Read Saluan MAZMUR 105 Bible Online

MAZMUR 105 - Saluan bible

MAZMUR 105

¹Pontalima kasemo hi Tumpu, bebakon na kakuasa'an-Nyo anu daka' hondo, sisikakon na palabuatan-Nyo hi to bansa-bansa.

²Onyanyi na nyanyian anu bau pompuji' Tumpu, polele iwi-iwi' na anu binau-Nyomo, anu nompobangangmo mian.

³Iamo na Tumpu Anu Susi' hondo, bilahimo mae kalana kita aiya Ia na Tumpunyo, iwi-iwi' na anu monsombah Ia tionyo ahi' balame-lame'mo.

⁴Poita na kahosonan hi Ia, saja' osombah na Ia.

⁵O, lee' mae i Abraham, posaihonnyo, ka' lee' mae i Yakub, mian anu pinile'an-Nyomo, boli okolilimi na anu binaunyomo iwi-iwi' apaa na anu nompobangangmo mian, sabole-boleh o'inau' apaa na anu tinantu kan-Nyomo.

⁷Tumpu Aijo'mo na Tumpunto, apaa na anu tinantukan-Nyomo aijo' opake i songko-songko na dunia.

⁸Ia madi' mongkolilimi apaa na anu jinanji'-Nyomo anu jinanji'nyomo opake sampe toka sidu-sidutu'.

⁹ Anu jinanji'-Nyomo aijo' binauNyo hi Abraham, ka' lapas mae hi Ishakmo;

¹⁰ lantas pinotatap hi Yakub da timbali bau palajanjian toka sidu-sidutu hi mian nu Israel.

¹¹Ia notataemo, “Tano' nu Kana'an Ku bee'mo hi beleyum baumo pusaka' nu beleyum.”

¹²Naipuan mae mian anu palesayamo hi Tumpu tumuu' kiijo' mae ola susumo mian anu lengkat mae i salipu'an konjoo'nyo nu aha ola sangkiding.

¹³Aha ola lewa' mamba molali-lalin lengkat mae hi bansa sangga'at mamba hi bansa sangga'at, molalin lengkat i sa'angu' na lipu' mamba i lipu' sangga'at.

¹⁴ Panyo Tumpu madi' ola mompojohok maumo pa' ihe na monsansala aha; kalana monginau' aha, sahingga to tomu-tomundo pinokinde'annyomo,

¹⁵“Boli lewa' mamba mompoposia mian haha aijo' anu pinile'an-Kumo, boli mombau anu ma'idek hi to nabi-nabi-ngKu!”

¹⁶ Tumpu nompotokamo mae tempo' nu kakulangan i anu okaan i lipu' aijo', ka' anu pinosadiamo na anu okaan iwi-iwi' ingalamo.

¹⁷ Panyo Tumpu nonsaimo samian namba momona, lantas aha nambaje i mihi, aijo'mo i Yusuf, anu pinobalukmo susumo posaihon.

¹⁸ Tengkenyo pinungumo nu lante' besak, gogohongnyo pino'olo'anmo lante' besak.

¹⁹Ahennyo tinimbalimo na anu lewa' sinangka-sangkanyo jadi i butongnyo, ia pinototu'umo nu potatae nu Tumpu.

²⁰ Lantas tomundo' nu Mesir, anu mongkuasai to bansa-bansa, nonsabatakonmo ia i uno nu talungku'.

²¹ Ia binee'anmo kalaja mongkalesang laigan nu tomundo', ka' binee'anmo kuasa mongkuasai iwi-iwi' na halata'nyo i tomundo';

²²ka' suele hak mongatun to mia-mian anu ko pangkatnyo mokalaja hi tomundo', ka' mongatun aha to tu'a-tu'anyo.

²³ Lantas i Yakub nambamo nokiijo' mae i Mesir, ka' jinojoongmo ikiijo' mae salaku mian anu lengkat mae i salipu'an.

