Read Saluan MAZMUR 113 Bible Online

MAZMUR 113 - Saluan bible

MAZMUR 113

¹O, puji' na Tumpu! O to posa-posaihon nu Tumpu, o, puji' na sanggo nu Tumpu.

²Sanggonyo obebakonmo uuka aiya ka' sansina-sinaa.

³Lengkat mae i kabete'an toka-toka i kinsoban sanggo nu Tumpu tionyo ahi' o puji'.

⁴Tumpu balakuasa hi iwi-iwi na bansa, katalasanggoan-Nyo moliu-liu langit.

⁵Ihe na sumo Tumpunto? Ia mompalentah aita' mae i tampat anu matangkas.

⁶Panyo Ia maninduku mae na kahanda' montoa langit tiba tano'.

⁷Mian anu kasiasi aijo' i abu' i hangkat-Nyomo, ka' suele mian anu loloison anu aijo' i tano'.

⁸Aha pinosuhang-Nyomo hingga-hinggat tiba anu balakuasa, hingga-hinggat tiba to mia-mian daka' anu aijo' hi aha mian anu palesayamo hi Ia.

⁹Ia nombalakati bengkele' anu lengke'mo da nohumpak to pia-piangkuka na anak, ka' nompotimbalimo ia totina anu nohumpakmo ka'ima'an ka' oholomati i laigannyo. O puji' na Tumpu!