Read Saluan MAZMUR 118 Bible Online

MAZMUR 118 - Saluan bible

MAZMUR 118

¹ Pontalima kaseh hi Tumpu kalana Ia manonong, kalibosan-Nyo sampe toka sidu-sidutu'.

²Tionyo ahi' nutaloakon nu mian Israel, “Kalibosan-Nyo sampe toka sidu-sidutu'.”

³Tionyo ahi' nutaloakon nu to ima-imam, “Kalibosan-Nyo sampe toka sidu-sidutu'.”

⁴Tionyo ahi' nutaloakon nu mian iwi-iwi' anu tulu-tulutan, “Kalibosan-Nyo sampe toka sidu-sidutu'.”

⁵I uno nu kasansala'anku aku nongkakasemo hi Tumpu; lantas Ia nontaamimo mae ka' nompobebasmo mae aku.

⁶ Aku madi' mabuhuk kalana Tumpu na monsangalui mae aku, manusia madi' moko ala mombau apa-apaa hi belengku.

⁷Tumpu na nonsangalui mae aku kahanda' montulungi aku aku montoamo sampobali'ku opatundu'mo.

⁸Sahanyo mihohung hi Tumpu, ka' de mule' ola montakabunakon manusia.

⁹Sahanyo mihohung hi Tumpu ka' de mule' ola montaha'imani to mia-mian daka'.

¹⁰Manjoo' na sampobali'ku montiikubimo mae aku; kalana kakuasa'an nu Tumpu, aha pinatundu'kumo.

¹¹Aha nontikumo mae aku madi'mo ko palaianku kalana kakuasa'an nu Tumpu, aha pinatundu'kumo.

¹²Susumo uani' aha nongkampuhimo mae aku; kalana kakuasa'an nu Tumpu aha pinatundu'kumo. Ola sinangkinihap aha pinoho'mo susumo apu anu nontoyo'imo kuhat anu ko hi'nyo.

¹³Aku pagalamo tinumbuhan mae totu-totu'u ka' pinipagalaanyomo me sangkiding sinilakamo, panyo aku tinulunganmo nu Tumpu.

¹⁴ Tumpu aijo'mo na kahosonanku ka' anu talalo ku puji', Ia nomposalamatmo mae aku.

¹⁵Potombihing na taligala kiijo' i iwi-iwi na kemah nu mian anu palesayamo hi — Ia, kalana inguntungmo na nahampate. “Tumpu nombaumo palabuatan anu daka' hondo!

¹⁶Kuasa nu Tumpu na nompo untung kita nahampate! Tumpu nombaumo palabuatan anu daka' hondo.”

¹⁷Aku madi'mo silaka, panyo sabole-bolehmo tumuu' da mombebakon kalaja nu Tumpu.

¹⁸Tumpu nonsakisamo aku totu-totu'u, panyo Ia madi' nombee' aku i uno nu kapatean.

¹⁹Tuhea'akon mae na sabatan daka' i Laigan nu Tumpu da aku minsoopmo ka' montalima kaseh hi Ia.

²⁰Aiyamo na sabatan daka' nu Tumpu, ola mian anu hodi' na kinyonyoanyo na timbali minsoop.

²¹Ku puji' na Belento, kalana Belento nonsitujuimo do'angku; Belento nompo'untungmo aku nahampate.

²² Batu anu ingalinmo nu to tuka-tukang anu nombau laigan tinimbalimo batu pinongusoi.

²³Sumo aijo' na Tumpu nombau, talalo hondo mompobangang kita.

²⁴Aiyamo na sinaa anu tinantukanmo nu Tumpu imbo' da olame'akonto totu-totu'u.

²⁵ Okakase mami Tumpu, posalamatakon mae na kami, O, Tumpu, po'untungakon mae na kami, mahampate!

²⁶ Balakatiakon mae na ia anu toka mae momboa mae sanggo nu Tumpu, obalakatimo mami na belemiu nu balakat anu lengkat mae i Laigan nu Tumpu.

²⁷Tumpu, aijo'mo na Tumpu Allah, Ia manonong hondo hi kita. Inda mambamo da kita balonda molame'akon ka' montoongi panga' nu kau' ko honnyo, ka' montiikubi mezbah nu Tumpu.

²⁸Belentomo na Tumpu Allah-ngku, aku montalima kaseh hi Belento, O, Tumpungku, ku popodaka'mo na Belento.

²⁹Pontalima kaseh hi Tumpu kalana Ia manonong, kalibosan-Nyo sampe toka sidu-sidutu'.