Read Saluan MAZMUR 18 Bible Online

MAZMUR 18 - Saluan bible

MAZMUR 18

¹Anu mongkapalai panyanyi. Mazmur i Daud, posaihon nu Tumpu. Inyanyiakon hi Tumpu salatan i Daud madi'mo pinoposia i Saul ka' aha anu monsampobali' ia.

²Ku ka'ima'i na Belento, o Tumpu, Belentomo na tinimbali kahosonanku.

³Tumpu sumomo benteng anu mahoson hondo tampat pihohunganku. Tumpu-ngku sumomo bungkutnyo nu batu tampat pihohunganku. Sumomo kanta Ia mongkukubi mae aku, ka' monjagai mae aku da saja' madi' ko anu mompoposia mae.

⁴Aku mongkakase hi Tumpu anu pantas o puji', Ia nompobebasmo mae aku da boli nupoposia nu to sampo-sampobali'ku.

⁵Aku tinikubanmo nu balaa' anu monsilakaimo ka' ileetabanmo nu iyaba' kasilaka'an.

⁶Aku tinikubanmo nu balaa anu monsilakaimo, bau pohakop nu anu monsilakaimo ingahopankumo.

⁷I uno nu kasusa'anku aku nongkakasemo hi Tumpu, aku nolobo'mo hi Tumpu-ngku mongkakase da otulungi. Kiita' mae i laigan-Nyo i hongo-Nyomo mae na potataengku ka' nontutugiakonmo mae apaa na anu kinakase'kumo.

⁸Lantas tano' ginayu'anmo ka' ginenggohanmo, pu'un nu bungkutnyo iwi-iwi' tinolohenggomo ka' ilangkakatanmo kalana Tumpu notambuha'mo.

⁹Tibuk tinolosumbumo lengkat mae i bolo' nu sung-Nyo, apu ka' obanyo nosabatmo lengkat mae i nganga'-Nyo.

¹⁰Langit biniha'-Nyomo lantas nintatau'mo mae na Ia kundom anu pinikatmo na akaong i aluk nu tengke-Nyo. Nontau'akon Ia.

¹¹Ia ilumapmo nonsake'i malaikat; Ia i lumahapmo aita mae i polipik nu mombun.

¹²Ia nolupi'mo butong-Nyo nu kapintungan; kundom anu tinumatampokmo daka-daka' nontikubimo mae Ia.

¹³Kilat anu aita' i ahop-Nyo, nosabatmo mae na kundom, ujan eis ka' apu.

¹⁴Lantas Tumpu notatae sumomo ahi' gohung aita' mae i langa; Anu Matangkas na Kuasa-Nyo nompohongomo mae potatae-Nyo.

¹⁵Ia nompana'akonmo pana'-Nyo iwi-iwi' ka' nomposungkehetmo sampobali'-Nyo; Ia nompo'uli-ulitmo kilatnyo pinoji-pojihinjit, ka' aha nopalaimo.

¹⁶Lananyo nu ambai kinantoaanmo ka' latasnyo nu dunia tinabuka'mo tempo'nyo Tumpu notambuha'mo sinegan-Nyomo na sampobali'nyo.

¹⁷Lengkat mae aita' Tumpu nonguluakonmo mae lima-Nyo; tinoongan-Nyo na aku ka' i hela'-Nyomo lengkat mae akaong i uno nu uee anu maleeng hondo.

¹⁸Ia nomposalamatmo aku da madi' nupoposia nu sampobali' anu baani hondo, ka' suele hi to mia-mian anu mongka'ideki mae aku, kalana aha na talalo mahoson molingkudui aku.

¹⁹Aha nolambanimo mae aku tempo'nyo aku tinokanmo nu balaa', panyo Tumpu na nontulungimo mae aku.

²⁰Ia nompolapas aku da madi' kinona nu balaa' ka' nomposalamatmo aku kalana Ia sinosokmo hi belengku.

²¹Tumpu nombalosimo kalakuanku anu saja' totu'u na ku bau Ia nombalakatimo aku kalana aku madi' ko kasala'an.

²²Aku nontulutimo hondo palentah nu Tumpu ka' madi' moteba' hi sangga'at panyo sabole-boleh ahi' hi Tumpu-ngku.

²³iwi-iwi' na atulan-Nyo sabole-boleh ku inau', palentah-Nyo iwi-iwi' madi' ku kolilimi.

²⁴Ia monsumbu' aku madi' ko anu opisala'i, ka' saja' mompimpali butong da boli ko kasala'an.

²⁵Sahingga Tumpu nombalosimo kalakuanku anu saja' totu'u na ku bau, kalana Ia monsumbu' aku madi' ko kasala'an.

