Read Saluan MAZMUR 115 Bible Online

MAZMUR 115 - Saluan bible

MAZMUR 115

¹Misa' kami, o Tumpu, misa' kami, panyo olamo ahi' Belento na tionyo o puji', kalana Belento manonong ka' saja' mongkalibosi.

²Kadaka' iwi-iwi' na bansa motataemo, “Iya mae na Tumpu nu aha?”

³Tumpu-nto kiita' mae i suluga', Ia nombaumo apaa na anu tinanga'an-Nyomo.

⁴ Bapilogotan nu aha mosoni' ka' salaka na binau, anu binau nu lima nu manusia.

⁵Aha ko nganga', panyo madi' moko ala motatae, ko mata, panyo madi' moko ala montoa.

⁶Aha ko bihing, panyo madi' moko ala mohongo, ko sung, panyo madi' moko ala mongook.

⁷Aha ko lima, panyo madi' moko ala mongkanyang, ko tengke, panyo madi' moko ala lumajang, ka' madi' ko onyi' nu potatae mosabat lengkat mae i gogohongnyo.

⁸O' amalakon da sumo aijo'mo na uki' nu to mia-mian anu nombaumo sumo aijo' ka' iwi-iwi' na mian anu pinalesayamo hi ia.

⁹O Israel, sabole-boleh Tumpu na otaha'imani, Iamo na nontulungi ka' nonjagai belemiu.

¹⁰O to ima-imam, Tumpu na sabole-boleh otaha'imani Iamo na nontulungi ka' nonjagai belemiu.

¹¹O to mia-mian anu tulu-tulutan, sabole-boleh Tumpu na otaha'imani, Iamo na nontulungi ka' nonjagai belemiu.

¹²Tumpu monginau' kita ka' nu balakati na kita, Nu balakati na mian nu Israel ka' iwi-iwi' na imam lee' i Harun.

¹³ Nu balakati na to mia-mian anu tulu-tulutan, mau anu daagi' ise' mae anu daka'mo.

¹⁴O' amalakon da Tumpu mombalakati mohumpak manjoo' na anak, hi belemiu ka' hi lee' nu belemiu.

¹⁵O' amalakon da belemiu nubalakati nu Tumpu anu nompotimbali langit ka' tano'!

¹⁶Langit samata-mata anu nu Tumpu, panyo tano' binee'-Nyomo hi manusia.

¹⁷Tumpu madi' nu puji' nu mian anu i natemo, nu mian anu nintatau'mo i tampat anu liing.

¹⁸Panyo kita anu daagi' tutuu' montalima kaseh hi Ia, uuka aiya ka' sampe toka sidu-sidutu'. O puji' na Tumpu!