Read Saluan MAZMUR 135 Bible Online

MAZMUR 135 - Saluan bible

MAZMUR 135

¹O puji' na Tumpu. O puji' na sanggo nu Tumpu, o belemiu to posa-osaihon-Nyo

²anu monsombah i Laigan nu Tumpu i kajojoongan nu Tumpu-nto.

³O puji' na Tumpu, kalana Ia manonong, o puji' na sanggo-Nyo, kalana Ia madi'.

⁴Ia nompile'imo i Yakub da nu pake i kapentingan-Nyo, mian nu Israel pinotimbali-Nyomo Ia na tumpunyo.

⁵Kalana ku sumbu' Tumpu talalo daka' na kuasa-Nyo, Ia talasanggo hondo molingkudui iwi-iwi na pilogot.

⁶Ia molakukan apaa na anu nu kahanda'i, i langit ka' i tano' i ambai ka' i ndalangon anu maleeng hondo.

⁷Lengkat mae i puus nu tano' Ia nompotokamo mae kundom, pinokilaton-Nyomo de tudun na ujan. Lantas Ia nompalentahmo mombun da mosabat mae i tampat pinompo'una'an-Nyo.

⁸Kiijo' mae i Mesir pinatean-Nyomo na anak tumpe iwi-iwi' anak nu manusia kabai binatang.

⁹Kiijo' mae Ia nombaumo manjoo' na anu okabangangi ka' tanda bau pohukum tomundo' ka' iwi-iwi' na pagawe-Nyo.

¹⁰Ia nompateimo manjoo' hondo na bansa, ka' nompateimo to tomu-tomundo' anu toto babaani.

¹¹Sihon tomundo' nu Amori ka' Og tomundo' nu Basan, tiba iwi-iwi' na tomundo' i Kana'an.

¹²Lantas lipu' nu aha binee'Nyomo tinimbalimo anu nu Israel, mian anu pinalesayamo hi Ia.

¹³O, Tumpu, belento sabole-bolehmo obebakon, ka' sanggo nu belento, iwi-iwi' na lee' nu mian monginau'

¹⁴kalana belento mombee'i ka'adilan hi mian anu palesayamo hi belento, ka' mongkalibosi to posa-posaihon nu belento.

¹⁵ Pilogot nu aha mosoni' ka' salaka na tinutuk, lima nu mian na nombau.

¹⁶Aha ko nganga'nyo, panyo madi' moko ala motatae, ko matanyo, panyo madi' moko ala montoa.

¹⁷Aha ko bihingnyo, panyo madi' moko ala mohongo, madi' ko sawonyo lengkat mae i nganga'nyo.

¹⁸O'amalakon da sumo aijo'mo na uki' nu to mia-mian anu nombaumo ia ka' anu pinalesayamo hi ia.

¹⁹O puji' na Tumpu o mian nu Israel, O puji' na Ia, o to ima-imam nu Tumpu!

²⁰O puji' na Tumpu, o to mia-mian nu Lewi, o puji' na Ia, belemiu iwi-iwi' anu tulu-tulutan hi Allah Tumpu.

²¹O puji' na Tumpu kiijo' i Sion i Yerusalem tampat kajojoongan-Nyo. O puji' na Tumpu!