Read Saluan MAZMUR 107 Bible Online

MAZMUR 107 - Saluan bible

MAZMUR 107

¹ “Montalima kaseh hi Tumpu kalana Ia manonong, kalibosan-Nyo sampe toka sidu-sidutu'.”

²Saja' opo uli-ulit na montaloakon aijo', o belemiu anu nongoa'imo kasusa'an panyo pinosalamatmo.

³Belemiu anu jinojoongmo i tano' nu mian pinosihuk-Nyomo lengkat i to kampu-kampung anu isalipu'an, lengkat mae i kabete'an ka' i kinsoban, utara ka' salatan.

⁴Daagi' ko anu lewa'mo namba momoya i tampat padang anu mateges, ka' madi'mo nonsumbu' jalan mamba i kota' da bau kajojoongan.

⁵Aha no'ohopmo ka' negotmo ka' madi'mo ko anu otaha'imani.

⁶I uno nu kasusa'an aha nongkakasemo hi Tumpu, ka' Ia nompobebasmo aha da madi'mo mongoa'i kasansala'an.

⁷Ia nolaya'mo aha da nontulumo jalan anu hodi' nambamo i kota' da bau kajojoongan.

⁸Pantasmo na aha montalima kaseh hi Tumpu kalana kalibosanNyo, kalana apa-apaa na anu binau-Nyomo, anu mompobangang hondo manusia.

⁹Kalana Ia nompopuasmo mian anu i negotmo, ka' nombee'i molabi-labi mian anu no'ohopmo nu iwi-iwi' na anu ma'ima'.

¹⁰Daagi' ko anu pinosoopmo i uno nu kapintungan, mian anu tinalungku'mo nongoa'imo kasansala'an kalana pinungumo nu lante' besak,

¹¹kalana aha notomuhukmo hi Tumpu ka' madi'mo nompajuli palentah nu Anu Matangkas na Kuasanyo

¹²Ia nomposusa'mo kinyonyoa nu aha kalana binee'anmo kalaja anu maboat; aha notua'mo ka' madi'mo ko anu notulungi.

¹³Aha i uno nu kasusa'an nomoitamo tulung hi Tumpu, ka' Ia nompobebasmo aha da madi'mo mongoa'i kasansala'an.

¹⁴Aha i uno nu pikat, sinabatakon-Nyomo, ka' nombotu'akonmo lante' besak anu pinompungu aha.

¹⁵Pantasmo na aha montalima kaseh hi Tumpu kalana kalibosan-Nyo, kalana apa-apaa na anu binau-Nyomo anu mompobangang hondo manusia.

¹⁶Kalana i hobo'akon-Nyomo iwi-iwi' na tumban tambaga, ka' nohansuhimo iwi-iwi' na besak, anu binau ponsupati.

¹⁷Daagi' ko anu ponga' ka' nongoa'imo kasansala'an, kalana to dosa-dosa' nu aha, ka' pinosakisamo kalana kasala'an nu aha.

¹⁸Aha bubunmo nongoa'i iwi-iwi na anu okaan, ukun nu aha silaka, ohanimo.

¹⁹I uno nu kasusa'an, aha nomoitamo tulung hi Tumpu, ka' Ia nompobebasmo aha da madi'mo mongoa'i sakisa.

²⁰Ia nompa'alinmo aha ola pinalentah-Nyo, ka' nompolapasmo aha da boli minsoop i bolo nu kubun.

²¹Pantasmo na aha montalima kaseh hi Tumpu kalana kalibosan-Nyo, kalana apa-apaa na anu binau-Nyomo anu nompobangang hondo manusia.

²²Sahanyo aha montalima kaseh ka' momboa anu osombahkon, ka' mule' mombebakon apa-apaa na anu binau-Nyomo, olaguakon nu nyanyian anu bilahi.

²³Daagi' mule' ko anu motulu i ambai sumake' kapan, molio anu okaan i ambai anu ewa hondo.

²⁴Aha nontoamo apa-apaa na anu binaumo nu Tumpu, anu binau-Nyomo ka' okabangangi i ndalangon.

²⁵Kalana palentah-Nyo tinobungmo na mombun makansang ka' nompotimbalimo bokon toto daka-daka'.

²⁶Iwi-iwi' na kapan i hangkatnyomo nokiita' i langa, lantas i lumbu'akonnyomo nokaiyong i lananyo nu ndalangon. To mia-mian madi'mo daagi' ko kabaanian na mongahopi balaa' anu daka' hondo sumo aijo'.

²⁷Aha pinusingmo ka' naha tinomba tombabihingmo sumomo mian anu nalangumo ka' madi'mo ko anu nu sumbu-sumbu'.

²⁸I uno nu kasusa'an aha nomoitamo tulung hi Tumpu, ka' Ia nompobebasmo aha da madi'mo mongoa'i sakisa.

²⁹Tambusisi' anu talalomo nakansang pinalentah-Nyomo da balentimo, iwi-iwi' na bokon tinendamo.

³⁰Aha sinanangmo kalana mombun mombun makansang tinomboliumo; binoa-Nyomo na aha i palalabuan anu opanjolongi.

³¹Pantasmo na aha montalima kaseh hi Tumpu kalana kalibosan-Nyo, kalana apa-apaa na anu binau-Nyomo anu mompobangang hondo manusia.

³²Aha nombebakonmo katalasanggoan nu Tumpu hi bubu' aha mian anu palesayamo hi Ia, ka' mompuji'mo Ia i palahimpunan nu to tu'a-tu'anyo.

³³To kau-kaunyo ingabali'-Nyomo tampat padang anu mateges, mata nu uee tinimbalimo tano' anu kinantisanmo.

³⁴Tano' anu molumba' pinotimbali-Nyomo tampat padang anu napoyu'mo nu timuson, kalana palabuatan ma'idek nu to mia-mian anu jinojoong ikiijo'.

³⁵Tampat padang anu mateges pinotimbali-Nyomo talaga, tano' anu motis pinotimbalimo mata nu uee.

³⁶To mia-mian anu mo'ohop pinojoong-Nyomo kiijo' mae, aha nombaumo kota' da bau kajojoongan nu aha.

³⁷Aha nonsaumo bine' i ale' nu aha iwi-iwi' ka' nonsu'anmo anggur, lantas nongalamo hasinnyo nanjoo' hondo.

³⁸Tumpu nombalakatimo aha da nanjoo' na anak nu aha, ka' binatang potuu'on nu aha nompaka panjoo'mo.

³⁹Panyo aha pinatundu'mo ka' madi'mo nanjoo' kalana kasansala'an ka' talalomo pinosakisa hondo.

⁴⁰Tumpu nompatundu'mo anu mongkuasai aha, ka' nompalentahmo aha lewa' namba i tampat padang anu mateges anu madi' ko jalannyo.

⁴¹Panyo mian anu kasissi pinobebas-Nyomo da aha madi'mo mongoa'i kasusa'an, auan nu aha nompaka panjoo'mo sumomo gombuan nu domba.

⁴²Mian anu hodi' na kinyonyoanyo montoa aha ka' lame'mo, panyo anu ma'idek na kinyonyoanyo opomomo'mo.

⁴³O'amalakon da mian anu pande mompotutugakon iwi-iwi' aijo' ka' mongakui tukoonyo Tumpu sabole-boleh mongkalibosi.