Read Saluan MAZMUR 103 Bible Online

MAZMUR 103 - Saluan bible

MAZMUR 103

¹Nyanyian i Daud. O, puji' na Tumpu, o, santuu'ku buke-buke' na kinyonyoangku, puji' na sanggo-Nyo anu susi'.

²O, puji' na Tumpu, o santuu'ku boli okolilimi na kanonongan-Nyo iwi-iwi'!

³Ia na anu nongampunimo dosa' nu beleyum iwi-iwi', anu nompa'alinmo iwi-iwi' na panyakit nu beleyum,

⁴ia na anu nompobebasmo nyawa nu beleyum da nosabatmo mae i uno nu kubulan, anu talalomo hondo nongkalibosi beleyum ka' nongkanonongimo hondo beleyum.

⁵Ia na anu nomposukupmo kantumuu'an nu beleyum i han anu ma'ima', sahingga beleyum sabole-boleh daagi' olitau susumo mbambang nu bonyia'.

⁶Tumpu mompojalan atulan ka' ka'adilan hi mian iwi-iwi' anu nohumpakmo kasansala'an.

⁷Pinotoa-Nyomo hi Musa na tanga'annyo ka' apa-apaa na palabuatan-Nyo hi bansa Israel.

⁸ Kalana Tumpu saja' mongkalibosi ka' mongkanonongi, Ia talalo hondo sabaan ka' kalibosannyo daka' hondo.

⁹Ia madi' sabole-boleh saja'mo monsegai ka' madi' motambuha' sampemo toka sidu-sidutu'.

¹⁰Ia madi' mohukum kita sitimbang tiba, dosa'to, kabai mombalosi kita sitimbang tiba kasala'anto.

¹¹Panyo sumo kotangkasnyo nu langit anu aita' mae, i buan nu tano' aiya sumo aitumo na kalibosan-Nyo kona hi mian anu tulu-tulutan hi Ia.

¹²Sumo kojo'onnyo nu kabete'an lengkat mae i kinsoban, sumo aijo'mo na Ia mompojoon dosa'to iwi-iwi'.

¹³Susumo tuuma mongkalibosi to ana-anaknyo, sumo aijo'mo na Tumpu mongkalibosi mian anu tulu-tulutan hi Ia.

¹⁴Kalana nusumbu' nu Tumpu, kita aiya apaa sabenannyo na binau, nu tutugi kita aiya ola abu' na gampanyo.

¹⁵Mian kantumuu'annyo ola sasaingoni' susumo hemput; ia tingkokamo susumo bunga-bunga i uno nu ale';

¹⁶de nupuhimo nu mombun, ia madi'mo otoa-toa, ka' mule' tampatnyo madi'mo daagi' osumbu-sumbu'.

¹⁷Panyo Tumpu sabole-boleh mongkalibosi mian anu tulu-tulutan hi Ia, kanonongan-Nyo saja' sabole-boleh sampe molundu-lundu na tulunan

¹⁸kona hi mian anu montoongi apaa na anu jinanji'-Nyomo, ka' anu tulu-tulutan mombau anu nu palentahkon.

¹⁹Tumpu mompalentah kiita' mae i suluga', iamo na tomundo anu mongkuasai iwi-iwi'.

²⁰O, puji' na Tumpu, o, belemiu to mala-malaekat-Nyo anu to babaani, anu mompotombihing ka' mombau anu nu palentahkon.

²¹O, puji' na Tumpu, o belemiu iwi-iwi' malaekat kiita' i suluga', iwi-iwi' na posaihon-Nyo anu mombau apaa na anu nu kahanda'i.

²²O, puji' na Tumpu, o belemiu iwi-iwi' anu pinotimbalimo nu Tumpu, anu jojoong i songko-songko na da'erah kakuasan-Nyo. O, puji' na Tumpu, o, santuu'ku!