Read Saluan AYUB 5 Bible Online

AYUB 5 - Saluan bible

AYUB 5

¹Potataemo daka-daka' Ayub, pa' daagi ko anu montaami? Malaikat iyamae na pinomoitanmo tulung nu beleyum?

²Ola mian anu ponga' na sinilaka kalana nusaduakon nu kinyonyoa anu madi'mo sanang.

³Toho'mo tinoangku na mian ponga'; kantumuu'annyo otoa sukupmo hondo; panyo monti-montiik tinotobi'akonkumo na kajojoongannyo.

⁴Sahingga to ana-anaknyo madi' toho' ko anu nontoakon da boli opoposia madi' ko anu nonsangaja'i aha tempo'nyo ingulus nu mian kopian.

⁵Apaa na anu pinadak'nyomo i ale' nu aha, ola iningkot kinaan nu mian anu i longkangmo na kompongnyo. Ka' mule' gandum anu kiijo' i kuhat, ningkotmo kinajoko'an nu mian anu no'ohopmo. Apa-apaa na anu nu aha ka' kakaya'an nu aha nu inde'imo nu mian anu mompai alamo halata'.

⁶Misa' lengkat mae i dunia na han anu ma'idek; misa' lengkat mae i tano' na kalubatan nu kasusa'an.

⁷Misa'! Panyo lengkat mae hi manusia na anu mompotoka mae balaa' hi butongnyo, susumo bohotika' nu apu lengkat mae i apu aijo'.

⁸De aku susumo ahi' beleyum, hi Tumpu Allah na tantu pomoitanku tulung. Hi la na pompoto'ianku hanku aiya ka' ku bee'mo da pa' oposiaje na ulusanku.

⁹Iwi-iwi' na anu binaumo nu Tumpu Allah talalo hondo oka bangangi; madi' opoko ala osumbu-sumbu'to. Anu okabangangi iwi-iwi' bibinau-Nyomo madi' opoko ala osumbu'to na konjoo'nyo ka' madi' ko kamingkotannyo.

¹⁰Ia nontudunakonmo mae ujan i dunia aiya, sahingga ale' ka' padang i humpismo na dinudu'an-Nyo.

¹¹Iamo na Tumpu Allah anu mohangkat mian anu madi' talakana', ka' mombee'i kabilahian hi mian anu susa'.

¹² Madi' pinobee'-Nyo na mian anu pande mongakali, sahingga usaha nu aha madi' noko ala nombau apa-apaa. Sinumbu'mo ka' i humpaknyomo na mian anu pande na monggoliliakon potataenyo, sahingga iwi-iwi na tanga'an nu aha madi' nongkaliangan, ka' aha ingakalanmo nu kapandean nu aha.

¹⁴De sinaamo aha nu konamo mae nu pintung maha kanyanganmo susumo anu pihimo.

¹⁵Panyo Tumpu Allah nomposalamatmo; mian kasiasi da boli mate anu sinilakamo mian anu madi' talakana' ka' da bolimo sakisa.

¹⁶Uuka aiya ko anumo otaha'imani nu mian anu madi' ko halata'nyo. Ka' mian anu uwesan nomohokotmo madi'mo lewa' motatae, kalana ginunggumanmo nu Tumpu Allah na nganga'nyo!

¹⁷ Untung na beleyum de daagi' nupisala'i nu Tumpu Allah na beleyum! Boli ise-ise' na kinyonyoa de nu alu na beleyum.

¹⁸ Kalana Tumpu Allah na nomposakiti ia mule' ahi' na mompakuli'i. Ka' limanyo na nondoke, limanyo mule' ahi' na po'ule' mompo'alin.

¹⁹De ko balaa' anu montokai mae, saja' beleyum na oposalamat.

²⁰De tokamo na tempo'nyo kasusa'an ia nu o kaan beleyum madi' silaka nu ohop. Maumo mian mahampate taha-tahahumo hondo na kinosidanyo madi' ko anu moko ala mompatei beleyum.

²¹Beleyum ojagai da boli nu kona nu pitana' ka' oka'ideki nu mian; beleyum mongahopi balaa' anu montokai mae madi' mabuhuk.

²²De kasansala'an ka' tempo' nu kasusa'an i anu o kaan montokai mae ola nusabaanakon nu beleyum ka' kumojo. Beleyum madi' mabuhuk ka' madi' bata-bata, mongahopi binatang anu mahangas hondo.

²³Ale' anu nu pajekomo madi'mo ko batunyo; binatang anu ma'ela' madi' toka mae mompoposia beleyum.

²⁴Madi'mo ko anu mompoposia beleyum jojoong i kemah nu beleyum; ka' de mamba nu toa na domba nu beleyum iwi-iwi', iwi-iwi' daagi' tumuu' madi' maga'a.

²⁵To maku-makumpu nu beleyum madi'mo opoko bilang, konjoo'nyo nu aha sumomo hemput anu tumuu' i padang.

²⁶Sumomo gandum anu nahamo, opadakmo toka i tempo'nyo, suele beleyum tumuu' mahoson sampe langkai'.

²⁷O Ayub, iwi-iwi' lewa'mo pinokilawa mami. Potatae aijo' memang totu'u, jadi simpalamo.”