Read Saluan AYUB 7 Bible Online

AYUB 7 - Saluan bible

AYUB 7

¹Manusia aijo' sumomo anu opakisa na montanga'i mombau apa-apaa; susa' hondo na kantumuu'annyo sumomo kantumuu'an nu mian anu mongala tambo;

²Sumomo samian na posaihon anu lewa' mongindi pa' iya na pihohungan sumomo mian anu mongala tambo montanda'imo tambonyo.

³Sambitu'on toka sambitu'on kantumuu'anku madi' osumbu'-sumbu' pa' moya na opatui; malom toka malom kinyonyoangku nobuke'mo nu kasusa'an.

⁴De aku lako'mo hoyot, ku oa'i pihi madi'mo sampa mopatas; gagalanku sampamo bete' na sinaa, madi' sanang na kinyonyoangku de aku male'mo.

⁵Butongku nobuke'mo nu somoyu ka' kahomo kogang nu baso'; kilitku kahomo bela ka' saja'mo minana'.

⁶Kantumuu'anku anu madi'mo otaha'imani aiya, malia'mo mingkot na tempo'nyo, nuhungku'i na kolia'nyo nu mian anu montonun mompojalan sikusinyo.

⁷Inau'akon mae, O Tumpu Allah, kantumuu'anku ola sumo anu opuhakon nu sawo; kasananganku pa' noyamo madi'mo tinoa-toa.

⁸Uuka aiya nutoa nu beleyum na aku — panyo aijo' madi' pin. De aku nulio nu Belento, saba' aku madi'mo ohumpak.

⁹Susumo kundom nohohungimo lantas madi'mo tinoa, manusia suele silaka, madi'mo po'ule' minsusule' mae. Iwi-iwi' na mian anu toho'mo nompahasumbu' tiba ia, nongkolilimimo ia ka' madi'mo nonginau' ia.

¹¹Kalana aijo' aku madi'mo ola momohokot! Kasusa'an nu kinyonyoangku ka' kasansalanku madi'mo ku poko ala opohowini. Tionyo ahi' ku sisikmo, ka' ku lubatakonmo na isi nu kinyonyoangku.

¹²Kadaka' aku aiya me saja' Nu palahatikan ka Nu jagai? Te aku aiya molokoimbu nu ambai anu timbali mosilakai?

¹³Aku kinomamale'mo soba-soba da milawe; aku mompai kahanda'i da tokolo' susa' na kinyonyoangku.

¹⁴Panyo ginala-galamo nu Belento nu ipion na aku; belento nompo'ipimo mae anu ma'idek ka' anu lewa' saja' o'inau' padahan anu madi' ko kaliangannyo.

¹⁵Sahingga gagalanku otekokmo mae na aku lantas silakamo apaa na gunanyo aku tumuu' padahan ola saja' mongoa'i sansala i uno nu kantumuu'an aiya.

¹⁶Aku nalawemo ka' na'osamo na tinumuu'; aku mongkahanda'imo silaka! Pojohokmo mae na aku, kalana kantumuu'anku madi'mo ko kaliangannyo.

¹⁷ Kadaka' manusia aijo' talalo hondo penting hi belento? Kadaka' apa-apaa na anu nu bau saja' nu potomatakon?

¹⁸Nu selidiki nu Belento na ia salatan subumo, ka' madi' ko olotnyo na ia saja' o uji' nu Belento.

¹⁹Hipian na Belento madi'mo montonto'i mae aku da aku ko tempo' ahi' mongegat ilungku?

²⁰O belento anu Monjagai mae aku, te lugi'mo o na Belento kalana dosa'ku? Kadaka' obaumo na aku nu Belento pompana'akonan pana' nu Belento? Te aku talalomo nompiboati butong nu Belento?

²¹Te madi'mo Belento timbali mongampuni dosa'ku? Te madi'mo timbali Beleyum monsapui kasala'anku? Madi'mo pin aku male'mo i uno nu polamunan ka' de aku nulio nu Belento madi'mo daagi' nuhumpak nu Belento.”