Read Saluan AYUB 39 Bible Online

AYUB 39 - Saluan bible

AYUB 39

¹Pa' nusumbu' nu beleyum naipian na mee' nu bungkutnyo inganakakon na tinanyo? Pa' toho'mo tinonto'an nu beleyum na jonga anu ma'ela' nompo'anak anaknyo?

²Pa' nusumbu' nu beleyum sangkuka na sinaanyo na aha hempu'? Pa' nupoko ala nu beleyum na mombilang sinaanyo hipian na ia monganak?

³Pa' nusumbu' nu beleyum hipian na butong nuaha matindukumo lantas monganakakonmo anaknyo?

⁴To ana-anaknyo kodaka-daka'nyomo ka' mahosonmo i tano' anu ewa hondo; aha nambamo ka' madi'mo daagi' minsusule' mae hi tinanyo.

⁵Ihe na nompolapas keledai anu ma'ela' i alas? Ihe na nombukai kahohonnyo ka' mompojohokmo ia mamba moyaya?

⁶Hi ia Ku bee'mo na tampat anu mateges salaku baumo laigannyo ka' tampa-tampat anu ko timusonnyo da bau kajojoongannyo.

⁷Ia madi'mo mati ohani i to kota-kota' ka' i tampat anu lame', madi'mo ko anu moko ala mompinyami ka' mombee'i ia kalaja.

⁸Tampat nu hemput anu ewa hondo aita' mae i bungkutnyo aijo'mo na bau pongototannyo nu lio na santo hempu-hemput anu molumba' kiita' mae.

⁹Pa' sapi' anu ma'ela' mongka'oho' ahi' mokalaja hi beleyum? Mongka'oho' ahi' na ia lumukut malom i pangkun nu beleyum?

¹⁰Pa' nupoko ala ahi' na ia nu segoti nu beleyum ka' nupakisa nu beleyum mompajekoakon ale' nu beleyum? Pa' nupoko ala ahi' na ia nu pokau nu beleyum mompahatakon tano' anu pinajekomo aijo' i ale' nu beleyum?

¹¹Pa' timbali ahi' nutaha'imani na kahosonannyo, lantas nubee'mo nu beleyum hi ia na kalaja nu beleyum anu maboat hondo?

¹²Pa' nu palesayakonmo hi ia na montoluki anu pinadakmo nu beleyum, ka' oboa i tampat anu lewa' pongututan nu beleyum?

¹³Talalo hondo malia' na tomonsi' unta mompapa'i polipiknyo! Panyo de kohong na lumahap madi' nupoko ala nu pokakanai.

¹⁴Tomonsi' unta minggalau' i tano'; lantas nupala'imo; sahingga bone'je na mompanasi nggalau'nyo.

¹⁵Ia madi' monsumbu' pa' ugaat saidi' mae nu peja' nu mian ka' nupeja' nu binatang anu toto ela-ela'.

¹⁶Ia montoa soma'nyo au'aitu misa' soma'nyo na aijo' ia madi'mo mongkali-kalinga de apa-apaa na anu nu bau ola palasuma.

¹⁷Akumo na mompotimbali ia da pinonga'mo ka' madi'mo sampa mangalati', madi' binee'ku hi ia na kapandean bapikin ka' kapandean matangkas.

¹⁸Panyo de ia moko alamo mopadeka' lia-lia', nuhungku'imo na ajahan ka'anu monsake'i.

¹⁹O Ayub; pa' beleyum na nombee'imo kahosonan hi ajahan ka' sunda'nyo anu aita' i siakannyo?

²⁰Pa' beleyum na mompokaumo nalalumpat susumo kihi-kihi', ka' ia montihaha' mompopobuhukmo mian?

²¹Ia lame' hondo na lewa' mongkangkahe'i nu bukanyo i bangka'nyo, ka' baani hondo na ia mamba i tampat pahampatean.

²²Ia madi' monsumbu' pa' mosia na langgagahan ka' mabuhuk; madi' ko bajak anu mompotolo kuku' kinyonyoanyo.

²³Toongon anu bau pahampate anu tinakosmo nu anu nonsake'i ia pinolinsingmo ka' jinolingkabanmo na pinense'mo nu ka jingka.

²⁴Ajahan aijo' nompaka baanimo na ia nopadeka'; de umonyi'mo na tolompet madi'mo nupoko ala tenda na butongnyo.

²⁵Ia montihaha'mo de tolompet opo'onyi'mo daagi' majo'on nu okmo na nohong nu pahampatean. Nuhongomo na sega nu to sulu-suludadu anu matangkas na pangkatnyo salatan aha mombee'imo tanda.

²⁶Pa' bonyia' beleyum na nompogulu' lumahap de ia mambamo sasu selatan polipiknyo nu bokamo?

²⁷Pa' palentah nu beleyum na nubatuki nu mbambangnyo nu bonyia' ma'isa pe'e ia mombau petanyo i bungkutnyo anu matangkas?

²⁸Aita' i bawo nu bungkutnyo nu batu ia nombaumo laigannyo; tuu'nyo nu batu anu toto tajo-tajom binaunyomo bentengnyo.

²⁹I kiita' mae ia lewa'mo mompotomatakon montoa anu timbali nu kaan.

³⁰ Iyamae na ko anu silaka, i kiijo'mo na ia, ka' baso'nyo nu anu nu kaan aijo' nu inum nu to soma-soma'nyo.