Read Saluan AYUB 4 Bible Online

AYUB 4 - Saluan bible

AYUB 4

¹Lantas notataemo na i Elifas, tinaloakonyo: O Ayub, pa' beleyum madi' motambuha' de aku basisik? Madi' kupoko ala de aku madi' motatae.

³Nanjoo'mo na miana nu pinokinde'anmo nu beleyum, ka' aha anu madi'mo taalo palesaya po'ule'mo pinalesaya kalana pinokinde'anmo nu beleyum.

⁴Potatae nu beleyum na po'ule'mo nompohoson kinyonyoa nu aha, nohangkatmo mian anu tinondahapamo, anu pinoso'mo ka' nalawemo hondo.

⁵Panyo uuka aiya beleyum suele tinokanmo mae nu kasilakan; beleyum tinolokengkengmo, ka' madi'mo koanu o taha imani.

⁶Te misa' beleyum talalo ahi' tulu-tulutan hi Tumpu Allah; te misa' kantumuu'an nu beleyum madi' ahi kinokakulangannyo? Desumo aitu, na konanyomo ahi' na beleyum totu-totu'u na kinyonyoa palesaya, ka' madi' timbali susa' na kinyonyoa.

⁷Soba tutugi, pa' toho' ko mian anu madi' ko sala'nyo nutokai mae nu susa' ka' balaa'?

⁸Aijo' ku sumbu' kalana saja'mo nontoa kalana mian anu mompajeko ale', nu han anu ma'idek, ka' monsa'u bine' anu monsaduakon mae balaa' kona hi batu nu sosu'anon, saidi' mae mongala bua'nyo aijo'mo kasilakan ka' kasusa'an!

⁹Susumo bokon daka', sumo aitumo na Tumpu Allah mompatei aha, sahingga mohopu'mo iwi-iwi'!

¹⁰Mian anu uesan lewa'mo moloboo' ka' molotando', susumo singa na aha lewa'mo nontauut, Panyo Tumpu Allah nonggunggumimo nganga' nu aha ka' nompato'imo bese'nyo iwi-iwi'.

¹¹Aha natemo susumo singa madi'mo ko anu o kaan, sahingga to ana-anaknyo nosungke-sungkehetmo pa' noyamo.

¹²Daagi' ko potatae tinoka mae hi belengku, sumomo anu ingoyongakon mae i bihingku.

¹³ Aku madi'mo tinohoyot ka' tinolosikangkangmo, sumo nongipimo anu ma'idek pihi-pihi tonga'bongi'.

¹⁴Aku tinolokengkengmo ka' nabuhukmo ka' ilakatnyomo songko-songko na butongku nangada'mo ka' i lakatnyomo;

¹⁵Mombun moma-momalaas nompuhimo mae ohupku, sahingga tinuminjomo na uee bulu uengku.

¹⁶Daagi' ko sumo butong nu mian tinuminjo i ahopku; lewa'mo tinonto'anku, panyo ia madi' ku sumbu' pa' ihe. Lantas ihongongkumo na potatae-Nyo tempo'nyo aitu i lingmo songko-songko me aijo' na ihongo,

¹⁷“Ugaat manusia madi' ko kasala'annyo hi Tumpu Allah? Ugaat ia madi' ko anu opisala'i i mata nu anu nombau ia?

¹⁸Pakalaus to posa-posaihon nu Tumpu Allah i suluga', madi' nu palesaya. Pakalaus mule' to mala-malaikat-Nyo i humpak-Nyomo na kasala'annyo ka' anu opisala'i hi aha.

¹⁹Apaa mule' aha mian anu tano' na binau aha mian asannyo abu' anu timbali opijak susumo atak.

²⁰Aha mian aijo' tumuu' daagi' subu lantas silakamo de mamalomo, ka' sampe toka sidu-sidutu' ia madi'mo daagi' o'inau'.

²¹Sahingga iningkotmo iwi-iwi' na anu daagi' hi ia; ia suele sinilakamo madi' mohumpak kapandean apa-apaa.