Read Saluan MAZMUR 106 Bible Online

MAZMUR 106 - Saluan bible

MAZMUR 106

¹ O puji' na Tumpu! Montalima kaseh hi Tumpu, kalana ia manonong; kalibosannyo madi' kokamingkotannyo sampe toka sidu-sidutu'.

²Ihe na moko ala mombebakon kabaanian nu Tumpu, ka' anu konanyomo ahi' na bau pompuji' ia?

³Mohumpak ka'ima'an na mian anu montuluti totu-totu'u palentahnyo iwi-iwi', ka' saja' totu'u na anu, nu bau.

⁴Inau'akon mae na aku, O, Tumpu, kalana Belento mongkanonongi mian anu palesayamo hi Belento, tulungiakon mae suele mule' na aku, de Belento momposalamatmo aha.

⁵O' amalakon da aku montoa kasanangan nu kantumuu'an, nu to mia-mian anu pinile'anmo nu Belento, ka' suele lame' tiba to mia-mian anu ninsoopmo Belento na tumpunyo.

⁶Kami binaladosa'mo susumo mompolee' mami; kami nombaumo gau' anu ma'idek ka' pinalagantamo.

⁷ Tempo'nyo kiijo' mae i Mesir mompolee' mami madi' mangalati'; kalaja nu Belento anu talalo hondo okabangangi, madi' nusumbu' nu aha. Kinolilimanmo nu aha na kalibosan nu Belento anu nolabi-labimo, ka' anu koko Ambai Gelagah, aha notomuhukmo hi Anu Matangkas na Kuasanyo.

⁸Panyo pinosalamatmo nu Tumpu na aha kalana kapentingan nu butong-Nyo, da kabaanian-Nyo oponyata'mo.

⁹ Kalana palentah-Nyo Ambai Gelagah no'otimo, Ia nomboamo mian anu palesayamo hi Ia i lumajang nontulu ambai, sumomo nontulu i tampat padang anu mateges na tano'nyo.

¹⁰Tiba jalan anu susumo aijo', Ia nomposalamatmo aha da madi' pinatean nu mian anu mongewa aha, pinobebas-Nyomo na aha da madi'mo kinuasan nu mian anu monsampobali'.

¹¹Panyo ambai nolomosimo anu mongewa aha; mau pe'e ola samian madi' ko anu tinontuha'.

¹² Lantas mian pinalesayamo hi apaa na anu jinanji'-Nyomo, ka' nonyanyimo nyanyian anu bau pompuji' Ia.

¹³Panyo aha sampa hondo mongkolilimi apaa na anu binaumo nu Tumpu ka' nombau apa-apaa madi'mo pilenje momoita pokinde' anu lengkat mae hi Ia.

¹⁴ I tampat padang anu mateges na tano'nyo aha sinuha'mo nu napisu, sahingga nonsobaimo Tumpu.

¹⁵Ia nombee'mo apaa na anu pinoitamo nu aha, panyo suele panyakit anu molele nongkonamo aha.

¹⁶ I tampat padang anu mateges na tano'nyo aijo' aha pinusamo hi Musa, ka' hi Harun posaihonNyo anu susi' aijo'.

¹⁷Lantas tano' nobiha'mo nolonyomo i Datan, nontambunimo i Abiram ka' aha sa'anakan.

¹⁸Apu na nintatau' mae nompapui gombuan nu aha, nontoyo'imo aha iwi-iwi' anu pinalagantamo.

¹⁹ I Bungkutnyo nu Sinai aha nonsuangmo mosoni' binau susumo anak nu sapi', ka' nonsombahmo patong anu sinuangmo aijo'.

²⁰Aha nontolosimo Tumpu anu talasanggo nu patong susumo sapi' anu ola mongkaan hemput.

²¹Aha nongkolilimimo Tumpu anu nomposalamatmo aha, anu nombaumo hahan anu daka' hondo tempo'nyo kiijo' mae i Mesir.

²²Opalias hondo na anu binau-Nyomo i lipu' aijo', okabangangi hondo na anu binaunyomo i Ambai Gelagah.

²³Sahingga Tumpu kinoniatmo da opateimo na mian anu palesayamo hi Ia, panyo tinewa'mo i Musa mian anu pinile'an-Nyomo aijo'. I Musa na nombisalai aha poti-potimbiha', sahingga Tumpu madi'mo pinusa.