²⁶O Tumpu, Belento madi' mongkolilimi mian anu madi' mongkolilimi Belento ka' manonong hi mian anu manonong hi Belento.

²⁷Kona hi mian anu susi', butong nu Belento suele nu poto'i ahi' susi', panyo anu ma'idek na kinyonyoanyo suele ahi' nuka'ideki nu Belento.

²⁸Mian anu madi' mintige-tige nuposalamat nu Belento, panyo mian anu lewa' kobubuun nupatundu' nu Belento.

²⁹Belento nontutungimo pansona'ku; Tumpu-ngku nonjingkaimo kapintungan aiya hi belengku.

³⁰Belento nombee'imo mae aku kahosonan mompatei sampobali'ku; kalana Tumpu-ngku nontulungimo mae sahingga ingideankumo na benteng nu aha.

³¹Apa-apaa na anu binaumo nu Tumpu na'ima'mo hondo anu jinanji'mo nu Tumpu timbali opalesaya. Ia sumomo kanta kona hi mian iwi-iwi' anu mihohung' hi Ia.

³²Kalana olamo Tumpu, na Tumpu; olamo Tumpu na montinjohi mae kita.

³³Iamo na Tumpu anu nombee'imo mae kahosonanku ka' nombauimo mae kajalananku anu madi' ko anu mompoposia.

³⁴ Ia nompohosonakonmo mae tengkengku susumo tengke nu jonga, ka' nonjagaimo da aku salamat kiita' mae i bungkutnyo.

³⁵Ia nompogulu'mo aku mahampate, sahingga aku moko alamo nompeletakon pana' anu talalo hondo mokut na o hela'.

³⁶O Tumpu, Belento, nonjagaimo ka' nomposalamatmo mae aku, ka' nompahasangaja'imo mae aku nu kuasa nu Belento; aku na nohumpak ka'untungan nahampate kalana Belento nontulungimo mae.

³⁷Jinaganmo nu Belento na aku da aku madi' o hakop, ka' aku madi' toho' tinombahangkang.

³⁸Tinuloi'kumo na sampobali'ku ka' pinatundu'kumo na aha ka' madi' aku tinolosule' sahingga aha sinilakankumo.

³⁹Pinobahangkangkumo na aha sahingga aha madi'mo noko ala po'ule' nobula, aha tinombahangkang madi'mo noko ala nombau apa-apa aitu itengkengku.

⁴⁰Binee'anmo nu Belento na aku kahosonan mahampate, ka' ka'untungan nahampate nongewa iwi-iwi' anu nonsampobali' mae aku.

⁴¹Binaumo nu Belento na sampobali'ku nopalaimo nompala'i aku; to mia-mian anu nongka'ideki mae aku pinateankumo.

⁴²Aha nolobo'mo momoita tulung, panyo madi' ko anu nontulungi aha nongkakasemo hi Tumpu, panyo Ia madi' nontaami mae.

⁴³Aha i tinutukumo susumo abu' anu sinagakonmo, ka' sinautankumo susumo hensek ijalan.

⁴⁴Belento nompobebasmo aku da madi' nupoposia nu aha sa'anakan anu palaganta, ka' nompotimbalimo aku mongkuasai to bansa-bansa; bansa anu madi' ku sumbu' tinimbalimo posaihonku.

⁴⁵To mia-mian anu lengkat mae i salipu'an mongkabuhuk hondo aku ka' tulu-tulutan hondo de mohongomo palentahgku.

⁴⁶Kabaanian nu aha imadi'anmo; aha i lakatnyomo ka' nosabatmo mae i benteng nu aha.

⁴⁷Tumpu tumuu'! Ku puji' na anu nontinjohimo mae aku! O Puji' na Tumpu anu talasanggo nomposalamatmo aku!

⁴⁸Ia nompo'untungmo aku nahampate nongewa sampobali'ku; to bansa-bansa pinatundu'-Nyomo i ahopku,

⁴⁹pinosalamat-Nyomo na aku nahampate tiba nu nongewa mae aku. O Tumpu, binee'anmo nu Belento na aku ka'untungan nahampate nongewa sampobali'ku, jinaganmo nu Belento na aku da madi' pinatean nu anu to sisinggi.

⁵⁰ Jadi aijo' hi bansa haha aijo' ku puji'mo na Belento, ka' ku nyanyimo na nyanyian pompuji' Belento.

⁵¹Tumpu nombee'imo ka'untungan nahampate anu daka' hondo hi tomundo'-Nyo, Ia sabole-boleh mongkalibosi mian anu pinile'an-Nyomo, aijo'mo i Daud ka' lee'nyo sampe toka sidu-sidutu'.