Read Saluan AYUB 40 Bible Online

AYUB 40 - Saluan bible

AYUB 40

¹O Ayub, nu ewa nu beleyum na aku, Tumpu Allah Anu Daka' na kuasanyo; mongka'oho' na beleyum mahungku' kabai mongka'oho' na beleyum monggagakon?”

³Jadi tinaamanmo i Ayub na Tumpu, “Aku motatae aiya sumomo mian anu ponga', O Tumpu, Apaamo na bau pontaamingku? Madi'mo daagi' ko anu kahanda' ku taloakon.

⁵Talalomo nanjoo' na tinutuhakonku.”

⁶Lantas, i uno nu antong anu daka' hondo Tumpu po'ule' mule' notatae hi Ayub.

⁷Lantas pinoto'imo nu Tumpu hi Ayub, “Ahopi mae na aku de beleyum mo'ane, ka' taami mae na anu Ku pokilawa aiya iwi-iwi'.

⁸Pa' totu'u madi' nutalima nu beleyum na ka'adilan-Ku, ka' mompototu'u posi butong nu beleyum ka' mompisala'i mae aku?

⁹Pa' totu'u beleyum mahoson sumo aku? Nupoko ala nu beleyum na motatae sumo gohung pokakana sumo potataengku?

¹⁰Obunga-bungai na butong nu beleyum nu han anu mompotalasanggo ka' han anu mompopodaka', pake pa' apaa na anu timbali da opuji' ka' da kinyonyoa timbali mian anu ma'ima'.

¹¹Jonohi na aha anu saja' mohangka-hangkat butongnyo; lubatakonmo mae na pusa nu beleyum ka' poki pomohokotmo na aha.

¹²Yo, soba jonohi na aha mian anu saja' buulon, hungku'imo na ia! Pateimo na mian anu ma'idek na kinyonyoa kiijo' i kajojoongannyo.

¹³Lamunmo na aha iwi-iwi' i uno nu abu'; pojoongmo na aha i dunia nu mian anu sinilakamo.

¹⁴Sahingga beleyum Ku puji'mo kalana beleyum noko alamo nohungku'i ola kalana posi kahosonan nu beleyum.

¹⁵Soba toa hondo-hondo na i Behemot, binatang anu daka' hondo aijo'; sumomo beleyum, ia suele Aku na nompotimbali. Sinin na hemput tinimbalimo ototonnyo susumo sapi'.

¹⁶Panyo soba tonto'i ima-ima' na kahosonan anu aijo' i butongnyo ka' mule' kahosonan anu aijo' i uatnyo iwi-iwi'.

¹⁷Nu potido na ikunyo sumomo kau' aras, uat toto hoso-hoson i pa'anyo mahoson ka' mokut.

¹⁸Iwi-iwi' na bukunyo mahoson sumomo tambaga, tengkenyo suele mahoson sumomo batang besak anu ko aja'nyo.

¹⁹Anu pinotimbaling-Kumo ko ko nyawanyo, iwi-iwi' iamo na anu talalo hondo okabangangi; ola anu nompotimbalimo ia na moko ala mohungku'i ia!

²⁰I tampat-tampat anu ko bungkutnyo lewa' pahaikan nu binatang anu ma'ela', kiijo' ko hemput anu tinumuu'mo bau ototon nu aha.

²¹Ia lumukut i patu nu kuhat anu ko hi'nyo, i olot nu biho' ka' ko tampalangnyo i kiijo'mo na pinaninsulukannyo.

²²Kuhat anu ko hi'nyo na mohohungi ia nu hohungnyo. Kau' gandarusa i sohipi' nu uee na pingkongannyo.

²³Ia madi' mabuhuk maumo Kaunyo nu Yordan mabohos na soloknyo ia tataap sabaan maumo uee monsambuangimo ohupnyo.

²⁴Ihe na baani mompopaha matanyo, lantas mohakopmo ia, otado' i sumbangnyo?