Read Saluan MAZMUR 145 Bible Online

MAZMUR 145 - Saluan bible

MAZMUR 145

¹Bau pompuji' lengkat hi i Daud. Aku mompopodaka'mo Belento, o, Tumpungku ka' Tomundo'ku, ka' mompuji'mo Belento sampe toka sidu-sidutu'.

²Sansina-sinaa aku montalima kasemo hi Belento, ka' mompopodaka'mo Belento sampe toka sidu-sidutu'.

³Kalana Tumpu talasanggo ka' talalo hondo opuji', katalasanggoan-Nyo madi' opoko ala okiop.

⁴Molundu-lundu na tulunan nu mian mompuji'mo apaa na anu binaumo nu Belento, ka' mombebaakonmo kabaanian nu Belento.

⁵Aha mompolelemo katalasanggoan ka' kaholomatan nu Belento, palabuatan nu belento oka-okabangangi, lewa'mo ku potutugakon.

⁶Aha mombebakonmo palabuatan nu Belento anu talalo hondo okabuhuk kakuasa'an anu daka' hondo nu Belento kubebakonmo.

⁷Mian monsisikmo iwi-iwi' kanonongan nu Belento, ka' monyanyiakonmo ka'adilan nu Belento.

⁸Tumpu aijo' pangkalibosi ka' pangkanonongi, madi' sampa motambuha' ka' saja' mongkalibosi.

⁹Ia manonong hi batu-batu mian, ka' nukalibosi iwi-iwi' apaa na anu pinotimbali-Nyomo.

¹⁰Iwi-iwi' na anu pinotimbalimo nu Belento mompuji'mo Belento, o, Tumpu, iwi-iwi' na anu pinalesayamo hi Belento montalima kasemo hi Belento.

¹¹Aha mompopodaka'mo kuasa nu Belento salaku Tomundo', ka' monsisikmo kabaanian nu Belento.

¹²Da nusumbu' nu mian iwi-iwi' na palabuatan nu Belento anu daka' hondo, ka' kalaja'an nu Belento anu talasanggo hondo ka' talapuji' hondo.

¹³Kapalentahan nu Belento sampe toka sidu-sidutu', kakuasa'an nu Belento tataap sampe molundu-lundu na tulunan. Tumpu saja' mongganapi iwi-iwi' apaa na anu jinanji'-Nyomo, Ia talalo hondo mongkalibosi iwi-iwi' apaa na anu binau-Nyomo.

¹⁴Tumpu montulungi mian anu i uno nu kasusa'an, Ia montinjohi mian anu madi' panggaga.

¹⁵Iwi-iwi' na anu ko nyawanyo montaha'imani Belento; Obee'i nu Belento mongkaan na aha de tempo'nyomo nu pongkaanan.

¹⁶Oganapi nu Belento iwi-iwi' na kapalaluan nu aha, sahingga aha madi' kakulangan.

¹⁷Tumpu adin hondo i han iwi-iwi' apaa na anu Nu bau ka' talalo hondo nu kalibosi apaa na anu binau-Nyomo.

¹⁸Ia ohani hi mian anu mongkakase hi Ia, ka' mongkakase hi Ia tiba kinyonyoa anu madi' tageo'.

¹⁹Ia momposanang kinyonyoa nu to mia-mian anu tulu-tulutan; Ia mompotombihing apaa na nu kakase nu aha ka' momposalamatmo aha.

²⁰Ia monjagai batu-batu mian anu mongka'ima'i, panyo anu ma'idek na kinyonyoa-Nyo nu patei.

²¹Aku saja'mo mompuji' Tumpu, O'amalakon da anu-Nyo iwi-iwi' apaa na anu ko nyawanyo mompuji'mo sanggo nu Tumpu sampe toka sidu-sidutu'.