²⁴ Tumpu nompaka tuangimo da mian anu palesayamo hi ia mompaka panjoo'mo, sahingga aha lebemo nahoson, i lingkuduanmo nu aha na mian anu mongewa aha.

²⁵Ia nombali'imo kinyonyoa nu aha mian Mesir, sahingga nongka'idekimo mian anu palesayamo hi Ia, ka' lewa'mo nongkabisa'i madi'mo hondo adin hi to posa-posaihonnyo.

²⁶ Lantas Ia nonsaimo i Musa posaihonnyo, ka' i Harun mian anu pinile'an-Nyomo.

²⁷Kiijo' mae i Mesir aha nombaumo hahan anu okabangangi, hahan anu daka' hondo na binaumo nu Tumpu,

²⁸ ka' aha tulu-tulutan hondo hi palentah-Nyo. Lantas Tumpu nompopikatmo lipu' aijo'.

²⁹ Kaunyo nu aha ingabali'-Nyomo susumo baso', sahingga iwi-iwi' na ikannyo i natemo iwi-iwi'.

³⁰ Bahangkakak sinumosingka'mo i lipu' nu aha, ka' suele nompinsoopimo laigan nu tomundo'.

³¹ Kalana pinalentahmo nu Tumpu Allah, lalo singkapmo tinoka ka' iwi-iwi' na momot sinihukmo i songko-songko na lipu'.

³² Ia nombuhensehakonmo mae eis binau pinombolosi ujan, ka' pinotokamo mae na kilat anu pinojo-pojohonjitmo.

³³Ia nontua'akonmo kau' anggur ka' kau' ara, ka' nontua'akonmo iwi-iwi' na kau' nu aha.

³⁴ Kalana pinalentah-Nyomo sahingga tinokamo mae na kihi-kihi', manjoo' hondo madi' opoko bilang na konjoo'nyo.

³⁵Aha nongkaanmo iwi-iwi' na anu sinu'an i ale', ka' kinaannyomo iwi-iwi' na isi nu ale'.

³⁶ Lantas sinilakannyomo na anak tumpe anu to momo'ane, hi aha toto sangauwan na mian nu Mesir.

³⁷ Lapas aijo' bansa Israel sinabatakon-Nyomo ka' binoa-Nyomo aha nomboa mosoni' ka' salaka; iwi-iwi' na aha mahoson ka' madi' ko anu masakit.

³⁸Mian nu Mesir nongkabuhukmo ha' nansihimo na bulu na montoa aha, jadi aha sinanangmo na nontoa mian nu Israel nambamo.

³⁹ Tumpu nongkokamo kundom da bau pohohungi mian anu palesayamo hi Ia, ka' apu na bau ponjingkai de pihimo.

⁴⁰ Aha nompoitamo, sahingga pinotoka-Nyomo mae na pipido, aha binee'an-Nyomo roti anu lengkat mae i suluga' sahingga nobosumo.

⁴¹ Biniha'-Nyo na bungkutnyo nu batu sahingga tinolotimbimo mae na uee, anu no'ilimo susumo kaunyo i tampat padang anu mateges na tano'nyo.

⁴²Kalana saja' nu inau' nu Tumpu na anu jinanji'-Nyomo, hi Abraham, posaihon-Nyo.

⁴³Sahingga i lame'mo na mian anu palesayamo hi Ia salatan binoa-Nyomo, to mia-mian anu pinile'an-Nyomo lewa'mo nolo ais.

⁴⁴ Tano' nu to bansa-bansa binee'-Nyomo hi aha, iwi-iwi' na ale' nu aha, ahamo mian anu palesayamo hi Ia na tumpu-Nyo,

⁴⁵da mian anu palesayamo hi Ia aijo', tulu-tulutan hi atulan-Nyo iwi-iwi', ka' montulutimo iwi-iwi' na palentah-Nyo. O puji' na Tumpu!