Read Saluan AYUB 37 Bible Online

AYUB 37 - Saluan bible

AYUB 37

¹Antong anu daka' hondo no lakatmo kinyonyoangku ka' sulengku nangada'mo.

²Hongo na potatae nu Tumpu Allah, o belemiu iwi-iwi'; potombihing na gohung anu nosabatmo mae lengkat i nganga'-Nyo.

³Namba i songko-songko na langit, na pinompolapasannyo kilat-Nyo; sinai-Nyo na kilat-Nyo galo-galo' gohung toka-toka i puusnyo nu dunia.

⁴Lapas aijo', i hongomo na potatae-Nyo anu talalo ahi' daka' hondo, onyi' nu gohung anu talalo hondo lintuban. ka' mule' i olotnyo nu onyi' anu pinoge-pogelege'mo, gohung ka' kilat pinoka-pokalapitmo ka' noto-nototaaman mo.

⁵Kalana palentah nu Tumpu Allah, sahingga anu okabangangi jinadimo, anu okabangangi haha aijo' madi' opoko ala osumbu'to.

⁶Eis nanabu'mo i tano' kalana pinalentahnyomo; ujan anu daka' hondo tinudunmo mae kalana sinai-Nyomo mae.

⁷Kalaja nu manusia tinewa'nyomo da nusumbu' nu aha taalu' Ia hau-haunyomo mokalaja.

⁸Ka' suele binatang nu alas ninsoopmo i bolo' ka' liang, ka' naninsulukmo i petanyo.

⁹Lengkat mae i sasu selatan baleba' anu makansang hondo tinobungmo mae ka' lengkat mae i utara bakin nu baleba' talalomo hondo.

¹⁰Sawo nu Tumpu Allah nompotobengmo uee anu ewa hondo, nombali'imo da tinimbalimo eis anu mokut.

¹¹Kundom ingisian-Nyomo nu uee, ka' kundom najingkamo jiningkanmo nu kilat.

¹²Kundom haha aijo' ilumapmo namba i songko-songko na dunia, kalana palentah nu Tumpu Allah aha nambamo noyaya.

¹³Tumpu Allah nombee'imo mae ujan da bau pohumpisi tano', kabai mule' da bau pohukum manusia; ka' ugaat mule' da opotoa hi aha, na kalibosan-Nyo anu talalo hondo anu tataap sampe toka sidu-sidutu'.

¹⁴Soba pomohokot pe'e, o Ayub, ka' potombihing mae; sabole-bole o'inau' na hahan anu okabangangi anu binaumo nu Tumpu Allah.

¹⁵Pa' sinumbu'mo nu beleyum mosia na Tumpu Allah nombee'imo mae tanda, sahingga kilat ilubatmo mae aijo' i kundom ka' talise.

¹⁶Pa' nusumbu' nu beleyum mosia na kundom haha aita' lumahap aijo'mo na kapandean nu Tumpu Allah anu talalo hondo okabangangi?

¹⁷Madi', beleyum ola motusa' kalana napanasmo nu singit de dunia nupuhimo mae nu baleba' nu selatan.

¹⁸Te beleyum sumo nu Tumpu Allah moko ala mongkoka aita langit ka' mompokut ia susumo logam anu ocuang kabai kasa?

¹⁹Pogulu' mae na kami apaa na anu tionyo opoto'i mami hi Tumpu Allah; madi' ko anu opoko ala mami opoto'i nasa-nasa, pikilan mami madi' ko isinyo.

²⁰Aku madi' mongka'oho' mongkakase da motatae hi Tumpu Allah, boli-boli baumo pohumpakan-Nyo sabab da aku osilakai.

²¹Uuka aiya jingka nu langit najingkamo hondo sahingga ningkining-kiningmo na mata; mombun nompobelesimo jingka kalana pinuhakonnyomo.

²²Jingka susumo mosoni' ilubatmo mae sasu utara, ka' katalasanggoan nu Tumpu Allah nompobangangmo kinyonyoanto.

²³Daka' hondo na kuasa nu Tumpu Allah-nto; madi' opoko alanto na mongohani Ia, ia madi' tageo' ka' saja' adin; ia madi' toho' monsansalai manusia.

²⁴Mokonyo aijo' Ia konanyomo na o'adati nu mian maumo pa' ihe, ka' mian anu mangaku pande, madi' Ia mompajuli.”