²⁴ Lapas mae aha madi'mo nongka'ima'i lipu' anu ma'ima'an hondo aijo', kalana madi'mo pinalesaya hi janji' nu Tumpu.

²⁵Aha lewa'mo nongonguyung motusa' i uno nu kemah nu aha, ka' madi'mo mongka'oho' mohongo potatae nu Tumpu.

²⁶Sahingga binasumpa'mo na Ia ka' binajanji'mo, mompateimo aha i tampat padang anu mateges na tano'nyo aijo'.

²⁷ Lee' nu aha oboamo i lipu' nu to bansa-bansa sangga'at, ka' oga'a-ga'atakonmo mamba oboa i lipu' nu mian anu i salipu'an.

²⁸ Lapas mae salatan aha kiijo'mo mae i Peor, nonsombahmo Baal, ka' nongkaanmo anu sinombahkonmo hi to pilo-pilogot.

²⁹Han anu binaumo nu aha aijo' nonsaduakonmo da Tumpu notambuha', sahingga aha kinonamo nu panyakit anu molele anu okabuhuk hondo.

³⁰Panyo i Pinehas nombee'imo hukuman hi aha anu nombaumo kasala'an, sahingga madi'mo nolele na panyakit aijo'.

³¹Han anu binaunyomo aijo' inganggapmo salaku kalaja anu daka' na alati'nyo i butongnyo, ka' sabole-boleh o'inau' sampe toka sidu-sidutu'.

³² I bubung iwi-iwi' kiijo' i Meriba aha nonsaduakonmo da Tumpu notambuha', ka' kalana gau' nu aha sahingga nomposusa'mo i Musa.

³³Aha nonsaduakonmo da kinyonyoanyo nojojo'mo sahingga ia notatae, madi'mo pinai tutugannyo.

³⁴ To bansa-bansa sangga'at madi'mo pinatean nu aha ingko-ingkot, susumo anu pinalentahkonmo nu Tumpu.

³⁵Pakalaus aha mule' no'osoamo tiba to bansa-bansa sangga'at haha aijo', ka' aha nontihomo kabiasa'an nu mian anu madi' monsumbu' Tumpu.

³⁶Lantas aha nonsombahmo to pilo-pilogot ka' aijo'mo na nonsaduakon sanggo nu aha madi'mo na'ima'.

³⁷ Aha nongkolobanakonmo to ana-anak nu aha hi to pilo-pilogot nu aha Kana'an.

³⁸ Aha nombubusakonmo baso' nu mian anu madi' kosala'nyo, baso' nu posi to ana-anak nu aha, da okolobanakon hi to pilo-pilogot; sahingga lipu' nu aha aijo', i ngedeanmo nu aha.

³⁹Kalana hahan anu binaumo nu aha aijo' sahingga aha suele naidekmo, ka' madi'mo nontuluti Tumpu.

⁴⁰ Lantas i noakmo na tambuha' nu Tumpu hi aha, binuaganmo na Ia kalana miannyo haha aijo'.

⁴¹Sahingga binee'nyomo na aha hi to bansa-bansa pinojohoknyomo na aha sahingga kinuasanmo nu sampobali' nu aha.

⁴²Lantas aha saja'mo sinakisa nu anu monsampobali' aha, ka' tinundu'mo i kakuasa'an nu aha.

⁴³Saja'mo hondo Tumpu nompobebas aha, panyo aha lebe mongka'ima'i saja' motomuhuk; sahingga aha sinilakamo kalana dosa' nu aha iwi-iwi'.

⁴⁴Panyo ihongomo mae nu Tumpu na aha nolobo', ia nonginau'mo kasusa'an nu aha.

⁴⁵Kalana nonginau' aha, ia tinonginau'mo i palajanjian-Nyo ka' nongkalibosimo aha kalana daka' hondo na kalibosan-Nyo.

⁴⁶Binalakatan-Nyomo na aha da kinalibosanmo nu mian iwi-iwi' anu nomboamo aha i lipu' nu aha.

⁴⁷ Posalamatakon mae na kami, O, Tumpu mami, po'ule' mae posihuk na kami anu noga'a-ga'atmo hi to bansa-bansa sangga'at, da kami montalima kasemo ka' mompuji'mo sanggo nu Belento anu susi' hondo.

⁴⁸O puji' na Tumpu, Tumpu nu aha Israel, uuka aiya sampe toka sidu-sidutu'. Da' iwi-iwi' na mian montaloakon, “Amin!” O puji' na Tumpu!