka kon ujan lengkat mae aita' i talise', dinudu'akon-Nyomo nokaiyong hi manusia.

²⁹Madi' ko anu monsumbu' mau pe'e samian na kundom haha aita' mokohenggo ka' mule' onyi' nu gohung aita' i langit tampat kajojoongan nu Tumpu Allah.

³⁰Ia monjingkai langit iwi-iwi' nu kilat, panyo lananyo nu ambai na tataap ahi' pikat hondo.

³¹Sumo aijo' na Ia mompotuu' to bansa-bansa, ka' mombee'i aha anu o kaan molabi-labi.

³²Kilat nu hakop nu lima-Nyo ka' nu pokau monsosak anu Nu poki sosak.

³³Lontup nu gohung salaku bau pontandai saba' antong daka' tudunmo mae montilahabakonmo potuu'on suele monsumbu'mo antong daka' malia'mo mae tudun.”